Cholowaya Yakob kampa yahmo yeskya ka Labán
31
Kwah Yakob kimat kina Labán ininpilwam kililoya:
“Yakob ki'ishtikili totats mochi yewal ten tapiyaya,
wan mochi in yewal ashka tapi mokawili yewal niyashka totats.”
2 Kitaya Yakob,
kina amokwal kitaya Labán kina kwah o'as.
Génesis 31.1-55
3 Kwakin in WeTatsDyos kili Yakob:
“Shimokwep pa nital mowichalme wan monohniwan,
wan newal nimishpalewis wan niyes ka tewal.”
4 Kwakin tatake Yakob pa kinnotsaloskya Rakel wan Le'a pa in kwahmil kaha katkaloya in yolikilme,
5 kinmili:
―Nikit kina anmotats amokwal nichit ashka,
kina kwah nichitaya kwah oni'as.
Ma yok niDyos notats onka ka newal.
6 Anmehwante ankimatil kina niktikipanoli anmotats ka mochi nochikawaliste.
7 Wan anmotats onishkwaman,
onishkishtil notashtawaliste pa matahti,
yok nishchiwil.
Ma yok Dyos amo okimakawilti pa nishchiwilis ten amokwal.
8 Ta yewal kitowaya:
“In yolikilme tamahwilme yes motashtawaliste”,
kwakin mochi in yolikilme kintakatiltiloya tamahwilme;
wan ta yok kitowaya:
“Nimishtashtawilis ka in yolikilme tsehtsepestik yes motashtawaliste”,
kwakin mochi inik yolikilme kintakatiltiloya tsehtsepestik.
9 Yok Dyos kikishtil yolikilme anmotats wan onishmak newal.
10 “Pa se tonat kwah tatohtokaloya in yolikilme,
nikpi se tatemikiliste kampa nikinmitaya in toro' kintohtokatikatkaloya in chiba' katkaloya tapahwilme,
tamahwilme wan ta'ahwicholme.
11 Kwakin nitanawatilanhelDyos nishtakichil pa tatemikiliste,
nichili:
“Yakob!”
Newal nihnankili:
“Nika ni'onka.”
12 Wan kito:
“Shitachi wan shikit kampa mochi toro kintohtokal ka in tanichikolme tamahwilme wan tsehtsepestek.
Onikit kina mishchiwili Labán.
13 Newal niDyos yewal omoneshte ompa BetuEl,
kaha tikshawil moyEste in tet weyak yewal tihkets,
ompa otichil newal,
ashka shihka in tal shimokwep pa motal kaha otitakat.”
14 Kwakin Rakel wan Le'a kinankilik:
―Ayamo tikpiyal ka yewal nitakawaliste pa mochiten ka totats.
15 Yewal tichit kina amo otitakatik nika.
Otishnamak tehwante,
niyok okitam in yewal totashtawaliste.
16 Melak kampa mochi in Dyos okikishtil totats ka toyashka wan niyashka topilwam.
Ashka shikchi kina Dyos michili.
17 Kwakin Yakob okintal ininpilwam wan ininsiwam ipa kameyo',
18 wan okinpewalti mochi yolikilme tanichikolme.
Niyok okinwik mochi inik yewal okinonan ompa pa Padán-aram,
yok omokwep pa tal Kanán,
kaha katka nitats Itsak.
19 Kwah oy Labán okinshim niborrego',
Rakel kinishtek imono tachiwal ka tal ka nitats yewal katkaloya pa nikal.
20 Yakob kikwaman Labán in aramteko,
amo kinawat kwah panoti.
21 Kwakin panoti ka mochiten yewal tapiyaya wan panok in atenko Éprates.
Kwakin okonan ot pa talTepet Gile'ad.
Labán kitohtok Yakob
22 Panok yey tonatim,
oyak kilik Labán kaha yok cholowaya Yakob.
23 Kwakin Labán okinwik ka yewal ninihniwan pa oksek kalme wan kitohtokaya Yakob pa chikome tonatim wan oki'as pa tepetLom pa Gile'ad.
24 Kwakin moneshte Dyos ka Labán in aramteko pa tatemikiliste kili:
“Amoten shikil Yakob,
amo shihkwalanti!”
25 Yakob okital nikal tachiwali ka shashal tilawak pa tepetLom pa Gile'ad kwah ki'as Yakob,
wan Labán inak ninihniwan ompa niyok mokawak.
26 Kwakin Labán kili Yakob:
―Pates yok otikchi?
Tishkwahkwaman,
wan otikinwik nopilwaSiwam kina tatsakwalme.
27 Pates tichol kampa amo'ak kimatiskya wan tishkwahkwaman?
Pates amoten otichil?
Yok nimishtitaneskya pa mo'ot ka pakiliste wan ka tatsotsonaliste ka arpas?
28 Wan amo otinishmakawalti pa nikintenamikiskya nopilwam.
Otikchi kina se yewal amo mo'ilnamik kwal.
29 Newal nikpi chikawaliste pa nimishchiwilis takokoliste kampa nichili niDyos motats:
“Shimo'it pa amo'ik tikilis amoten Yakob!”
30 Ashka otimowik kampa hyero tihnek timokwepas pa nikal motats.
Ma yok,
pates otinishishtikil nomono'?
31 Yakob kinankili Labán:
―Nimomapti,
ompa nimo'il kampa tinishkishtiliskya mopilwam ka chikawaliste.
32 Ma yok,
tatikit se ka tehwante yewal kinpi modyose',
ma mik.
Ininishpa tonohniwan,
shitatem tewal ta tikit ten moyashka nika ka newal,
wan shikonan.
Yakob amo kimatiya kampa Rakel kinishtek in mono tachiwal ka tal.
33 Yok okalak Labán pa nikal Yakob niyok pa nikal Le'a wan okalak pa ininkal in ome tikipanolmeSiwam.
Amoten okit,
kwakin kwah okis pa nikal Le'a,
okalak pa nikal Rakel.
34 Kwah ayamo'ok asiyaya Labán pa nikal Rakel,
kintat pa nisiya ikameyo wan omotal ipa.
Labán tatemowaya pa in kal tachiwal ka shashal tilawak,
amoten okit.
35 Rakel kili nitats:
―Amo shikwalan tats,
amokwal nimoketsa mo'ishpa.
Nishastik nomeste.
Tatemo Labán wan amo okinmit in mono tachiwal ka tal.
36 Okwalan Yakob wan oki'ahwa Labán,
kitahtanili:
―Ten yewal amokwal onikchi?
Ten onimishchiwil pa yok tinishtohtokatiwal kaha niwal?
37 Ashka otitam otitatem pa mochi yewal noyashka.
Ten otikit yewal ka tewal pa mokal?
Shiktal nika ininishpa nonohniwan wan ma motishpawilik ka tewal wan newal.
38 Pa inik 20 shiwim ka tewal.
Amo ni se tamaya moborrego' wan mochiba' wan newal amo nikwa ni se moborrego' yewal katkaloya pa motanichikolme.
39 Amo'ik nimishwalikil moyolikilme yewal kati tekwanim pa kwawim kinmiktiyaya,
kampa nimishtashtawiliyaya yewal kati poliwiloya.
Wan nimishtashtawiliyaya newal ta nishishtikililoya pa tahka wan pa tayo.
40 Wan newal yok niyoliyaya kimani nimishtikipanoliyaya.
Pa tahka nitolnamikiyaya hyero tona katka,
wan pa inik yowalme hyero nisekwalowaya amo nikochiyaya.
41 Ma yok oniye pa in 20 shiwim kwah nikatka ka anmehwante pa mokal.
Onimishtikipanol 14 shiwim pa tinishmakaskya in omente mopilwam pa yeloskya nosiwam onimishtikipanoli chikwase shiwim pa motanichikolme ka yolikilme.
Wan tishkistil notashtawaliste ka matahti tashtawaliste.
42 Tats niDyos notats,
niDyos AbRaham,
wan notats Itsak,
ta yewal amo yeskya ka newal,
melak tewal tinishtakewaskya pa kiyawak mokal amo nikpiyaskya amoten.
Ma yok,
Dyos okit kina nimoyolkokotitikatka kina onitikipan miyak,
pa yowal omishahwa.
43 Labán kinankili Yakob:
―In siwam yehwante nopilwam,
inik ininpilwam kat nopilwam wan in yolikilme.
Mochi yewal tikit ka noyashka.
Ma yok,
ten wel nikchiwas ashka yehwante inik nopilwaSiwam wan nahyehwante in ininpilwam yewal kintakatiltik?
44 Aska shiwal,
ma timochiwilik se taketsaliste tewal wan newal,
wan ma ye kina se tachiwaliste ka taneshtiliste ka tehwante omente.
―Shikinnichikok tetelme!
Wan kinnichikok tetelme ompa takwak ipa in tetelme.
47 Labán okitokayolti Yegar Sahaduta wan Yakob okitokayolti Gile'ad.
48 Labán kito:
―Inik tanichikolme tetelme ka totahtol melawak ka tewal wan newal ashka.
―Ma kit in WeTatsDyos pa tewal wan newal kwah temosesemanaske se ka okse.
50 Ta amokwal tikinchiwil nopilwaSiwam ta tikinonan oksek siwam pa niyok yeske mosiwam,
kwakin amo'ak yes ka tehwante,
ma yok shikilnamik kampa Dyos okit mochi yewal ka tewal wan newal.
51 Niyok Labán kili Yakob:
―Shikit in tanichikolme nika ka in tetelme yewal nihkets,
pa tewal wan newal.
52 In tanichikol ka in tetelme,
wan in taneshtiliste pa yok tihmatiske in:
Newal amo nipanos in tanichikolme ka tetelme pa niyas ka tewal,
pa nimishchiwilis ten amokwal wan tewal amo tiyas kaha newal pa tinishchiwilis ten amokwal.
53 NiDyos AbRaham wan niDyos Nahor,
ininDyos inintahwan ma motishpawilik ka tehwante ta amo tikchiwak kina tikitok.
Yok kili melak Yakob pa i'ishpa Dyos,
kinotstikatka niDyos yewal nitats Itsak wan kimakasiyaya.
54 Yakob okital ompa se tatemakal pa in lom wan okinnots ninohniwan pa takwaloskya.
Kwakin kwah takwak,
panok ompa in yowal.
55 Mostatik kwalka kintenamiki Labán nikolinchim wan ininpilwaSiwam,
kinmashti.
Kwakin omokwek pa nikal.