8
Wan ki'ilnamik Dyos No'á wan mochi tekwanim yolil pa kwawim wan tekwanim yolil ka takam katkaloya inak yewal pa arka.
Okichi Dyos pa yehyekaskya ipa tal,
wan yok atim waktiyak.
2 Motsakwak atim wehwehkat niyok atim pa takpakIlwikak,
yahmo kyaptikatkaya.
3 Kwakin waktiyaya yolikit atim pa tal.
Pa 150 tonatim temowaya at.
4 Pa tonat 17 pa meste chikome omokets arka pa in talTepet itoka Ararat,
5 inik atim waktiyak kwah o'as pa matahti meste onesik inik talTepet.
6 Kwah opanok 40 tonatim ki'ishtap No'á tatapoli yewal okichi pa arka
7 wan kimaka se kakalot yawiya walaya,
pa kimani inik atim wakik ipa tal.
8 Niyok kimaka No'á se wilot,
pa kitaskya atim ta waktiyaya ipa tal.
9 Ma yok wilot walmokwep pa arka kampa amo okit kaha motaliskya,
kampa atim kitapachotikatka tal.
No'á kikishti nimahwa,
okonan wilot wan okikalakti pa arka.
10 Omochi chikome tonatim wan oksep okimaka wilot pa kiyawak.
11 Walmokwep wilot tamalinti tonat,
kiwalikaya se iswatonte pa nipiko ka kwawit itoka olibo,
kwakin kimat No'á kampa atim waktiyaya ipa tal.
12 Omochi oksep chikome tonatim wan okimaka oksep wilot,
yahmo walmokwep ka yewal.
13 Pa inik shiwim 601 kipiyaya No'á pa meste se in ta'ishpa tonat ka meste inik atim wakik ipa tal.
Wan kikishtili No'á tatsakwili ka kal wan okit kampa tal wak katka.
14 Wan pa tonat 27 pa ome meste,
wak katka mochital.
15 Kwakin Dyos kili No'á:
16 “Shikis pa arka tewal wan mosiwa,
mopilwam wan mosiwamonwam.
17 Shikinkishti moshte inik tekwanim kat ka tewal mochi kishki kipiyal yoliliste:
totom,
tekwanim yolil ka takam wan tekwanim mowilanal ipa tal.
Tikinkishtis ka tewal wan yaske pa mochital yok shimomiyaptik ipa tal!
Shikinpiyak myak anmopilwam!”
18 Kwakin okis No'á ka ininpilwam,
wan nisiwa wan nisiwamonwam.
19 Moshte inik tekwanim wan mochi inik mowilanal ipa tal wan mochi totom,
wan mochi yewal molinil ipa tal,
yok kina nesil sesen kisak pa arka.
20 Kwakin No'á okikets se tanichikol ka tetelme pa Dyos in WeTatsDyos,
wan kinonan sek tekwanim wan totom yewal Dyos okinmit chihchipawak kinchichinok kina tatamakal.
21 Kwah kinehnekwi Dyos in WeTatsDyos ahwiyaliste kina kwal ahwiyaya,
kwakin mo'ili:
“Amo'ik nihkwepas ten amokwal kiyaptiyas tal ka inintachiwaliste takam kampa ininyolme amo kwahkwalme pa kimani takatil pa kimani mikil,
amo'ik nihwalkwepas pa kinshitinis mochi kishki kipiyal yoliliste kina ashka onikchi.
22 ”Pa kishki tonatim yes tal,
hanse tonatim yes tatokaliste wan tapishkaliste,
in tonatim wan mestim ka sewaliste wan tonaliste,
tonalko wan sewalko,
wan niyok yeske tahka wan tayoway.”