Vuka n vungu
12
Ɗa me enei urotu u gbayin na ɗe gaɗi,
u na u nekei yaba dem mereve.
Vuka vi yoku ɗa vi lo,
mayaga ma na u shiyai kpamu kanna kaꞋa.
Ene a̱ ni i ta̱ ukiyangi a gaɗi vu wotoi.
Wi ta̱ kpamu n oroliko n azangata kupa n e re a kaci ka̱ ni.
2 Limata i yawa yi ta̱ ɗevu,
mɓa̱la̱ n atakaci a̱ a̱ga̱nda̱ a limata kpamu a zuwa yi ta̱ ma̱shi.
3 Gogo lo ɗa me enei urotu u yoku gaɗi.
Me enei vungu vu gbayin vi shili n aci e cindere n avana kupa.
Kaci dem ki ta̱ n oroliko e kenu.
4 Winja u ni u ronoi kazangata ke te a̱ ka̱tsuma̱ ka azangata a tatsu dem a gaɗi,
ɗa u taɗuki le a aduniyan.
U shamgbai e kelime ka vuka ka adama a na u soɗongu maku ma̱ ni gogo lo a ayin a na baci u matsai.
5 Ɗa u matsai maku mo kolobo,
ma na mi nu utsura ra̱ka̱ ma lyaꞋa tsugono n usuɗukpi a̱ ubuta̱ u uma a aduniyan ra̱ka̱.
Amma ɗa kalingata ka kikpatsai maku ma,
ɗa u bankai ni u Ka̱shile adama a na u da̱sa̱ngu a kakuba ko tsugono ka̱ ni.
6 Vuka va vu sumai ɗa vu banai a kakamba a̱ ubuta̱ u na Ka̱shile ko foɓusokoi ni.
I ta̱ a̱ kula̱na̱ yi ɗe ali ayin ka̱kpa̱n ke te n amangatawenre n amangatatsu (1,260).
7 Gogo lo ɗa a̱ gita̱i kuvon gaɗi:
kalingata ka gbayin MikaꞋilu n alingata a̱ ni a̱ shilika̱i n vungu,
ɗa vungu va n aza a̱ ni feu a shamkpai vishili.
8 Amma vungu va vi lyaꞋa utsura u le ba,
i ta na feu a̱ kuka̱sa̱kpa̱ yi n aza a̱ ni o doku o yongo gaɗi ba.
9 Ɗa MikaꞋilu n alingata a̱ ni a taɗuki vungu vu nan lo a kubana a iɗika n aza a̱ ni.
Vungu vu nam pa a̱yi ɗa vuza na u yongoi ali n ayin a mani-mani,
a̱yi ɗa vuza na feu e ci ɗeke Kalijani ko MalyaꞋi.
A̱yi ɗa vuza na u tsu ya̱nsa̱ yaba dem ka̱ta̱ u yaꞋan unushi.
10 Ɗaɗa m panai vuza yoku ɗe gaɗi u danai n ka̱la̱ka̱tsu ka gbayin:
“Gogo na Ka̱shile ka̱ tsu ki ta̱ a kisa uma a̱ ni!
Gogo na wi ta̱ a kuyaꞋan ulinga n utsura u ni,
ka̱ta̱ u lyaꞋa tsugono an mogono!
Gogo na Kishi ka̱ ni ki ta̱ o kuyotsongu utsura u ni wa aduniyan!
Adama a na Kalijani ko doku ka shamgba a̱ ubuta̱ u Ka̱shile u tsu ba,
u buwa a kusatangu itoku i tsu agbashi kanna n kayin ba.
A taɗuku ta̱ Kalijani pulai vu gaɗi!
11 Uma a̱ tsu a lyaꞋa ta̱ utsura u Kalijani
adama a mpasa m Ma̱giri ma,
n akaka a̱ Ka̱shile a na kpamu i a kudansa.
A pana wovon wu ukpa̱ ba.
12 A̱ɗa̱ vu na yi gaɗi ra̱ka̱ yaꞋin ma̱za̱nga̱.
Amma a̱ɗa̱ vu na yi a iɗika n asuvu a mala yi ta̱ o kusoꞋo atakaci ka̱u.
Na va ɗaɗa adama a na Kalijani ka̱ cipa̱ ta̱ wa̱ ɗa̱,
u yaꞋan ta̱ kpamu wupa ka̱u
adama a na u yeve ta̱ ayin a̱ gusa̱ yi ta̱ an wa shamgba.”
13 Ana vungu ve enei a taɗuki ni a iɗika,
ɗa u gita̱i kuguva vuka vu na vu matsai maku mo kolobo ma.
14 Vuka va vi isai evelyu a kajimba ka gbayin adama a na u ciya̱ u imkpa o kubono a̱ ubuta̱ u ni a kakamba.
Adama a na ta ɗe a̱ kula̱na̱ yi ali a̱ya̱ a tatsu n kagimi,
vungu ta na wa kufuɗa wa yaꞋanka yi muna ba.
15 Ɗaɗa vungu vu cikpa̱i mini ɗa mo okpoi an kuɗolu ku na ka kulyaꞋa vuka va,
adama a na ma laza n a̱yi.
16 Amma ɗa iɗika i ɓa̱nka̱i vuka va:
i ɓa̱yuwa̱i una̱ u ni ɗa i soɗongi mini ma na vungu u cikpa̱i va.
17 Ɗa vungu va vi yaꞋin wupa n vuka va ka̱u,
ɗa u ɗenga̱i kuyaꞋan kuvon m muku n ni n na m buwai ra̱ka̱.
Muku n ni ma ele ɗa aza a na o tonoi wila̱ u Ka̱shile n aza na o tonoi akaka a na Yesu u yotsongushi.
18 Ɗaɗa vungu va vi shamgbai a̱ ka̱kina̱ ka mala ka.a