Bulusu u danai ulinga u ni
10
Mpa Bulusu,
mi ta̱ o kufolono ɗa̱ n usuɓi koɓolo n kasingai ka̱ Kishi.
Uma o yoku a danai mi baci koɓolo n a̱ɗa̱ n tsu gajarakpa ba,
amma mi baci lo koɓolo n a̱ɗa̱ ba,
n tsu dansuka ta̱ ka̱u.
2 N ta̱wa̱ baci kpamu kene ɗa̱,
n yeve ta̱ n kuzuwa ta̱ usuɗukpi ka̱u wa aza a na e ci sheshe ci ta̱ o kutono ukuna wa aduniyan.
N ciga i zuwa mu n takacika ɗa̱ nannai ba.
3 Ci ta̱ o kuyongo a aduniyan,
amma a̱tsu ci yaꞋan kuvon tsu na uma a aduniyan a ci yaꞋan ba.
4 Yunatsu i na a̱tsu ci ci yaꞋanka kuvon,
kau ɗa yi n i na aduniyan a ci yaꞋanka.
Yunatsu i tsu yi ta̱ n utsura a̱ ubuta̱ u Ka̱shile uteku u na i kuna ubuta̱ wi ida̱shi yu utsura kakau u vurala vu tsu.
5 A̱tsu tsu una ta̱ kanananai koɓolo n a̱ra̱ɗi dem a na a kufuɗa kusa̱nka̱ vuma kuyeve Ka̱shile.
Tsu la̱nga̱sa̱ ta̱ kusheshe ku kugoyi ku na ki punu a̱ a̱ɗu a uma ɗa tsu zuwai le a panaka Kishi.
6 I yotsongu baci i kotso a na i panakai Kishi mayin,
ci ta̱ o kufoɓuso adama a na tsu takacika yaba dem vu na u iwain kupana.
7 Yi ta̱ a kinda ili i na a̱shi i a kufuɗa kene koci.
I ciɓa a na a̱tsu aza a̱ Kishi a ɗa n derere n tsa aza a na a tsu dansa n a̱ra̱ɗi ele feu aza a̱ Kishi a ɗa.
8 Mayun ɗa tsu dansa ka̱u n a̱ra̱ɗi adama a ukuna wu utsura u na Vuzagbayin u nekei tsu tsu ɓa̱nka̱ ɗa̱,
amma adama a na tsu takacika ɗa̱ ba.
Amma m pana wono adama a ili i nam pa ba.
9 N ɗanaka ɗa̱ baci de dem,
n ciga i sheshe mi ta̱ e kuneke ɗa̱ wovon ba.
10 Uma o yoku a danai,
“Atagarda a akaka kakau a̱ Bulusu i ta̱ n utsura koɓolo n ugaꞋin u kupana,
amma ayin a na wi n a̱tsu,
u zaza ba.
Kadanshi ka na ka̱ uta̱i a̱ una̱ u ni ka makara kaꞋa ba.”
11 U gaꞋan ta̱ e yeve ili i nam pa:
Ci ɗe koɓolo n a̱ɗa̱ gogo na ba,
i ɗaɗa i zuwai ɗa tsu dansai ili i nam pa a atagarda a akaka.
Amma ayin a na baci ci ɗe koɓolo n a̱ɗa̱,
ci ta̱ o kuyotsongu ɗa̱ utsura wa derere n tsu na tso kuyotsongu a̱ ubuta̱ wa akaka a̱ tsu.
12 A̱tsu tsu kaꞋwan kuntsukpa ka̱ci ka̱ tsu n aza a na a tsu dana ele a laꞋa ta̱ n kugaꞋan ba.
A ci inda ta̱ ka̱ci ke le ka̱ta̱ a yaꞋan uye u kagisamkpatsu u le,
ɗa gisanki ka̱ci ke le n u ɗa.
Ka̱ta̱ a yaꞋanka ka̱ci ke le afada tsu na nwalu n le mi.
Na va u yotsongu ta̱ a na a̱ kpa̱ɗa̱i kuyeve ili.
13 Amma a̱tsu tsa kuyaꞋan a̱ra̱ɗi n ili i na yi pulai a ulinga u na Ka̱shile ka̱ suki tsu ci yaꞋan ba.
Ci ta̱ a kuyaꞋan a̱ra̱ɗi koci n ulinga u na Ka̱shile ka̱ suki tsu ci yaꞋan,
a̱ɗa̱ va ta punu feu yi a̱ ubuta̱ wu ulinga wa.
14 Ci a kuyaꞋan a̱ra̱ɗi a ulami ba.
Yevei,
a̱tsu ɗa tsu gita̱i kutuka̱ ɗa̱ n Arabali a Singai a ukuna u Kirisiti Kishi.
15 Ci yaꞋan a̱ra̱ɗi adama a ili i na uma o yoku a yaꞋin ba,
adanshi tsu kucikpa ta̱ ci yaꞋan ili i nan lo ya n ka̱ci ka̱ tsu.
Tsu kucikpa ta̱ ci keɗe a̱pa̱Ꞌa̱ adama a na uneki u ka̱ɗu u ɗa̱ u gbonguro ka̱ta̱ kpamu ulinga u tsu wa̱ ɗa̱ u lyaꞋa kelime ka̱u.
16 Ci ciga ta̱ tsu bana tsu dana Arabali a Singai a̱ ubuta̱ u na wi daꞋin.
Ci ciga ci yaꞋan a̱ra̱ɗi adama a ulinga u na uma o yoku a yaꞋin ɗe a̱ ubuta̱ u le ba.
17 Katagarda ka Ciɗa ka danai,
“Vi ciga baci vi yaꞋan a̱ra̱ɗi,
yaꞋan a ɗa adama a ili i na Vuzavaguɗu u yaꞋin.”◊
18 Vuza na u cikpai ka̱ci ka̱ ni u kuciya̱ ucikpi u mayun ba.
Amma ayin a na baci Vuzavaguɗu u zagbai vuza,
vuma vu nan lo wi ta̱ ta na a̱ kuciya̱ ucikpi u mayun.