Kuyene ku na ku ci neke wuma
22
A ayin a na kalingata ka ko yotsongi mu likuci i savu,
ɗa u yotsongi mu kuɗolu ku na ki m mini ma na me ci neke wuma.
Ku ɗa a kutasa an mindatsu ma na a urai ferere e kene ugboku u re dem.
Ku ɗa e kuyene a̱ kuta̱ a kakuba ko tsugono a̱ ubuta̱ u na Ka̱shile ki ida̱shi m Ma̱giri.
2 Ku ɗa e kuyene kpamu e mere ma baya vi likuci va.
Nɗanga n na n tsu matsa umaci n a̱bunda̱i u na u ci neke wuma m gbonguroi a apashi e re dem o kuɗolu ka.
A tsu matsa ta̱ ali kupa n kure a̱ ka̱ya̱,
na lo ɗaɗa kute dem o wotoi.
Uma a aduniyan a ci yaꞋanka ta̱ a̱vuku e le a̱guma̱.
3 Babu ili i na Ka̱shile ka yaꞋankai una̱ u gbani-gbani i kufuɗa ya shamgba punu a̱ likuci ya.
Kakuba ko tsugono a̱ ubuta̱ u na Ka̱shile ki ida̱shi m Ma̱giri ma ta punu ki a̱ likuci ya,
ka̱ta̱ agbashi a̱ ni a yaꞋanka yi tsugbashi.
4 I ta̱ e kene a̱shi a̱ Ka̱shile ka̱ta̱ u ɗana kula ku ni a̱ a̱ca̱n e le.
5 Kayin ko kudoku ka yaꞋan kpamu ba.
A kuciga kutashi ku ma̱kuni ko ku kanna ba,
adama a na Vuzavaguɗu Ka̱shile wi ta̱ e kuneke le kutashi.
Ka̱ta̱ a lyaꞋa tsugono ali ayin a babu uteku.
Kuta̱wa̱ ku Yesu
6 Ɗa kalingata ka danai mu,
“Kadanshi ka nam pa mayun ɗa ki ta̱ kpamu kuzuwaka utsura.
Ɗa Vuzavaguɗu Ka̱shile,
vuza na u ci neke eneki Ayinviki a̱ ni,
u suku ta̱ ɗe kalingata ko yotsongu agbashi a̱ ni ili i na i kuta̱wa̱ babu megeshe.”
7 Yesu u danai,
“A̱ɗa̱ panai!
Mi ta̱ lo o kubono gogoꞋo.
“Katagarda ka nam pa ka dana tsu ta̱ ili n a̱bunda̱i adama a ili i na yi lo a̱ kuta̱wa̱ m megeshe ba.
Ka̱shile ki ta̱ a kuzuwaka uma una̱singai aza a na o tonoi ili i nam pa ya.”
8 Mpa ɗa Yahaya,
vuza na u panai ɗa kpamu we enei ili i nam pa ya n a̱shi a̱ va̱.
Ana n kotsoi kupana n kene le ra̱ka̱,
ɗa n kuɗa̱ngi e kelime ka kalingata ka na ko yotsongi mu ili i nam pa ya adama a na n lyaꞋaka yi kayala.
9 Amma ɗa u danai mu,
“A̱Ꞌa̱!
Ka̱ta̱ vu lyaꞋaka mu kayala ba!
Mpa kagbashi kaꞋa tsu nu,
n aza a̱ nu eneki,
koɓolo n aza a na o tonoi kadanshi ka na ki punu a katagarda ka nam pa.
Cikpa Ka̱shile!”
10 Ɗa u danai mu,
“Ka̱ta̱ i kpada uma kuyeve ili i na a danai a katagarda ka nam pa a ukuna wi ili i na i kuta̱wa̱ gogo na m megeshe kpamu ba.
A ayin a na ili i nam pa i kuyaꞋan i ta̱ lo a̱ kuta̱wa̱ gogoꞋo.
11 Sai ayin a nan lo a yawai,
uma a na i a kuyaꞋan kagbani-gbani i ta̱ a kulyaꞋa kelime n kuyaꞋan,
uma a na kpamu i a kuyaꞋan ili i wono a lyaꞋa kelime n kuyaꞋan ili i nan lo.
Aza a na kpamu i a kuyaꞋan kasingai a lyaꞋa kelime n kuyaꞋan,
aza a na kpamu i ciɗa a suma kuyaꞋan kagbani-gbani.”
12 Yesu u danai kpamu,
“A̱ɗa̱ panai!
Mi ta̱ o kubono babu megeshe.
Mi ta̱ o kubono adama a na ko n neke uma dem katsupu ko n neke le atakaci adama a ili i na a yaꞋin.
13 N zuwa ta̱ ili ra̱ka̱ i yaꞋan,
ɗa n zuwai ili ra̱ka̱ a kubana uteku.
Mpa ɗa Alfa n Omega.
Ɗaɗa feu,
mpa ɗa Ugiti n Ukocishi.
14 “Ka̱shile ki ta̱ a kuzuwaka aza a na a̱ za̱Ꞌi aminya e le ciɗa una̱singai,
adama a nannai a fuɗa a lyaꞋa umaci wu nɗanga n na n ci neke wuma ka̱ta̱ a fuɗa a wala n utsutsu wa ali a uwa a̱ likuci ya.
15 Amma i ta̱ a̱ kusa̱nka̱ uma a nam pa kuꞋuwa a̱ likuci ya:
aza a na o bonokoi ka̱ci ke le ɗe ili yi nshinda̱ n unushi u na a yaꞋin,
koɓolo n aza a na a yaꞋin nkunu,
n aza a tsugbani,
n aza a̱ ma̱ga̱la̱ka̱,
n aza a na i o kutono a̱ma̱li,
koɓolo n yaba dem vu na u tsu dansa aꞋuwa.
16 “Mpa Yesu,
n suku ta̱ kalingata ka̱ va̱ ke neke ɗa̱ akaka a kubana wa aza o Kutoni n a̱bunda̱i.
Mpa ɗa akaya m matsukaya o Mogono Dawuda.
Mpa ɗa Kazangata ka na ka tsa akana m kpasani.”
17 Ayinviki a̱ Ka̱shile n vuka vu savu va a danai,
“Ta̱wa̱!”
Vuza na u panai dem u dana,
“Ta̱wa̱!”
Vuza na dem wi n kakuli,
ka̱sa̱kpa̱ u ta̱wa̱,
vuza na kpamu u cigai ka̱sa̱kpa̱i ni u ɗika kuneꞋe ku gbani ku mini ma wuma.
Kukotsoso
18 Mpa,
Yahaya,
n ronoi atsuvu a yaba dem n utsura,
vuza na u panai akaka a ukuna wi ili i na yi a nwalu gogo na,
koɓolo n i na kpamu yi lo a̱ kuta̱wa̱ tsu na n ɗanai a katagarda ka nam pa:
Vuza na baci u doki punu ili a̱ ubuta̱ wa akaka a nam pa,
Ka̱shile ki ta̱ o kudoku yi atakaci.
Wi ta̱ a kuyaꞋanka yi atakaci nu ndukpa̱ n cindere n na n yaꞋin kadanshi ke le punu a katagarda ka nam pa.
19 Vuza na baci u takpai ili punu a̱ ubuta̱ wa akaka a katagarda ka nam pa,
Ka̱shile ki ta̱ a̱ kusa̱nka̱ yi kuciya̱ una̱singai u na a yaꞋin kadanshi punu a katagarda ka nam pa.
Ka̱shile ki ta̱ feu a̱ kusa̱nka̱ yi kulyaꞋa umaci u maɗanga ma na me ci neke wuma,
ka̱ta̱ a̱yi Ka̱shile u sa̱nka̱ vuma vu nan lo kuyongo a likuci i ciɗa ya.
20 Yesu,
vuza na u danai ili i nam pa ya mayun ɗa,
u danai,
“E,
kuta̱wa̱ ku va̱ ki m megeshe ba.”
Ta nannai.
Ta̱wa̱ u Vuzagbayin Yesu!
21 YaꞋan Vuzagbayin Yesu u yotsongu ɗa̱ ra̱ka̱ kasingai ka̱ ni ka gbayin.
Ta nannai.