―Shinishtakatilti nopilwam,

ma yok nimikis!

2 Yakob okwalan inak Rakel wan kili:

―Ten newal niDyos?

Wan yewal mishtsakwilitik pa amo tikinpiyas mopilwam!

3 Kwakin Rakel kito:

―Nika onka Bilha notikipanol.

Shimotek inak yewal pa yok yewal nishtakatiltis nopilwam kampa pa yewal,

newal yok nikinpiyas nopilwam.

4 Wan Rakel okimak Yakob nitikipanolSiwat Bilha pa yeskya nisiwa wan omotek inak yewal.

5 Bilha o'osti ta'apa wan okitakatilti se nikon Yakob.

6 Kwakin Rakel kito:

“Dyos onishmak notamawishtiliste wan onishkak kwah niktahtan se nokon takat.”

Kwakin okitokayolti Dan.

7 Rakel nitikipanolSiwat Bilha o'osti ta'apa oksep,

wan okitakatilti okse nikonTakat ka Yakob.

8 Kwakin Rakel kito:

“Kina miyak nimomikti ka nonohni Le'a wan ashka niktanil.”

Wan okitokayolti nikon Neptalí.

9 Kwah Le'a okimat kwah ayahmo kintakatiltiyaya ininpilwam,

kwakin okonan nitikipanolSiwat Silpa wan okimak Yakob pa yeskya nisiwa.

10 Wan Silpa nitikipanolSiwat Le'a okitakatilti se nikonTakat pa Yakob.

11 Wan Le'a kito:

“Dyos onishchiwil okse tachiwaliste kwal!”

Ashka nikpi okse!,

kwakin okitokayolti Gad.

12 Silpa nitikipanol Le'a okitakatilti Yakob okse nikonTakat.

13 Wan Le'a kito:

“Nikpi miyak pakiliste ka newal!

In siwam nichiliske newal nimo'itok Pakiliste.”

Wan okitokayolti Asher.

14 Se tonat kwah kipishkaloya trigo,

oy Rubén pa in kwahmil.

Okit mandragora' yewal kiwikil Le'a ninantsi.

Wan Rakel kili Le'a:

―Shinishmak sek mandragora' yewal kiwalik mokon.

15 Wan Le'a kili Rakel:

―Tewal otinishkishtil notaka,

wan ashka tihnek tinishkishtilis nimandragora' nokon?

Rakel kito:

―Ma tikchiwak se tahtoliste kampa ashka yewal pa in yowal kochi monak,

ta tinishmak sek mandragora'.

16 Katka pa kwahmil Yakob wan pa tyotak kwah walmokwep,

okinamik Le'a,

kili:

―Pa in yowal tikochi nonak,

kampa onitashta ka nimandragora' nokon yewal okiwalik.

Wan Yakob okoch ka Le'a.

17 Wan Dyos okikak yewal Le'a kitahtan,

wan Le'a o'osti ta'apa,

okitakatilti okse nikonTakat pa Yakob ka in nikon okintakatilti makwil ininpilwaTakam.

18 Kwakin Le'a kito:

“Dyos onishchiwil kwal ka in tashtawaliste kampa onihmak notikipanol pa yeskya nisiwa.”

Kwakin okitokayolti Isakar.

19 Le'a o'osti ta'apa oksep,

okitakatilti okse nikonTakat ka in katkaloya chikwase ininpilwam Yakob.

20 Kwakin Le'a kito:

“Dyos onishmak se temakaliste yewal kostaro.

Ka in nopilwam,

notaka nishmawishtilis kampa nikintakatilti chikwase ininpilwaTakam.”

Kwakin okitokayolti Sabulón.

21 Kwakin okitakatilti okse nikonSiwat wan okitokayolti Dína.

22 Kwakin Dyos ki'ilnamik Rakel,

okikak nitahtolme wan okimak pa kinpiyas ininpilwam.

23 Osti ta'apa wan okitakatilti se nikonTakat pa Yakob,

kito:

“Dyos onishkishtil nopinawiliste.”

24 Okitokayolti Yosé,

kitowaya:

“Nishmakaskya in WeTatsDyos okse nokonTakat.”

25 Panok tonatim kwah Rakel okitakatilti Yosé,

wan Yakob kili Laban:

―Shinishtake pa no'ot pa nimokwepas pa notal.

26 Shinishmak nosiwam wan nopilwam,

pa yehwante onimishtikipanoli,

wan yok nikonanas no'ot.

Wan tihmat kishki myak nimishtikipanoli.

27 Ma yok Labán kili:

―Nimishtahtani ka tamawishtiliste shimoka ka newal,

kampa nihmat ipa se taneshtiliste,

kampa in WeTatsDyos nishmashtitik ipa tewal.

28 Wan kili:

―Shinichil kishki tihnek nimishtashtawilis wan yok nimishmakas.

29 Yakob kinankili:

―Wan tihmat kina nitikipanowaya ka moyolikilme kina newal nikinkwitawiyaya.

30 Amoyok miyak titapiyaya kwah newal ayamo ni'asiyaya,

motachi miyak kwah ni'as,

wan in WeTatsDyos mishmashti.

Kimani ten nikchiwas pa nokal.

31 Wan Laban kitahtanili:

―Ten tihnek pa nimishmakas?

Yakob kinankili:

―Amoten shinishmak.

Ta tihnek ten tikchiwas pa newal shikchi kina nimishtahtanis wan newal oksep nikinkwitawis moborrego'.

32 Ashka nipanos pa mochi moyolikilme,

wan nikinonana moshte in borrego' tamahwilme wan ta'ahwicholme,

wan mochi borrego' tihtiltik,

wan in chiba' ta'ahwicholme,

moshte yehwante yeske notashtawaliste.

33 Kwah tihnekis tihmatis in notashtawaliste,

yok ta onka sek chibo' pa notanichikoliste yewal amo tamahwilme wan sek borrego' yewal amo tihtiltik,

kwakin yok tihmatis.

Kampa yok nimishta'ishtikilitik.

34 Kwakin Labán kito:

―Kwal onka yok kina tinichili.

35 Pa in tonat Labán kinonan mochi in chibo' tamahwilme wan tapahwilme wan in chiba' tamahwilme wan ta'ahwicholme',

wan kishki kipiyaloya tipit ihistak wan moshte in borrego' tihtiltik,

wan okinmak ininpilwam pa kinkwitawiloskya.

36 Kwakin kinwikak wEhka,

kaha amo yeskya Yakob.

Kinwikak kina pa yey tonatim pa ot,

wan Yakob omoka kinkwitapti in oksek niborrego' Labán.

37 Okonan Yakob kwawit pihpitsawak ka kapul wan wachalala wan amakwawit wan kinkishtil ininkashkar pa nesiskya ni'istak in kwawim.

38 Kwakin okintal in kwawitito ni'ishpa kaha walaloya takoniloya in yolikilme.

Wan yehwante motohtokaloya ni'ishpa kwawitito,

39 yok ta'apawaloya in borrego' i'ishpa in kwawim wan kinmishiwiltiloya borrego' tamahwilme wan tapahwilme wan ta'ahwicholme ka myak tapahwilme.

40 Kwakin Yakob okinonan wan kinkawaya i'ishpa yolikilme niktihtiltik wan tapahwilme pa nitanichikolme Laban.

Yok Yakob mokawiliti pa kipiyaskya isel nitanichikol amo kinnelowaya inak niborrego' Labán.

41 Kwah in yolikilme kwahkwalme tatohtokaloya,

Yakob kintaliyaya kwawim kaha takoniloya i'ishpa borrego' pa yok ta'apawaloskya kampa kitatiyaloskya kwawim.

42 Kwah walaloya in yolikilme amokwal nesiloya,

amo kintaliyaya ma yok,

in amo kwahkwalme mokawiliyaya Labán wan in kwahkwalme mokawiliyaya Yakob.

43 Yok oye in takat kina omochi ka myak mochiten.

Wan okinpi myak borrego' wan tikipanolmeSiwam,

tikipanolmeTakam,

kameyo' wan burro'.