Yakob okonan nitamashtiliste Itsak
27
Se tonat kwah kolinche katka Itsak yahmo tachiyaya.
Okinots pa walaskya Esa'ú nikon we kili:
―Nokon.
Kinankili Esa'ú:
―Nika ni'onka.
2 Itsak kili:
―Shichit ya nikolinche wan amo nihmat pa ten tonat nimikis.
Génesis 27.1-28.22
3 Ashka,
shikonan momit,
wan motawitol shi kaha tashosholtik shi shita'as pa newal.
4 Shinishyokshitil takwal kwal welik yok kina newal nihmat nikwa,
wan shinishwalikil pa nikwas.
Yok newal nimishmashtis kampa ayamo'ok nimiki.
5 Kwah Itsak tahtotikatka inak nikon Esa'ú Rebeka takaktikatka.
Wan Esa'ú oy pa tashosholtik pa ta'asiskya wan kiwalikaskya,
6 kwakin Rebeka oy otahto ka nikon Yakob wan kili:
―Onihkak motats tahtotikatka inak monohni Esa'ú
7 shita'as wan shinishwalikil shinishyokshitil pa newal nikwas.
Wan nimishmashti i'ishpa in WeTatsDyos kampa ayamo'ok nimiki.
8 Yok ashka,
nokon shinishkak kwal,
wan shikchi kina nimichilis.
9 Shi kampa kat in chibo' wan shinishwalikil ome chibito',
pa yok nikyokshitilis motats kina yewal kinek.
10 Kwakin tihwikilis motats pa kikwas pa yok yewal mishmashtis ashka kampa ayamo miki.
11 Yakob kili ninantsi Rebeka:
―Nonohni kipi miyak nitohmi wan newal amo nikpi notohmi.
12 Ta nishkitski notats,
kwakin tamatis kampa nihwetskilitik yewal,
kwakin nikchiwas pa amokwal nishyaptiyas wan yok amo nishmashtis.
13 Wan ninantsi kinankili:
―Nokon newal,
ma ye pa newal ten amokwal mishyas.
Shikchi kina nimichili.
Shinishwalikil in chibito'.
14 Yakob oy okinwalik chibito' wan okinwikil ninantsi,
wan yewal kinyokshit,
kina kimat kikwa Itsak.
15 Kwakin Rebeka okonan nishashalme Esa'ú nikon we,
nishashalme kwahkwalme yewal kipiyaya pa in kal,
wan ka yewal okitakemilti Yakob nikon tipichi.
16 Kipepechol nikwero chibito' pa nimahwam wan pa nikich Yakob kaha amo kipiyaya nitohmi.
17 Wan okimak pa nimahwam Yakob,
nikon,
in takwal wan in pan yewal okiyokshitil.
18 Kwakin Yakob oy okit nitats wan kili:
―Tats!
Itsak kinankili:
―Nika ni'onka.
Ak tewal,
nokon?
19 Yakob kili nitats:
―Newal ni'Esa'ú,
mokon we.
Onikchi kina tinichili.
Shimokets,
shimotal,
shitakwa yewal ten nita'as pa yok tishmashtis.
20 Itsak kili nikon:
―Kina haniman otikit,
nokon?
Yakob kinankili:
―Kampa in WeTatsDyos nishpale pa nikitaskya.
21 Itsak kili Yakob:
―Pa nikek shimochi nokon,
pa nimishkitski pa nihmati ta melak tewal nokon Esa'ú wan amo tewal.
22 Yakob motali ka Itsak,
nitats,
wan yewal kikitski wan kito:
―Nitahtoliste in Yakob.
Ma nimahwam kat kina Esa'ú.
23 Wan amo ki'ishmat kampa nimahwam kipiyaya nitohmi kina ninohni Esa'ú.
Yok okimashti
24 kitahtanili:
―Melak tewal nokon Esa'ú?
Yakob kinankili:
―Haha,
ninewal.
25 Kito niyok Itsak:
―Shinishwalikil mota'asil,
nokon pa nikwas,
pa nimishmashtis.
Wan Yakob okiwalikil wan otakwa nitats wan okiwalikil nihugoUbaBino,
wan okon.
26 Kwakin Itsak kili:
―Ashka,
nokon,
pa nikek shimochi,
wan shinishtenamik.
27 Yakob mo'asilti wan kitenamik.
Kimani Itsak kinehnekwi nishashalme,
kwakin kimashti:
“Shikit,
kina ahwiyak nokon
kina ahwiyak tashosholtik yewal in WeTatsDyos kimashti.
28 Yewal Dyos ma mishmak in ahwishti pa in ilwikak takpak;
wan miyak tapishkaliste pa in tal wan miyak trigo
wan miyak nihugoUbaBino.
29 Ma mishtikipanolik masewalme pa in pweblo;
wan ma motankwaketsak moshte pa in mochital pa mo'ishpa.
Shiye wetatakewan pa monohniwan;
wan pa mo'ishpa ma motankwaketsak ininpilwam monantsi.
Ma yek amokwal yehwante amokwal mishnotsilil.
Wan ma kinmashti yehwante kwal mishmashtil.”
30 Kimani otam Itsak okimashti Yakob,
wan anok kisaya Yakob pa i'ishpa nitats,
ninohni Esa'ú walmokwepaya pa in ta'astiliste.
31 Niyok yewal kiyokshitil kiwikil nitats wan kili:
―Shimotal,
tats,
wan shikwa in ten mokon ta'as,
pa tishmashtis.
32 Itsak,
nitats,
kili:
―Ak tewal?
Wan yewal kinankili:
―Ninewal Esa'ú,
mokon we.
33 Wan Itsak amo kimat ten kitoskya wan ka moyoyokaliste,
kito:
―Wan akyewal owal nika,
wan okiwalik nita'asil?
Wan onishmak takwaliste mochi in kwah ayamo'ok ti'asiyaya,
wan newal nihmashti,
wan kipi tamashtiliste.
34 Kwah Esa'ú okikak nitahtoliste nitats,
wehwe tsatsi wan miyak moyokolti kito:
―Shinishmashti niyok newal,
notats!
35 Kili Itsak:
―Owal monohni wan omishkwaman okonan motamashtiliste.
36 Esa'ú kinankili:
―Melak yewal kinek kili kina itok Yakob!
Yewal takwaman!
Onishkwahkwaman sehpa wan oksep!
Onishkishtil in yewal notakatiliste ta'ishpa wan ashka onishkishtil notamashtiliste!
Kwakin kitahtanili,
kili:
―Amo otinishkawil newal se tamashtiliste?
37 Itsak kinankili Esa'ú:
―Onikchi pa yewal yes mowetatakewan tewal wan oniktal pa moshte ninohniwan pa yeske inintikipanolme,
wan melak kipiyas miyak trigo wan nihugoUbaBino.
Ashka ten kwal nikchiwas pa tewal nokon?
38 Esa'ú kinankili nitats:
―Notats,
hanwel tikpi se han tamashtiliste?
Shinishmashti niyok newal,
notats!
“Yes mokal kaha takwak amo'ik tiyes pa in tal temak miyak tapishkaliste,
wan wEhka ka in ahwishti pa in ilwikak.
40 Ka momachet timopalewis,
wan tiktikipanoli monohni.
Kwah tichikawiyas kina se we,
kwakin yok timokishtilis ka yewal.”
Yakob cholowaya pa nikal Labán
41 Esa'ú hyero kikwalanil Yakob kampa nitats kimashti wan mo'ili pa niyol:
“Astiwalal in tonatim kwah tikchokiliske notats.
Kwakin nihmiktis nonohni Yakob.”
42 Wan Rebeka otakak kina Esa'ú kitowaya pa kichiwaskya,
kwakin otatitan pa kinotsaloskya Yakob nikon tipichi kili:
―Shikit monohni Esa'ú moyolseptik kampa tamatitik mishmikti.
43 Yok ashka shinishkak,
nokon,
shichol pa nikal nonohni Labán yewal mochanti pa Harán.
44 Shimochanti ompa sek tonatim,
pa kimani as moyolsewis monohni.
45 Kwah yahmo kwalantiyas monohni ka tewal,
kwah ki'ilkawas ten tikchiwil,
kwakin tiwalmokwepas.
Kampa amo nihnek annimishpolos anmehwante omente nopilwam pa se tonat?
46 Kwakin Rebeka kili Itsak:
―Amo niyoltik ka pakiliste,
kampa in siwam heteteko' yehwante mochantil nika pa in tal.
Ta Yakob omonamikti ka se siwat heteteko',
amo nihnek pa niyoltiyas!