3 Okitokayolti AbRaham nikonTakat Itsak,

in piltonte yewal okitakatilti Sara.

4 AbRaham kikotonil nikwerit kaha mashishal nikon Itsak kwah kipiyaya chikweyi tonatim,

yok kina Dyos kiliyaya.

5 Kimani otakat nikon Itsak AbRaham kipiyaya 100 shiwim.

6 Kwakin Sara kito:

“Dyos onishpakilti,

wan moshte yehwante kimatiske wetskaske ka newal.

7 Wan niyok kito:

Ak yok tamatiskya pa AbRaham kampa Sara kichichiltiskya se nikon?

Ma yok onihmak se nikon ya kolinche.”

8 Omo'apa Itsak wan yahmo kichichiltiloya.

Pa in tonat,

kwah Itsak yahmo chichiyaya okichi AbRaham se mitotiliste we.

9 Wan Sara okit kina nikon Hagar in egiptiya okitakatilti pa AbRaham kiwetskiliyaya Itsak.

10 Yok Kili AbRaham:

―Shihkishti in tikipanolSiwat wan nikonTakat!

Kampa nikonTakat in tikipanolSiwat amo kipiyas amoten ika nitakawaliste nokon Itsak.

11 Hyero tamat AbRaham kampa Yishma'El niyok katka nikon.

12 Ma yok Dyos kili AbRaham:

“Amo hyero shitamat ka in takatYankwik ka motikipanolSiwat.

Shihneltok Sara,

pa mochiten kina michilis kampa ika Itsak tikinpiyas myak mokolinchim.

13 Niyok nikchiwas pa nikon motikipanolSiwat se pweblo,

kampa mokon tewal.”

14 Mostatik,

tahtanesti AbRaham,

okimak ten pa kikwaloskya wan se kwero temi ka at,

okitalil pa niyahkwal.

Wan okimak piltonte okintake pa mowikaloskya.

Yok panoti Hagar nehnemtinem pa in tal BérSheba pa se tal kaha tawak.

15 Otam in at pa in kwero,

okital in piltonte itsinta se wiste.

16 Kwakin oy omotal wehkit,

kishki wEhka asiskya se mit:

“Amo nihnek nikitas in takatYankwik kimani mikis.”

Wan yowatikatka Hagar i'ishpa yewal,

Hagar wehwe walchok.

17 Dyos okikak kwah chokaya piltonte,

kwakin nitanawatilanhel Dyos okinots Hagar pa ilwikak wan kili:

“Ten mishpano,

Hagar?

Amo shimomapti,

kampa Dyos okikak nichokaliste piltonte.

18 Shimokets shikonan nimahwa mokon,

kampa newal nikchiwas pa yewal se Wepweblo.”

19 Wan Dyos ki'ishtapol nishtololwam Hagar,

wan okit se takoyonaliste ka at.

Kwakin oy wan okitemilti in kwero wan okikonilti piltonte.

20 Dyos katka inak piltonte,

wan in mo'apa;

wan omochanti pa se tal kaha tawak wan oye tamotaliste ka mit;

21 mochantiti pa se tal kaha tawak Paran kaha ninantsi okisiyawat ka se siwat pa in tal Egipto.

22 Pa inik tonatim AbiMélek,

oy inak Pikol,

yewal niwetatakewan igwacho',

oy otahto ka AbRaham wan kili:

―Dyos onka ka tewal pa mochi yewal ten tikchi.

23 Ashka shinichil,

pa i'ishpa Dyos,

pa amo tinishkwamana newal,

wan nopilwam wan nokolinchim.

Tewal amo otitakat nika kwakin shinishchiwil kwal pa in tal kina newal onimishchiwil.

24 AbRaham kinankili:

―Yok nikito pa i'ishpa Dyos.

25 Kwakin AbRaham ki'ahwa AbiMélek nahyewal nitakoyonaliste at yewal inintikipanolme AbiMélek kikishtilik.

26 AbiMélek kinankili:

―Amo nihmat ak yok okichi in.

Amoten otichil wan ashka nihmatitik.

27 Okinonan AbRaham baka' wan borrego',

okinmak AbiMélek wan in omente kichiwak se taketsaliste.

28 Wan AbRaham okinonan chikome borregito',

29 wan AbiMélek kitahtanili AbRaham:

―Pates tikinonan in chikome borregito'?

Ten kinek kitos?

30 Kinankili AbRaham:

―In kinek kito kampa nimishmakas in chikome borregito'.

Kampa yes kina se taneshtiliste kampa newal nitahtak nika pa nikitaskya at.

31 Kampa yok kitokayoltik ompa in tal BérSheba,

kampa ompa in omente mochiwilik se tahtoliste.

32 Ompa BérSheba kichiwak se tahtoliste.

AbiMélek wan Pikol,

niwetatakewan igwacho',

omokwepak pa inintal in peleshteko'.

33 AbRaham okitok se kwawit itok tamarisko' pa BérSheba wan ompa yewal okinots ni'itokaliste WeTatsDyos,

in Dyos amo'ik tami.

34 Wan AbRaham mochantiti myak shiwim ompa pa inintal in peleshteko'.