3 o'osti ta'apa nisiwa wan okitakatilti se nikonTakat,

yewal kitokayolti Er.

4 Oksep o'osti ta'apa wan okitakatilti okse nikonTakat,

yewal okitokayolti Onán.

5 Wan okipi okse nikon,

yewal kitokayolti Selá,

Yehudá katka pa in pweblo Kesib kwah takati Sela.

6 Kikonanil Yehudá se siwat itoka Tamár,

pa monamiktiskya nikon we Er.

7 Wan Er,

nikon ta'ishpa Yehudá katka se takat amokwal,

yok in WeTatsDyos kikishtili niyoliliste.

8 Kwakin Yehudá kili Onán:

“Shimonamikti ka nisiwa monohni,

kina kimatil kichiwal kwah miki se ninohni pa yok kinpiyas nikolinchim mopa tewal.”

9 Ma yok kimatiya Onán kampa amo yesloskya nikolinchim yewal.

Kampa yok kwah motekaya inak yewal,

tanokiyaya talpa pa amo kipiyaskya nikon,

wan yok amo kipiyaskya nikolinchim ninohni mihke.

10 Wan in WeTatsDyos,

amokwal okit kina okichi Onán,

wan niyok kikishtil niyoliliste.

11 Kwakin Yehudá kili nisiwamon Tamar:

“Shimoka pa nikal motats,

pa kimani mo'apawa nokon Selá.”

Kampa yewal tamat:

Aso niyok miki kina ninohniwan.

Yok Tamár panoti wan oy omochanti ka nitats.

12 Panok myak tonatim,

wan omik nisiwa Yehudá,

yewal nikonSiwat Sú'a.

Kwah otam okichokil,

Yehudá panoti pa in pweblo Timenat kaha katkaloya in takam kinshimtikatkaloya niborrego'.

Wan ninihni Hirá,

in adulamteko kitokatiya.

13 Kinawatik Tamár kampa nimontats panoti pa Timenat pa kinshimaskya niborrego',

14 kwakin mokishtil nishashalme wan kati motakemiltiloya siwam yewal kwah mikiloya inintaka inintawikal,

kitapach itsontek ka se rebos pa yok amo'ak ki'ishmatiskya,

kwakin omotal pa in ot kaha kalakil pa in pweblo itoka Enayim,

yewal onka pa in ot Timenat.

Tamar okit kina omo'apawaya Selá,

ma yok Yehudá amo kimak Selá pa yok yeskya nitaka.

15 Wan Yehudá okit kwah panotiyaya wan mo'il pa niyol yewal siwat motek ka moshte,

kampa tapachotikatka nishayak.

16 Kwakin sela mochi pa ot pa ki'asiskya yewal wan kili:

―Shimotemak pa nimotekas ka tewal.

Kampa amo kimatiya kampa yewal katka nisiwamon.

Wan yewal kili:

―Wan ten tinishmakas ta nimotemak pa timotekas ka newal?

17 Yewal kinakili:

―Nimishtitanilis se chibo yewal nikinpi pa noyolikilme.

Wan yewal kinankili:

―Shinishkawil pek ten ka tewal kampa nihmatis ta melak tishwaltitanilis.

18 Wan Yehudá kili:

―Ten tihnek pa nimishmakas?

Wan Tamár kinankili:

―Moseyo kipi ikpal,

wan mobara yewal tihwik.

Wan Yehudá okinmak,

wan omotek inak yewal,

wan pa yewal ta'apa.

19 Kwakin omokets,

haniman panoti wan mokishtil yewal ka tapachotiyaya,

wan omotakemilti oksep ka ishashalme kina se siwat mihki nitaka.

20 O'as Yehudá kaha nitanichikolme,

konan se chibo wan kititanili in siwat inak in ninihni in adulamteko,

pa yok kiwalkwepaskya oksep inik yewal kikawil in siwat;

ma yok amo kit in siwat.

21 Kintahtanili inik takam yehwante ompa katkaloya:

―Kaha onka in siwat yewal motek ka moshte takam nika pa Enayim,

yewal katka pa sela in ot?

Yehwante kinankilik:

―Nika amo onka siwat yewal motek ka moshte takam.

22 Ninihni mokwep kaha katka Yehudá kili:

―Amo nikit yewal.

Nichilik in takam yewal mochantil ompa amo katka se siwat kina yewal.

23 Wan Yehudá kito:

―Ma motakawil ka yewal ten nihkawil.

Pa amo'ak wetskas pa tehwante.

Kampa melak newal niktitanil in chibo,

wan tewal amo tikit.

24 Panok yey mestim,

wan kinawatik Yehudá,

kilik:

―Tamár mosiwamon motek ka oksek takam,

wan ashka ostitik ta'apaktik.

Kwakin Yehudá kinmili:

―Shihkishtik shikchichinok ma mik!

25 Kwah kikishtitiyaloya yewal tatitan pa kinawatiloskya nimontats:

“Nimishtahtani,

shikit akyewal niseyo kipi ikpal,

wan in bara,

yewal nishta'apawilti.”

26 Kimani Yehudá kinishmat wan kito:

“Yewal okichi kwal wan newal amokwal onikchi,

kampa amo nihnamikti inak nokon Selá.”

Wan amo'ik oksep omotek inak yewal.

27 O'as in tonat yewal takatiloskya,

wan katkaloya omente piltontim pa'itik yewal.

28 Kwah takatitiyaloya se kikishti nimahwa;

kwakin in siwatTapahti ki'ilpil se ikpal chichiltik pa nimahwa wan kito:

“In okis ta'ishpa.”

29 Oksep kikalakti nimahwa in piltonte,

kwakin okis ninohni.

Wan in siwatTapahti kito:

“Kina otikchi pa tikisaskya!”

Wan kitokayolti Perets.^a

30 Kwakin kis ninohni,

yewal kipiyaya ta'ilpil pa nimahwa in ikpal chichiltik,

wan kitokayoltik Séra.