Yosé ninohniwan yal pa Egipto
42
Kwah Yakob kimat kampa pa Egipto,
katka takwal kwakin kinmili ininpilwam:
“Ten ankichiptikak kan,
pates anmo'itatikat ka anmehwante sek ka oksek?
2 Kampa nitakak yok pa Egipto onka takwaliste,
wan shiyak ompa wan shihkowak takwaliste pa tehwante,
pa amo timikiske,
pa yok tiyoliske.”
Génesis 42.1-38
3 Kwakin inik matahti ninohniwan Yosé yak pa Egipto kikowak trigo.
4 Ma yok Yakob amo kititan ka yehwante BenYamín,
ninohni Yosé,
kampa ma yok tamatiya pek ten kipanoskya pek ten amokwal.
5 Oyak ininpilwam Isra'El okikowak takwal,
niyok yaloya oksek,
kampa mayanaliste katka pa tal Kanán.
6 Wan Yosé reynarowaya pa Egipto,
yewal kinnamakiltiya trigo moshte yehwante pa mochi kishki tal.
Kwah asik Yosé ninohniwan,
motankwaketsak talpa.
7 Kwah kinmit Yosé ninohniwan,
haniman kinishmat;
ma yok,
omochi kina amo kinishmatiya,
wan kintakichili ka kwalaniliste;
kintahtanili:
―Wan anmehwante!,
kampa anwalal?
Kinankilik:
―Tiwalal pa tal Kanán,
pa timishkowiliske takwal.
8 Ma yok kinishmat Yosé,
yehwante amo ki'ishmatik.
9 Kwakin ki'ilnamik Yosé nitatemikiliste nahyehwante,
wan kinmili:
―Anmehwante anta'ispiyarotikat,
anwalal pa ankitaske kaha amo onka takwitawil total pa yok kwal ankishitiniske!
10 Yehwante kinankilil:
―Amoyok,
Tats!
In motikipanolme tewal,
walal kikowal takwal.
11 Moshte tehwante ininpilwam se takat kwal,
tehwante titakam kwahkwalme.
Amo tiwalal tita'ispiyarol!
12 Yosé kinmili:
―Amo melak!
Anwalal antachiyal kaha kwal kalakiske pa total ka anmogwacho' pa mo'onanaske.
13 Yehwante kinankilik:
―Tehwante,
motikipanolme,
titakatilme 12 ininpilwam,
pa se takat yewal mochanti pa tal Kanán.
In tipichi moka ka nitats,
wan in okse nikon yahmo yoltik.
14 Yosé kinmili:
―Yok kina annimichilis.
Amehwante anta'ispiyarotikat!
15 Wan ka in nihmati:
Nimishmak notahtoliste ka niyoliliste in para'ó,
wan amo kisaske nika kaha kat hanwel kwah walas monohni tipichi.
16 Shiktitanik se ka anmehwante pa kiwalikas monohni;
in oksek mokawaske tsaktiyaske kampa yok nihmati ta melak nichilitikat.
Ta amo annichilitikat melawak,
wan nimishmak notahtoliste ka niyoliliste in para'ó,
kampa anmehwante anta'ispiyarotikat!
―Ta ankinekil yoliske shikchiwak in kampa newal nimomapti pa i'ishpa Dyos.
19 Ta ankat takam kwahkwalme,
ma moka se anmonohni tsaktiyas wan in oksek ma mokwepak wan ma ankiwikak trigo pa yok antakwaske pa anmo'icha.
20 Shihwalikak anmonohni tipichi pa nihmatis ta ankitotikat melawak.
Wan yok amo anmikiske.
―Tehwante timokatsawaltik ka tonohni.
Moyolkokotikatkaya wan tishtahtaniyaya pa tikihnililoskya wan amo tihnekik tihkakik.
Kampa ashka tishpanotik in amokwal.
22 Rubén kinnankili:
―Amo annimichili pa amo kikatsawiltiloskya in takatYankwik,
wan amo ankinekik annishkakik.
Ashka monek pa titashtawaske kampa tihmiktik!
23 Yehwante amo kimatiloya kampa Yosé kimatiya kinkakiya,
kampa yewal kintakichiliyaya ka se takat tahtowaya hebreteko ka yehwante.
24 Yosé panoti oksela ka yehwante wan chokaya,
kwakin,
walmokwep pa tahtoskya ka yehwante,
wan ika ka yehwante kikitski Shime'ón pa i'ishpa moshte yehwante kitsakwak.
25 Kinmili Yosé ininwetatakewan pa nikal pa kintemiltililoskya inintamamal ka trigo,
wan pa kinkwepililoskya mochi sesen inintomi kintalilik pa sesen inintamamal,
wan kinmakaloskya takwaliste pa kikwaloskya pa ot.
Wan yok kichiwak.
26 Kwakin yehwante kintamamaltilik ininburro' ka trigo wan mokwepak.
27 Asik ompa kaha panoloskya in yowal se ka yehwante kitapo nitamamal pa kitamakaskya niburro,
wan okit nitomi pa ikamak nitamamal!
28 Kinmili ninohniwan:
―Nishkwepilik notomi!
Shikitak,
nika onka,
pa nokostal!
Wan hyero moyoyokatikatkaloya,
mo'ililoya sek ka oksek:
―Ten yewal Dyos tishchiwilitik?
29 Asik pa ikal itats Yakob pa in tal Kanán,
kitakichilik ten kinpanowaya,
wan kilik:
30 ―In takat tahto ka tehwante ka kwalaniliste pa mochital tichiliyaya kampa tikatkaloya kina ta'ishpiyaroliste.
31 Wan tikitok:
“Tehwante titakam kwahkwalme.
Amo tikat takam ta'ispiyaroliste.”
32 “Tikat 12 tinohniwan,
ininpilwam totats.
Se amo yoltik,
wan tonohni tipichi onka ka totats pa Kanán.”
33 ’Kwakin in takat yewal niwetatakewan in tal tichili:
“Ashka nihmati ta anmehwante ankat takam kwahkwalme:
Shihkawak se anmonohni,
ka newal wan shiyak shihwikak takwaliste pa amo mayanaske pa anmokal.
34 Shinishwalikilik anmonohni tipichi ka newal.
Pa yok nihmati kampa amo ta'ispiyarotikat kampa ta melak kat takam kwahkwalme.
Kwakin annimishkwepili anmonohni,
wan annimishmakawalti pa antakowaske wan antanamakaske pa mochital.”
35 Kwah kinokiloya inintamamal,
ninohniwan Yosé kitak pa sesen inintamamal katka inintomi yehwante.
Kwah yehwante wan nitats kitak inintomi,
hyero momaptik.
36 Kwakin Yakob kinmili:
―Anmehwante annishkistiliske mochi nopilwam!
Yosé yahmo onka ka tehwante,
niyok Shime'ón,
wan ashka ankinekil ankiwikaske BenYamín!
Mochi inik tachiwaliste wetsil nopa newal!
37 Kwakin Rubén kili nitats:
―Tikinmikti in omente nopilwam ta amo nimishwalkwepil BenYamín.
Shinishkawil kampa newal nihkwitawis wan nimishwalkwepilis.
38 Yakob kili:
―Nokon amo yas ka anmehwante!
Kampa omik ninohni,
wan yewal han moka.
Ta ten okipan pa ot yewal kampa yal,
kwakin anmehwante ankipiyaske teshpawiliste kampa nimikis pa nimoyolkokos nitemos pa She'ola kaha kat mihmihke.