―Newal ninewal in Dyos chikawaliste.

Shiyolti hanse pa no'ishpa newal wan kwal shikchipti.

2 Newal nikchiwas se taketsaliste pa tewal,

wan nikchiwas pa momiyaptiske mokolinchim.

3 Kwakin motankwakets AbRam wan Dyos otahto inak yewal wan kili:

4 ―Ina yewal notaketsaliste nikchi ka tewal:

Tewal tiyes inintats pa myak masewalme.

5 Yahmo ti'itokas AbRam,

ashka timo'itokas AbRaham,

kampa onimishchi pa tiyes inintats myak masewalme.

6 Newal nikchiwas pa timomiyaptis pa tewal yeske myak tanichikolme ka masewalme wan yeske WeReye'.

7 Ka in taketsaliste yewal nikchi ka tewal wan ka mokolinchim,

ina yes se taketsaliste pa amo'ik tamis.

Wan newal niyes nimoDyos wan iniDyos mokolinchim.

8 Wan nimishmakas tewal wan mokolinchim,

mochital kampa ashka timochanti in tal Kanán,

kina se takawaliste pa hanse,

wan newal niyes ininDyos ka yehwante.

9 Dyos kili AbRaham:

―Tewal,

tikchiwas kina in taketsaliste,

wan moshte mokolinchim yehwante takatitiwalaske.

10 Ina yewal notaketsaliste nikchi ka anmehwante,

moshte takam pa anmehwante ankipiyaske pa anyeske takotonilme nikwerit kaha mashishal.^a

11 Anmehwante takam ankipiyaske pa yeske takotonilme nikwerit kaha mashishal,

kina nitaneshtiliste in taketsaliste ika tehwante.

12 Kwah monamikiske chikweyi tonatim,

yeske takotonilme nikwerit kaha mashishal moshte takam yehwante mochantilme ka anmehwante,

wan niyok yehwante anmokowilik ka anmotomi wan amo monotsalme.

13 Yeske takotonilme nikwerit kaha mashishal yehwante takatik pa anmokal,

wan yewal ankinkowak ka anmotomi,

notaketsaliste yes pa in nakat pa anmehwante yewal amo'ik tamis.

14 Kishki takam yewal amo yeske takotonilme nikwerit kaha mashishal,

ika anmehwante yok yehwante yahmo yeske pa anmopweblo',

kampa amo kimawishtilitikat notahtoliste.

15 Dyos niyok kili AbRaham:

―Mosiwa Saray,

amo tihnotsa Saray,

ashka mo'itokas Sara.

16 Newal nihmashtis,

wan niyok nimishmakas se nikon pa yewal.

Newal nihmashtis wan yewal yes ininnantsi pa myak tanichikoliste pa Wepweblo',

inik WeReye' wan inik pweblo' pa yewal takatiske.

17 Kwakin omotankwakets AbRaham pa tal,

wan okipakti wan omo'il pa niyol:

“Ten aso se takat yewal kipi 100 shiwim,

okitakatilti se nikon?

Wan aso kipiyas Sara se nikon yewal kipi 90 shiwim?”

18 AbRaham kili Dyos:

―Ta Yishma'El yoliskya pa mo'ishpa tewal!

19 Kinankili Dyos:

―Yewal ten nikito kampa in Sara mosiwa,

mishmakas se nikon,

wan tewal tiktokayoltis Itsak!

Wan melak niktalis notaketsaliste inak yewal kina se taketsaliste yewal amo'ik tamis pa nikolinchim,

yehwante takatitiwalaske.

20 Pa kishki Yishma'El,

niyok onimishkak.

Wan newal nihmashti,

wan nikchiwas pa momiyaptiske myak nikolinchim.

Yewal yes inintats pa 12 wehwetatakewalme.

Wan newal nikchiwilis pa mochiwas se Wepweblo.

21 Ma notaketsaliste niktalis pa Itsak,

in piltonte yewal Sara mishmakas kwah monamikiske pa inik tonatim,

pa okse shiwit.

22 Wan kimani Dyos otam otahto ka AbRaham,

opanoti.

23 Pa in se tonat okonan AbRaham nikon Yishma'El,

wan kikotonili nikwerit kaha mashishal,

wan moshte yehwante inintikipanolme takatilme pa nikal wan moshte yehwante omokowil ka nitomi;

in kinek kito,

ankipiyaske nakat takotonilme nikwerit kaha mashishal pa moshte takam yehwante mochantilme pa mokal,

yok kina Dyos kiliyaya.

24 AbRaham kipiyaya 99 shiwim kwah kikotonilik nikwerit kaha mashishal,

25 Yishma'El,

in ikon kipiyaya 13 shiwim kwah kikotonilik nikwerit kaha mashishal.

26 Ikon in Yishma'El yek takotonilil nikwerit kaha mashishal pa in se tonat

27 inak yewal yek takotonilme ininkwerit kaha mashishal moshte takam kishki katkaloya pa nikal,

yok kina inintikipanolme takatilme pa nikal yewal niyok takowalme katkaloya pa okse tal.