Ikebe adama aza a na a nambai
9
Me ene ugaꞋin u na wi punu n ɗanaka ɗa̱ adama a ukuna wi ikebe i na i foɓusoi kuneke uma a̱ Ka̱shile ba.
2 N yeve ta̱ i ciga ta̱ kuɓa̱nka̱.
Mi ta̱ a̱ ma̱za̱nga̱ adama a ukuna u nan lo,
n gita̱ ta̱ ɗe kudana uma a Makidoniya uteku u na a̱ɗa̱ aza a Akataya yi ɗe ufoɓushi adama a na i neke ali ɓalu.
Adama a na i cikala ta̱ kuneke ɗa ta na u zuwai ele vi yoku n a̱bunda̱i a ciga feu kuneke.
3 Amma mi ta̱ a̱ kusuku aza a̱ tsu a nam pa a kubana wa̱ ɗa̱ adama a na kadanshi ka̱ tsu ukuna u ɗa̱ ko okpo gbani ba.
N ciga ta̱ i yongo ufoɓushi,
adama a na n dana ta̱ ɗe yi ta̱ a kuyaꞋan nannai.
4 Mi ta̱ a kupana wono,
ka̱ta̱ a̱ɗa̱ feu i pana wono,
aza o yoku a na e nekei a̱ɗu a Makidoniya a̱ ta̱wa̱ baci na nu mpa,
ɗa ci cinai ɗa̱ babu na i foɓusoi wana ɗai ta na n dana le ukuna dem!
5 Me enei u kulaꞋa ta̱ n kugaꞋan n suku baci aza a̱ tsu a nam pa a wala kelime ka̱ va̱ adama a na e yeve ko kuneꞋe ku na i yaꞋin uzuwakpani i foɓuso ta̱ ɗe ku ɗa.
Na lo va u kuyotsongu ta̱ a na i nekei adama a na i ciga ta̱,
wi adama a na n gutsakai ɗa̱ i neke ba.
6 Ciɓai vuza na u ca̱Ꞌi kenu,
wi ta̱ feu a kukyaꞋa kenu.
Vuza na u ca̱Ꞌi n a̱bunda̱i,
wi ta̱ a kukyaꞋa n a̱bunda̱i feu.
7 Yaba dem vu ɗa̱ u sheshe n ka̱ci ka̱ ni ko yain ɗai u kuneke.
Ka̱ɗu ka̱ nu ki baci dakaka a̱ ubuta̱ u kuneke wa,
ka̱ta̱ vi neke ba.
Ve ene baci i ta̱ a kugutsaka wu,
ka̱ta̱ vi neke feu ba.
Adama a na Ka̱shile ka laꞋa ta̱ n kuciga vuza u ci neke m ma̱za̱nga̱ a̱ ka̱ɗu ka̱ ni.
8 Ka̱shile ki ta̱ a kufuɗa kuneke wu una̱singai u na u laꞋi i na vu nambai.
Ka̱ta̱ ayin tutu vi yongo n ili n a̱bunda̱i,
ali vi ciya̱ i yawa wu ka̱ta̱ kpamu vi neke adama a ulinga u singai dem.
9 Katagarda ka Ciɗa ka danai:
“E ci neke ta̱ aza a unambi kuneꞋe ku le n ekiye e re,
ka̱ta̱ usuɓi u le u yongo a kuyaꞋan ili i na i gaꞋin ali a kubana a uteku.”◊
10 Adama a na Ka̱shile kaꞋa vuza na u ci neke acimbi icuꞋu,
ka̱ta̱ kpamu u neke ilikulyaꞋa.
Wi ta̱ o kudoku ɗa̱ ili i na yi n i ɗa,
i tono baci kasingai adama a na i fuɗa i doku i neꞋe aza a na a nambai.
11 Wi ta̱ a kuzuwa ɗa̱ i yaꞋan n uciyi wi ili dem adama a na i fuɗa i neꞋe uma n ekiye e re.
Ka̱ta̱ uma n a̱bunda̱i a cikpa Ka̱shile a ayin a na tsu bankai n kuneꞋe ku ɗa̱.
12 Tsugbashi tsu na yi a kuyaꞋan na adama a na ci neke uma a̱ Ka̱shile ili i na a nambai ɗa koci ba,
amma ci ta̱ kpamu a kuzuwa le a laꞋa n kucikpa Ka̱shile.
13 Yi ta̱ e kuneke Ka̱shile tsugbayin adama a na i fuɗai i nekei n ekiye e re.
I neke ta̱ a̱ɗu n akaka a̱ Kirisiti Kishi,
ɗa i tonoi a ɗa ana i nekei uma a̱ Ka̱shile n ekiye e re koɓolo n aza a na a buwai.
14 Gogo na i ta̱ a kavasa adama a̱ ɗa̱,
ali ɗa a cigai ɗa̱,
adama a kasingai ka na Ka̱shile ka yaꞋin e ekiye a̱ ɗa̱.
15 Ci cikpai Ka̱shile adama e kuneꞋe ku gbayin ku nam pa.