Akaka a Tatsu a
Yahaya
Ikya̱shi
1
Mpa Yahaya,
mokoshi ma gba̱ra̱,
n ɗanaka ta̱ ka̱ja̱Ꞌa̱ ka̱ va̱ Gayu akaka a nam pa.
N ciga wu ta̱ adama a na ci ta̱ o kutono ili i mayun.
2 Ka̱ja̱Ꞌa̱ ka̱ va̱,
mi ta̱ a kavasa ili ra̱ka̱ yo okpo mayin n avu,
ka̱ta̱ kpamu ikyamba i nu i yaꞋan m ma̱ta̱na̱ uteku u na n yevei ka̱ɗu ka̱ nu ki.
3 N yaꞋan ta̱ ma̱za̱nga̱ ana aza o Kutoni o yoku a̱ ta̱wa̱i,
ɗa a danai mu ukuna u mayun u wuma u nu n uteku u na vi o kutono uye u mayun.
4 N ci yaꞋan ta̱ ma̱za̱nga̱ tutu m pana baci muku n va̱ mi ta̱ o kutono uye u mayun.
Ili yi lo i na i laꞋi nannai n uyoꞋo ba.
UgaꞋin u kuyaꞋan ulinga koɓolo
5 Ka̱ja̱Ꞌa̱ ka̱ va̱ ku ucigi,
u gaꞋan ta̱ uteku u na vi a̱ kuɓa̱nka̱ nlum ma aza o Kutoni,
ali n aza a na i yevei ba.
6 A dana ta̱ aza o Kutoni ukuna wu ucigi u nu.
N folono wu ta̱ vu ɓa̱nka̱ le a uye u na Ka̱shile ka kupana uyoꞋo,
a lyaꞋa baci kelime n nwalu n le.
7 A laza ta̱ a kubana nwalu n le adama a kuyaꞋanka Kishi tsugbashi.
A ci isa ili wa aza a na a̱ kpa̱ɗa̱i kuneke a̱ɗu ba,
ko kenu.
8 Adama a nannai,
a̱tsu a̱ ka̱ci ka̱ tsu tsu ɓa̱nka̱ le ci ciya̱ ci yaꞋan ulinga koɓolo n ele adama a ili i mayun.
9 N ɗanaka ta̱ aza o Kutoni akaka kenu;
amma Dayofi,
vuza na u cigai wo okpo vuza vi kelime vi le,
u panaka tsu ba.
10 N ta̱wa̱ baci,
mi ta̱ a̱ kutuka̱ nu nsata mi ili i yoku i na wi a kuyaꞋan,
koɓolo n i gbani-gbani i na wi a kudansa adama a̱ tsu.
Ili i na i laꞋi ra̱ka̱ i ɗaɗa,
u ci iwan ta̱ kurabasa nlum ma aza o Kutoni n nan lo a̱ ta̱wa̱ baci.
Ali u tsu sa̱nka̱ ta̱ aza a na a ci ciga kurabasa le,
ka̱ta̱ u loko aza a na a ci ciga kurabasa le va wu uta̱ka̱ punu a̱Ꞌisa̱ a aza o Kutoni.
11 Ka̱ja̱Ꞌa̱ ka̱ va̱,
ka̱ta̱ vu tono ili i na yi i gbani-gbani ba;
tono i na yi i singai.
Vuza na u yaꞋin kasingai vuza vu Ka̱shile ɗa.
Amma vuza na u yaꞋin kagbani-gbani,
ka̱ta̱ u yeve Ka̱shile ba.
12 Yaba dem u tsu dansa ta̱ ili i singai adama a Dimitiriya,
kuyongo ku ma̱riki ku ni ta na ku yotsongu yi ta̱ ili i na uma a danai derere ɗa.
Ci yaꞋan ta̱ kadanshi ku usuɓi feu adama a̱ ni,
i yeve ta̱ ta na ili i na tsu danai mayun ɗa.
Kadanshi ku ukocishi
13 Mi ta̱ n ili n a̱bunda̱i i na n cigai kudana wu,
amma n ciga n ɗana i ɗa e kepepa ba.
14 N keɗe ta̱ a̱pa̱Ꞌa̱ a na me kene wu babu megeshe,
ka̱ta̱ ci yaꞋan kadanshi a̱shi n a̱shi.
15 N vasa ta̱ Ka̱shile ka zuwaka wu una̱singai m ma̱ta̱na̱!
A̱ja̱Ꞌa̱ a̱ nu a na i punu na i ta̱ ikya̱shi i nu.
N folono wu ta̱ vi kya̱sa̱ a̱ja̱Ꞌa̱ a̱ tsu dem a na i lo n ula e le.a