7
Kwakin kili Dyos in WeTatsDyos No'á:
“Shikalakik pa arka tewal wan moshte kishki mochantil pa mokal,
kampa nimichit amo tikchiptik takokoliste amoyok nikinmit moshte in oksek yolil ashka.
2 Shikinwik ka tewal chikome tekwanim ka ohome kina sesen nesil;
takat wan siwat,
yehwante kinmit Dyos kina tekwanim amo chihchipawak,
se siwat wan se takat.
Génesis 7.1-9.17
3 Niyok totom pa takpakIlwikak chikome ka ohome se siwat se takat,
pa yoliske sesen kina nesil pa ipa tal.
4 Kimani panoske chikome tonatim,
nikchiwas tapakyawaliste pa mochital 40 tonatim wan 40 tayowalme,
wan nikshitinis mochital wan mochiten yolilme onikinchi.”
5 Yok okichi No'á kina kili Dyos in WeTatsDyos.
6 No'á kipiyaya 600 shiwim kwah wets tapakyawaliste ipa mochital.
7 Kalakik pa arka No'á wan nisiwa,
ininpilwam wan nisiwamonwam,
pa yok motsakwililoskya ka in tapakyawaliste.
8 Wan katkaloya tekwanim chihchipawak wan tekwanim amo chihchipawak,
wan ka inik patanilme wan mochiten mowilanal ipa tal,
9 ka ohome kalakik ka No'á pa arka,
se takat se siwat,
kina Dyos kili No'á.
10 Kimani panok chikome tonatim,
wets tapakyawaliste pa mochital.
11 Kimani No'á kipiyaya 600 shiwim,
katka tonat 17 pa ome meste,
yek ta'ishtapolilme in atim ka tatsakwaliste takpakIlwikak.
12 Wan ye tapakyawaliste ipa mochital 40 tonatim 40 tayowalme.
13 Pa in tonat kalakik pa arka No'á,
ka ininpilwam Shem,
Kam wan Yapet,
wan nisiwa wan niyok ininsiwamonwam.
14 Yehwante wan moshte tekwanim mochantil pa kwawim moshte tekwanim kintikipanolil takam,
wan mochiten mowilanal ipa tal,
wan mochi inik totom yok kina sesen nesil.
15 Walak ka No'á pa arka ka ohome mochi kishki kipiyaloya nakat ka ininihyo kipiyaloya yoliliste;
16 kalakiloya se takat wan se siwat kina sesen nesil,
kina Dyos kili No'á.
Kwakin Dyos in WeTatsDyos kitsakwa tatapoli.
17 Pa 40 tonatim tapakyapti ipa tal.
Inik atim tehkoti,
wan ki'ahkokti arka ipa tal.
18 Tehkoti inik atim wan mo'apakti ipa mochital,
wan mo'ahkok arka ipa wehwe atim.
19 Inik atim tehko ipa mochital,
wan mochi inik talTepet wehwe itsinta ilwikak kintapach.
20 Kwah kintapacho atim inik talTepet tehkok chikome metros wEhkat.
21 Wan mikik mochiten yoliloya ipa mochital:
totom,
tekwanim yolil ka takam wan tekwanim yolil pa kwawim,
wan mochiten mowilanaloya ipa tal,
wan moshte takam.
22 Mochiten mihyotiloya kipiyaloya yoliliste ka ininyakatsol wan mochiten katkaloya pa mochital mikik.
23 Yok ye tashitiniliste mochiten yolikilme pa mochital,
ka takam ka tekwanim,
inik mowilanalme wan inik totom pa takpakIlwikak.
Moshte oye tashitiniliste pa mochital.
Han omoka No'á wan inik katkaloya inak yewal pa arka.
24 Yok tapachoti tal ka atim pa 150 tonatim.