Kichiwak kal weyak pa Babel
11
Moshte takam pa mochital tahtoloya ka se tahtol.
2 Kwakin opanotiyak kaha kis tonat,
wan okitak se tal ishtawak pa Shinar,
ompa omokawak mochantitiyak.
3 Pa se tonat mo'ilik sek ka oksek:
“Toyak tikchiwak ladriyo,
wan tikinyokshitiske pa teshoshte.”
Yok kwakin kiteshmonekik tal tachichinol ladriyo amo kiteshmonekik tetelme,
wan niyok kiteshmonekik chapopote-tsakte amo kiteshmonekik tal tashakwalil.
4 Kwakin mo'ilik sek ka oksek:
“Ma tikchiwak se Wepweblo ka se kal takpak asis pa ilwikak.
Yok timochiwaske ka monotsaliste yok amo timosesemanaske pa mochital.”
5 Wan temo Dyos in WeTatsDyos pa kitaskya Wepweblo wan ka se kal takpak kampa takam kalchiptikatkaloya,
6 kito WeTatsDyos:
“Nika pweblo se han wan moshte kipiyal se han tahtol,
wan kipewaltik kalchiwaliste wan amoten kintsakwili kina tamatitikat.
7 Ma tiyak ma titemok pa tikinpololtiske inintahtolme,
yok amo kimatiske ten kinekiske kitoske.”
8 Yok kinsesemanalti WeTatsDyos pa mochital,
wan mokawak amo kichiwak Wepweblo.
9 Kampa yok kitokayoltik Babel,
kaha kintapololti Dyos inintahtol pa amo kimatiloskya mokakiloskya masewalme pa mochital.
Ompa kinsesemanalti Dyos moshte pa mochital.
Nikolinchim Shem
10 Inik nitapowaliste Shem:
Shem kipiyaya 100 shiwim,
okitakatilti Arpashad,
kwah panowaya ome shiwim kwah ye tapakyawaliste.
11 Kwah otakat Arpashad,
Shem yolti 500 shiwim,
wan okinpi oksek ininpilwaTakam wan ininpilwaSiwam.
12 Arpashad yolti 35 shiwim,
kwah okitakatilti Shelá.
13 Kwah otakat Shelá,
Arpashad yolti 403 shiwim,
wan okinpi oksek ininpilwaTakam wan ininpilwaSiwam.
14 Shelá yolti 30 shiwim,
kwah okitakatilti Heber.
15 Kwah otakat Heber,
yolti Shelá 403 shiwim,
wan okinpi oksek ininpilwaTakam wan ininpilwaSiwam.
16 Kwah Heber kipiyaya 34 shiwim,
kwah okitakatilti Péleg.
17 Kwah okitakatilti Péleg,
kwakin Heber yolti oksek 430 shiwim,
wan okinpi oksek ininpilwaTakam wan ininpilwaSiwam.
18 Péleg yolti 30 shiwim,
kwah okitakatilti Rehu.
19 Wan Péleg yolti 209 shiwim,
kwah okitakatilti Rehu,
wan okinpi oksek ininpilwaTakam wan ininpilwaSiwam.
20 Rehu yolti 32 shiwim,
kwah okitakatilti Serug.
21 Kwah otakat Serug,
Rehu kipiyaya 207 shiwim kwah okinpi oksek ininpilwaTakam wan ininpilwaSiwam.
22 Serug yolti 30 shiwim,
kwah okitakatilti Nahor.
23 Kwah otakat Nahor,
Serug kipiyaya 200 shiwim,
wan okinpi oksek ininpilwaTakam wan ininpilwaSiwam.
24 Nahor yolti 29 shiwim,
kwah okitakatilti Téra.
25 Kwah otakat Téra,
kipiyaya Nahor 119 shiwim kwah okinpi oksek ininpilwaTakam wan ininpilwaSiwam.
26 Téra yolti 70 shiwim,
kwah okitakatilti AbRam,
Nahor wan Harán.
Nikolinchim Téra
27 Inik nitapowaliste Téra.
Téra okintakatilti AbRam,
Nahor wan Harán.
Haran okitakatilti Lot,
28 wan omik Haran kimani ayamo mikiyaya nitats Téra pa tal kaha takatiyaya pa Ur inintal kaldeyo'.
29 Wan konanak AbRam wan Nahor ininsiwam AbRam nisiwa itoka Saray,
wan Nahor nisiwa itoka Milka,
nikonSiwat Harán,
nitats Milka wan Yiská.
30 Ma yok Saray amo kintakatiltiyaya piltontim.
31 Wan Téra okis pa Ur in pweblo ka Kaldeyo' pa yaloskya pa tal Kanán.
Wan okiwik nikon AbRam,
wan nikolinche Lot (nisobrin AbRam) wan Saray nisiwamon,
nisiwa AbRam nikon Téra.
Ma yok,
kwah asik pa in tal itoka Harán,
ompa mokawak mochantitiyak,
Génesis 11.31-12.20