Unai Babila
18
Ana kene ku ukuna u vuka vu na vu kumbai ka̱di ka ku lazai,
ɗa me enei kalingata ko yoku a̱ kucipa̱.
Wi ta̱ kpamu n utsura n kutashi ka̱ a̱bunda̱i a̱ kuta̱ punu wa̱ ni,
ɗa ka akanai aduniyan.
2 Ɗa u salai n utsura:
“Likuci i gbayin i Babila i yikpa̱ ta̱.
Uma a buwa punu a̱ ida̱shi ba,
saidei wunla̱i u gbani-gbani u ɗa wi punu kakau.
Koɓolo nu nnu mu unata kakau n ɗa mi punu o kuyongo.
3 Aduniyan ra̱ka̱ o soꞋo ta̱ ma̱kya̱n ma̱ ni ɗa ma makai le,
ma̱kya̱n ma,
ma ɗaɗa kuciga kuyaꞋan tsugbani n a̱yi.
Ngono ma aduniyan dem n yaꞋan ta̱ tsugbani n a̱yi,
ɗa aza a tsulaga dem a̱ ciya̱i ikebe n a̱bunda̱i
adama a na wi ta̱ a kuciga ili n a̱bunda̱i.”
4 Ɗa kpamu m panai ka̱la̱ka̱tsu ko yoku gaɗi a kudana:
“Uta̱i punu a̱ likuci i nan lo ya,
uma a̱ va̱,
adama a na yo okpo aza a unushi uteku ci ni ba,
adama a na ta lo ya kisa atakaci a na e kuneke yi.
5 Unushi u ni wo okpo ta̱ an kaginda ka gbayin
ka na ka yawai ugaɗi ali a̱ Ka̱shile.
Ka̱shile kpamu ka cinukpa n unushi u na u yaꞋansai ba.
6 I yaꞋanka Babila atakaci
uteku u na u yaꞋankai uma a na a buwai.
Mayun sai a tsupa yi nannai ali kure tsu na u yaꞋin.
Sai i tsuwa̱nka̱ yi m ma̱kya̱n a mataꞋan ma̱ ni
ma na ma yawai kure utsura tsu na u nekei uma.
7 U neke ta̱ ka̱ci ka̱ ni tsugbayin
ɗa u ciya̱i ili i na wi a kuciga dem.
Nekei ni atakaci n a̱bunda̱i koɓolo n una̱mgbuka̱tsuma̱.
Ɗa kpamu u cikpai ka̱ci ka̱ ni u danai,
‘N da̱sa̱ngu ta̱ na,
mpa vuka ɗa mi a kulyaꞋa tsugono.
Mi n vali vu na va̱ kukuwa̱ mu ba,
adama a nannai mi kushika̱ adama a̱ ni ba.’
8 Adama a na vuka va vi yaꞋan ta̱ a̱ra̱ɗi tsu nam pa,
u buwa m megeshe ba,
a na e kuneke yi atakaci nu mɓa̱la̱,
n ukpa̱ u uma a̱ ni,
n kambulu ka gbayin.
Akina a ɗa o kusongu yi ra̱ka̱
adama a̱ Ka̱shile ka na ka kuyaꞋanka yi afada,
ki ta̱ n utsura wi ili dem.”
9 “Ngono ma aduniyan n na n yaꞋin tsugbani n a̱yi,
ɗa kpamu a̱ ciya̱i uciyi adama a̱ ni,
i ta̱ e kene ka̱nga̱ ku ulalau ka na ki o kulyaꞋa Babila ka̱ta̱ a̱ shika̱ n a̱ na̱mgba̱i kpamu a̱tsuma̱ adama a ili i nan lo.
10 A shamgba ta̱ daꞋin adama o wovon ta lo o soꞋo atakaci a na wi o kusoꞋo.
I ta̱ a kudana,
‘Ili ya yi ta̱ n atakaci!
Ili ya atakaci i ɗa wa̱ nu likuci i gbayin,
likuci yu utsura i Babila,
adama a na atakaci a̱ nu a̱ ta̱wa̱ ta̱ a̱ ka̱tsuma̱ ka̱ viyum vi te.’
11 “Aza a tsulaga tsa aduniyan dem i ta̱ a̱ kushika̱ ka̱ta̱ a̱ na̱mgba̱ a̱tsuma̱ adama a̱ ni,
adama a na gogo na vuza wi lo a kutsula ili i na i e kudenge ba.
12 Ili i nam pa ya i ɗaɗa:
azanariya,
n azurufa,
n atali a ikebe,
nu nwaru mi ikebe,
n a̱kumbula̱ kakau a na a gaꞋin,
icuꞋu ya aminya a na i n ulima̱ u kuyene n ushili ka̱ɗa̱ɗa̱,
n ili i na a yaꞋin nu nɗanga n na mi m ma̱gula̱ni,
koɓolo n anga a agiwa a na e sheꞋwei,
nu nɗanga mi ikebe,
n iyum i shili,
n iyum,
n atali a kumaꞋa a ikebe ka̱u,
13 n ili i ma̱gula̱nia i na a ci yaꞋanka kusaꞋan,
n i na o tsu songu a katalikalyuka,
n i na yi i kusukuya̱ a ikyamba,
m ma̱kya̱n,
m maniꞋin,
n kiya,
n ilya,
n anaka,
nu nlala,
n odoku n ekeke a ucanuku u le,
n agbashi,
n aza a na e remei a̱ ubuta̱ u kuvon.
14 “Ɗa aza a tsulaga a danai vuka va,
‘Ili i singai i na vi a̱ kutsa̱n ki ɗa dem i ɗa i kotso ta̱,
ili i na yi e kuneke wu tsuloboi dem i ɗa i puwa̱nka̱ ta̱,
vi o kudoku va̱ ciya̱ i ɗa ba!’
15 “Aza a tsulaga a na a yaꞋin uciyi n a̱yi adama ili i ni i na i e kudenge i ta̱ a kushamgba daꞋin,
adama a na i ta̱ a kupana wovon ta lo o soꞋo atakaci tsu na a̱yi wi o kusoꞋo.
I ta̱ a̱ kushika̱ ka̱ta̱ a̱ na̱mgba̱ a̱tsuma̱.
16 I ta̱ a kudana:
‘Ili ya atakaci i ɗa
ili i ya atakaci i ɗa a kubana a̱ likuci i gbayin!
U ci yongo ta̱ a kuꞋuka a̱kumbula̱ a̱ ni
a na i buza̱ n ulima̱ u kuyene n ushili ka̱ɗa̱ɗa̱.
U uka ta̱ ili i tsuzogu ya azanariya,
n atali a ikebe nu nwaru kakau.
17 A̱ ka̱tsuma̱ ka̱ viyum vi te ɗa a̱ la̱nga̱sa̱i uciyi u ni ra̱ka̱!’
“Jagaba vu kpantsu ku gbayin n aza a ulinga a̱ ni dem i ta̱ a kushamgba daꞋin,
koɓolo n yaba dem vu na wi punu a nwalu a mala ma n aza a tsulaga ci ili i na a tsulai punu a kpantsu ka.
18 I ta̱ a̱ kushika̱ ka̱u ana enei ka̱nga̱ ku ulalau ka na ki o kusongu yi,
‘Likuci i yoku yi lo yu utsura uteku u nan lo ba!’
19 “I ta̱ a̱ kubukula̱ ka̱ci ke le n kayala adama a na o yotsongu una̱mgbuka̱tsuma̱ u le.
Ka̱ta̱ a dana:
‘Ili ya atakaci i ɗa,
ili ya atakaci i ɗa a kubana a̱ likuci i gbayin!
Uciyi u ni u zuwa tsu ta̱ ra̱ka̱
tso okpoi aza a uciyi.
Gogo na a̱ ka̱tsuma̱ ka̱ viyum vi te ɗa ili i nan lo dem i lazai.’
20 A̱ɗa̱ vu na yi o kuyongo gaɗi vu Ka̱shile,
yaꞋin ma̱za̱nga̱ n a̱bunda̱i
adama a na Ka̱shile ko yokumo ta̱ Babila ra̱ka̱.
Uma a̱ Ka̱shile n azusuki
n aza a na i eneki
a yaꞋan ma̱za̱nga̱.
Adama a na Ka̱shile ka yaꞋanka yi ta̱ ɗe afada
adama a ili i gbani-gbani i na u yaꞋankai ɗa̱.”
21 Ɗa kalingata ku utsura ko yoku ka ɗikai katali ka gbayin ko yoku,
an kutali ku kiya,
ɗa u vakangi kaꞋa a mala,
ɗa u salai:
“Babila likuci i gbayin,
ta Ka̱shile ka kuna wu nannai
uteku u na n vakangi katali ka!
Uma o kudoku e kene likuci ya ba.
22 Vuza wo kudoku wa pana uma a kuwaꞋa umolu ba,
ko nzuɓi n aza a̱ ilikushi,
vuza wo kudoku wa yaꞋan ulinga punu wa̱ nu ba.
Vuza wo kudoku wa pana izumgbi i kiya ba.
23 Vuza wo kudoku we kene kutashi ku ma̱kuni ku nu ba.
Vuza wo kudoku wa pana ka̱la̱ka̱tsu ka vuka n vali
a kuyaꞋan yolo ba.
Aza a tsulaga a̱ likuci i nam pa ele ɗa ishi azagbagbaꞋin
a laꞋi uma a aduniyan n utsura dem.
Tsuboci ci likuci i nam pa tsu doro ta̱ uma a aduniyan ra̱ka̱.
24 Ka̱shile ka takacika ta̱ Babila
adama a na a una ta̱ uma a na i a kudansa kadanshi ka̱ Ka̱shile,
n aza a na i ra̱ka̱ uma a̱ Ka̱shile.
E,
ta nannai Babila,
wu una ta̱ uma a aduniyan n a̱bunda̱i.”