―Takam,

annimichilis,

shiwalak no'icha newal anmotikipanol.

Kampa anmopakaske anmoshiwam,

wan anpanoske in yowal kwakin yok mosta kwalka ankonanaske anmo'ot.

Yehwante kinankilik:

―Mishtasta.

Tipanoske in yowal kiyawak.

3 Lot kintahtani ka miyak chikawaliste pa mokawaloskya,

yehwante oyak inak yewal.

Kwah kalakik pa nikal.

Kinyokshitil se takwaliste kwal ika pan kati amo kipiyaya ka motapotsawalti,

wan yehwante otakwak.

4 Kwah ayamo'ok motekaloya pa kochiloskya,

inik takam pa in Wepweblo kiyawalok kal.

Ompa monichikok moshte takam pa Sodoma,

in yahyankwik wan moshte wehwe.

5 Kinotsak Lot kilik:

―Kampa kat in takam yewal asik mo'icha pa tyotak?

Shikinkishti pa kiyawak!

Pa yok timotekaske inak yehwante!

6 Okis Lot pa kiyawak pa tahtoskya inak yehwante,

haniman kitsakwa in tatapoli,

7 wan kinmili:

―Nonihnihwan nahnewal,

newal annimishtahtani amo shikchiwak in ten hyero amokwal.

8 Newal nikinpi ome nopilwaSiwam yehwante ayamo motekal ka takam;

annimishwalikili anmehwante wan shikinchiwilik kina ankinekil,

amo shikinkwesok in takam,

kampa kat no'icha kampa yehwante nikinkwitaptik pa amoten kinpanos.

9 Yehwante kinankilik:

―Shime!

Wan niyok mo'ilik:

―In se owal pa topweblo se yewal amo otakat nika,

wan ashka kinek niyok tishahwa.

Ashka timishchiwiliske hyero amoyok kina yehwante!

Wan kitopewaloya Lot wan monichikok pa kitopewaloskya in tatapoli.

10 Kwakin in pashalolme kikishtik ininmahwam,

wan kitilanak pa kalitik Lot ka yehwante kitsakwak in nitatapoli.

11 Wan inik takam yewal katkaloya pa tatapoli pa in kal moshte takam yahyankwik wan moshte wehwe amokwal kina tachiyaloskya,

wan yehwante kitemotinemil tatapoli wan osiyawik.

12 Kwakin in omente takam kilik Lot:

―Tikinpi oksek pa in Wepweblo' anmonohniwan?

AnmopilwaSiwam ka inintakam,

anmopilwaTakam,

mochiten tikpi pa in Wepweblo' shikinkishti wEhka,

13 kampa tehwante tikshitiniske in tal nahyehwante.

Kampa in WeTatsDyos,

kikaki kampa onka miyak ta'ihtakoliste.

Otishtake pa tikshitiniske.

14 Yok okis Lot wan okinnots ininimon,

inik yehwante monamiktiloskya ka ininpilwaSiwam wan kinmili:

―Shimoketsak!

Shikisak pa in Wepweblo,

kampa in WeTatsDyos kishitinis!

Wan ininimon tamatiloya kampa hanya han kitotikatka,

15 tahtanesti nitanawatilanhelme kilik Lot:

―Shimokets,

wan shikinwik mosiwa wan in omente mopilwasiwam,

yehwante nika kat,

pa amo anpoliwiske kwah Dyos kitamiltis in Wepweblo.

16 Yolikit mochiptikatka Lot pa kisaskya,

kwakin inik takam kinkitskik Lot pa nimahwam,

nisiwa wan in omente ininpilwaSiwam,

wan kinwikak pa wEhka in Wepweblo,

kinkishtitikatkaloya pa in polewiliste,

kampa in WeTatsDyos ki'ihniliyaya yewal.

17 Kwah kinkishtik,

kilik:

―Shimotal,

shimokishtil yoliliste,

pa amo anmishasi!

Amo shitachi pa takwitap wan amo shimokets pa in ishtawak.

Shicholok pa in tepetLom,

pa amo anpoliwiske!

18 Lot kinmili:

―Takam nahnewal,

nimishtamachi,

amo shinishchiwilik yok.

19 Newal anmotikipanol onikit kina annishchiwilik kwal,

kina annishkishtik pa in polewiliste ka noyoliliste.

Ma yok amokwal nicholos pa in talTepet,

in tashitiniliste nishasis wan nipolewis.

20 Shikit in Wepweblo,

amo wEhka onka wan tipichi!

Niyas ompa yok niyolis!

Kampa melak ta tipichi?

21 Wan yewal kinankili:

―Nimishchiwilis in yewal tinishtahtan.

Amo nikshitinis in Wepweblo tipichi yewal otinichil.

22 Shimo'isiwilti wan shimotal ompa,

kampa newal amokwal ten nikchiwas ta ayamo ti'asis ompa.

Kwakin okitokayolti in Wepweblo Tso'ar.

23 Kwah waltakis tonat ipa tal Lot o'as pa Tso'ar.

24 Kwakin in WeTatsDyos kiwaltitan pa in takpakIlwikak teshoshte wan asufre ipa Sodoma wan Gomora.

25 Wan kinshitin inik Wehwepweblo' wan mochi in ishtawak inak moshte yehwante ompa yoliloya pa in Wehwepweblo',

wan mochi kwawim takiloya pa in tal.

26 Wan nisiwa Lot otachi pa takwitap,

wan omoka kina se takopinal ka tet poshak ka istat.

27 Mostatik AbRaham omokets omokwep kaha takets pa i'ishpa WeTatsDyos.

28 Kwah otachi pa Sodoma wan Gomora,

pa mochital ishtawak,

okit kampa in tal popokatikatka,

katka kina ipohti se teshoshte hyero we.

29 Kwah Dyos kinshitini in Wehwepweblo' pa in ishtawak,

kaha Lot mochantiyaya ki'ilnamik AbRaham,

wan kikishti Lot pa kiyawak pa in tashitinililiste.

30 Tamakas Lot pa mokawaskya pa Tso'ar,

yok okis wan panoti pa talTepet.

Wan ompa omoka mochantiti pa se kweba inak in omente ininpilwaSiwam.

31 Se tonat,

nikonSiwat we kili ninohni tipichi:

―Totats ya we,

wan amo kat takam pa motekaske ka tehwante,

kina kichiwal moshte pa mochi kishki tal.

32 Ma tiktawantik totats ka nihugoUbaBino,

timotekaske inak yewal;

yok tikinpiyaske topilwam ka totats.

33 Pa in tayoway kimakak nihugoUbaBino nitats,

kitawantik wan nikonSiwat we okalak wan omotek ka nitats,

wan amo kimat Lot kwah omotek nikon wesiwat,

amo kimat kwah omokets.

34 Mostatik kili ninohniSiwat tipichi:

―Yalwa tayo onimotek inak notats.

Ma tihmakak nihugoUbaBino niyok pa in yowal,

pa ashka tewal tiyas timotekas inak yewal;

yok tikinpiyaske topilwam pa totats.

35 Pa in yowal niyok kimakak nihugoUbaBino intats,

wan nikonSiwat tipichi oy wan omotek inak yewal wan yewal amo kimat kimani omotek yewal,

pa kimani omokets.

36 Wan yok in omente ininpilwaSiwam ka Lot ta'ostiloya ta'apawak ka nitats.

37 In we nikonSiwat okipi se nikonTakat,

okitokayolti Mo'Ab,

yewal oye inintats mo'abteko'.

38 Niyok ninohniSiwat okitakatilti se nikonTakat,

wan okitokayolti Ben-amí,

yewal oye inintats Amoniteko'.