Itatemikiliste para'ó
41
Yok panok ome shiwim,
wan se yowal tatemiki para'ó:
Omo'it moketstikatka itenko atenko Nilo
2 okit kampa,
kisaloya pa atenko chikome baka' wan tohtomawak kikwatikatkaloya sakat.
Génesis 41.1-57
3 Haniman takwitap yehwante kisak oksek chikome baka',
pa atenko Nilo pihpitsawak wan hyero nesiloya,
moketsak itenko atenko Nilo,
nahyehwante baka' kwal nesiloya.
4 Wan in baka' pihpitsawak wan hyero nesiloya kinkwaloya in chikome baka' kwahkwalme wan tohtomawak!
Haniman para'ó wal o'is.
5 Oksep walkoch para'ó,
wan oksep tatemiki:
Kinmit chikome trigo,
wehwe wan kwahkwalme,
mo'apawaloya myak pa se nitankwa.
6 Wan haniman kisaloya oksek chikome trigo,
pihpitsawak kwihkwitanki kampa walyehyekaya kaha walkis tonat.
7 Wan in chikome trigo pihpitsawak kinkwaloya in chikome trigo kwal nesiloya!
Temtikatkaloya ka trigo wan o'is para'ó amo kimatiya ten kinek kitoskya nitatemikiliste.
8 Watsinko,
amokwal nesiya hyero tamatiya yok kina tatemikiyaya,
kwakin tatake pa walaloskya moshte in tashoshanilme wan in takam kimatiloya ten panoskya pa in Egipto,
kintakichili nitatemikiliste.
Ma yok amo'ak kinawatiyaya ten kinek kitoskya.
9 Kwakin in wetatakewan kopero wan kili para'ó:
“Ashka nikilnamik ten yewal amokwal nikchi.
10 Se tonat kwah kwalan para'ó ka inintikipanolme,
wan otishtsakwa newal wan niyok in wetatakewan panadero',
pa nikal in wetatakewan gwacho'.
11 Pa se yowal,
titatemikik moshte omente,
ka sesen tehwante tikpiyaloya se ka okse tatemikiliste.
12 Katka ompa se takatYankwik se hebreteko,
katka ka tehwante,
nitikipanol in wetatakewan gwacho'.
Tiktakichilik totatemikiliste,
wan yewal tichili ten kinek kitoskya.
13 Wan yok motachi yok kina otichil!
Newal nishtalik oksep kaha notikipanol,
wan in okse kisalok.”
14 Kwakin tatake para'ó pa kiwalikaloskya Yosé,
hanimam kikishtik kampa tsaktikatka.
Kwakin moshim wan malti yok motakemilti okse nishashal,
wan yok oy ka para'ó,
15 para'ó kili Yosé:
―Nikpi se tatemikiliste amo onka amo'ak nishnawatis.
Kampa nitakak kwah tewal tihkak se tatemikiliste,
tihmat ten kinek kitos.
16 Yosé kinankili para'ó:
―Ma yok amo pa newal onka,
Dyos kimakas para'ó se tanankiliste kwal.
17 Kwakin para'ó kili Yosé:
―Pa notatemikiliste,
onimo'it nimoketstikatka pa itenko in atenko Nilo.
18 Pa in atenko walkisaloya chikome baka' hyero tohtomawak wan kwal nesiloya,
takwatikatkaloya sakat pa itenko in atenko.
19 Haniman takwitapit ka yehwante kisaloya oksek chikome baka' pihpitsawak hyero nesiloya.
Yok amo'ik nikinmitaya baka' hyero nesiloya pa in tal Egipto!
20 Kwakin in baka' pihpitsawak hyero nesiloya,
kinkwaloya in chikome baka' yehwante tohtomawak.
21 Ma yok,
kwah tamik kinkwak,
nesiloya han amoten kikwaloya,
yok han pihpitsawak katkaloya hyero nesiloya.
Kwakin niwal is.
22 “Nikpi okse tatemikiliste:
Niyok pa notatemikiliste nikinmit chikome miyawalme trigo,
temtikatkaloya ka trigo kwal nesiloya mo'apawaloya pa se nitankwa.
23 Haniman takwitapit kisak oksek chikome miyawalme katkaloya kwihkwitanki,
tachichinolme kampa yehyekaya totonki kampa walkis in tonat.
24 Wan in miyawalme pihpitsawak kinkwaloya in chikome miyawalme kwal nesiloya.
Nikintakichili in tashoshanilme,
wan amo'ak kimat ten kinek kitos.”
25 Kwakin Yosé kinankili para'ó:
―Melawak,
in ome nitatemikiliste para'ó onka pa se.
Dyos kinawati ten kinek kichiwas.
26 In chikome baka' kwal nesiloya chikome shiwim.
Wan in chikome miyawalme kwal nesiloya niyok chikome shiwim.
Inik tatemikiliste in pa se han.
27 Inik chikome baka' pihpitsawak wan hyero nesiloya,
yewal takwitapit waltakisaloya ka yehwante,
chikome shiwim wan niyok in chikome miyawalme pihpitsawak wan tachichinolme ka yehyekat totonki kaha takis tonat yok yeske chikome shiwim ka mayanaliste.
28 Yok nihnankili para'ó,
Dyos kineshtili ten para'ó ten kichiwas.
29 Walaske chikome shiwim kwah moshte tapishkaske miyak pa mochi in tal Egipto,
30 kwakin walaske chikome shiwim ka mayanaliste,
wan ki'ilkawaske mochi in miyak tapishkaliste yewal katka.
Kwakin in mayanaliste kishitinis in tal!
31 Kampa yes miyak mayanaliste,
yahmo ki'ilnamikiske in miyak tapishkaliste.
32 Wan para'ó kipi ohpa tatemikiliste kampa melak Dyos yok kichiwas,
amo wehkAwas pa yok motachiwas.
33 “Ashka,
ma kitem para'ó se takat kimat hani motanishtili,
se takat yewal hanse tonatim kimatitiyas ten monek pa kichiwas,
wan shiktal ipa mochi in tal Egipto.
34 Ma kintal para'ó wetakwitawilme ma yak pa mochital Egipto,
ma konanak pa sesen makwil kostal se han ka in tapishkaliste kwah yeske in chikome shiwim ka miyak tapishkaliste.
35 Monek pa ankinichikoske mochi in trigo wan oksek shinashte pa inik shiwim ka miyak tapishkaliste shihwikak pa nichahpilme para'ó wan shikahkokik pa kishki Wehwepweblo',
ka kintamakaske masewalme.
36 Kampa yewal ta'ahkokil yes ten kikwaske pa mochital pa kwah asiske inik chikome shiwim ka mayanaliste,
pa yok in masewalme amo mikiske ka mayanaliste.”
37 Yok para'ó kwal kikak nitahtol Yosé wan moshte inik tikipanolme wetatakewalme.
38 Wan para'ó kintahtanili:
―Aso tikitaske okse takat kina yewal,
kipi pa'itik ni'Espíritu Dyos?
39 Yok para'ó kili Yosé:
―Dyos mishmashti mochi in,
se takat kimat hani motanishtili amo onka okse yok kina tewal,
se takat yewal hanse tonatim kimatitiya ten monek pa kichiwas.
40 Nimishtalis niwetatakewan nokal wan moshte masewalme mishmawishtilitiyaske,
pa mochiten tikintakiptiyas.
Tewal tikpiyas chikawaliste,
hanwel newal nikpiyas we chikawaliste ipa tewal,
kampa newal niwerey.
Yosé wetatakewan ipa mochital Egipto
41 Wan niyok para'ó kili Yosé:
―Nimishtali niwetatakewan ipa mochital Egipto.
42 Kwakin para'ó mokishtil ni'aniyo yewal kiwikaya wan okitalil Yosé.
Kitakemilti ka takemtel tachiwal ka lino,
wan kitalil se koskat tachiwal ka oro.
43 Wan Yosé kitehkolti pa se yawaltik tatilanal ka kabayo' yewal takwitap kitokatiwalaya yewal wan yok tatake pa tsatsiloskya:
“Shimotankwaketsak!”
Yok para'ó kitali ipa mochital Egipto.
44 Wan para'ó kili Yosé:
―Newal nipara'ó,
amo'ak pa mochi Egipto ki'olini nimahwa wan niyok nitankwa,
ta tewal amo tikinmakawalti.
45 Para'ó kitokayolti Yosé,
Tsapenat-panéha;
wan kimak Asenat,
nikonSiwat Potipera,
totats in On pa yeskya nisiwa Yosé.
Wan nehnemtinem Yosé ipa mochital Egipto.
46 Kipiyaya Yosé 30 shiwim kwah kiwikak ka para'ó,
in weRey pa Egipto.
Wan okis Yosé kaha katka para'ó,
wan nehnemtinem pa mochital Egipto.
47 Pa in chikome shiwim ye miyak tapishkaliste,
48 kinichiko Yosé mochi in tapishkaliste pa in chikome shiwim,
kimani tapishkaloya miyak wan ki'ahkokiloya tapishkaliste pa in kwahmilme kitaliyaya pa inik Wehwepweblo' yewal amo katkaloya wEhka kampa katkaloya in kwahmilme.
49 Ki'ahkoki Yosé miyak trigo,
yok kina shal pa itenko in we'at.
Kampa amokwal kina kipowaloskya!
50 Pa in tonatim kwah astiwalaloya in shiwim kampa yeskya in mayanaliste,
Yosé nisiwa Asenat,
okintakatilti ome ininpilwaTakam Asenat ye nikonSiwat Potipera in totats On.
51 Yosé nikon yewal okitakatilti ta'ishpa kitokayolti Manashé,
kampa kito:
“Niktokayolti yok kampa Dyos nishilkawilti mochi noyolkokoliste yewal nipan,
wan moshte pa nikal notats.”
52 Okse nikon okitokayolti Eprayím,
wan kito:
“Kampa Dyos nishneshti kina se kwawit kimat taki pa in tal kampa newal onipan noyolkokoliste.”
53 Kwakin tamik in chikome shiwim ka miyak tapishkaliste pa in tal Egipto
54 kwakin asiyaya in chikome shiwim ka mayanaliste,
kina kinmili Yosé.
Katka mayanaliste pa mochital ma yok pa in tal Egipto katka pan.
55 Kwah moshte yehwante pa Egipto mayanak,
in masewalme kitsatsilik para'ó pa kinmakaskya ten kikwaloskya.
Wan para'ó kinmili moshte in egiptiyo':
“Shiyak ka Yosé wan shikchiwak kina anmichili.”
56 Wan kimani o'as in mayanaliste pa mochi in tal,
kwakin kintapo Yosé in kalme kaha kinahkokiloya in trigo wan kinnamakilti in egiptiyo' kampa katka miyak mayanaliste pa Egipto.
57 Wan pa mochi in oksek talme walak pa Egipto pa kikowililoskya trigo Yosé,
kampa katka miyak mayanaliste pa mochi kishki tal.