Aza o Kutoni e neke ikebe
8
A̱ja̱Ꞌa̱ a̱ va̱,
ci ciga ɗa̱ ta̱ i yeve tsu na Ka̱shile ko yotsongi kasingai ka̱ ni wa aza o Kutoni a̱ ubuta̱ kakau u na wi iɗika i Makidoniya.
2 O soꞋi atakaci ka̱u ɗa kpamu i babu ili,
amma ma̱za̱nga̱ me le mo kotso ba,
ali ɗa e nekei ɗa i ɓarakpai.
3 YaꞋan n dana ɗa̱ e neke ta̱ n a̱bunda̱i uteku u na a kufuɗa ali a pasukpai.
Babu vuza na u danai le a yaꞋan nannai.
4 Amma ɗa o yongoi o kufolono tsu tsu ka̱sa̱kpa̱ le a̱ ɓa̱nka̱ uma a̱ Ka̱shile a na i a Urishelima.
5 Ci sheshe i a kufuɗa kuneke ali nannai ba!
Ili i na a̱ gita̱i kuyaꞋan i ɗaɗa e nekei biꞋi ka̱ci ke le u Vuzagbayin ɗa e yevei e nekei ka̱ci ke le wa̱ a̱tsu.
Ili i nam pa i ɗa Ka̱shile ka cigai.
6 Taitu ɗa vuza na u gita̱i kuyotsongu ɗa̱ uteku u na i kuneke,
ɗa tsu folonoi ni u bono u ɓa̱nka̱ ɗa̱ i kotso ulinga u kuneꞋe wa u na i gita̱ va.
7 I yaꞋin ili ra̱ka̱ mayin,
ali i lazakai:
A̱ɗa̱ na yi n uneki u ka̱ɗu ka̱u.
Ɗa i ci yaꞋan n kadanshi mayin.
A̱ɗa̱ na yi n kuyeve.
Ɗa yi kpamu a kuciga kuɓa̱nka̱ uma.
Ɗa kpamu i cigai tsu ka̱u.
Ci ciga ɗa̱ ta̱ i yaꞋan mayin mayun a ukuna u kuneke u nam pa babu mogogu.
8 Mi a kugutsaka ɗa̱ sai i neke ba,
ko a na aza o Kutoni a̱ ubuta̱ kakau a cigai kuyaꞋan nannai ka̱u.
Nan lo va ɗaɗa uye u yoku u na wi o kuyotsongu a na ucigi u ɗa̱ mayun ɗa wi.
9 I yeve ta̱ kasingai ka Vuzagbayin vu tsu Yesu Kishi.
I yeve ta̱ a na Kishi wi ishi n uciyi,
amma wo okpoi n unambi adama a̱ ɗa̱,
ɗa u zuwai ɗa̱ yo okpo n uciyi adama a unambi u ni.
10 Odoki a̱ va̱ a ɗa na:
Ɓalu a̱ɗa̱ ɗa i gita̱i kuciga kuneke,
a̱ɗa̱ ɗa ta na i gita̱i kuyaꞋan kuneke ka.
11 Gogo na kotsosoi ulinga u na i gita̱i kuyaꞋan.
Yotsongi a na yi a kufuɗa kukotso ulinga wa m mali tsu na i gita̱i u ɗa.
Nekei a̱ ka̱tsuma̱ ki ili i na yi n i ɗa.
12 I ciga baci i yaꞋan neke,
ka̱ta̱ i keɓece ko nini ɗai kuneꞋe ku nu ki ba.
Ka̱shile ka ciga ta̱ i neke a̱ ka̱tsuma̱ ki ili i na yi n i ɗa,
amma i neke i na i kpa̱ɗa̱i kuyaꞋan n i ɗa ba.
13 N ciga i neke ka̱u ali aza o yoku a pana uyoꞋo ka̱ta̱ a̱ɗa̱ tamkpamu i soꞋo atakaci n ili kenu i na yo okpoi ɗa̱ ba.
N ciga ta̱ ili i yaꞋan derere adama a yaba dem vu na wi punu a̱ ka̱tsuma̱.
14 Gogo na nahannai yi ta̱ n ili n a̱bunda̱i.
Ili i na yi n i ɗa yi ta̱ a̱ kuɓa̱nka̱ aza a na a nambai ka̱ta̱ megeshe a̱ ciya̱ baci ka̱u e yeve a̱ ɓa̱nka̱ ɗa̱ i namba baci,
ka̱ta̱ ili dem yo okpo derere.
15 Katagarda ka Ciɗa ka danai,
“Vuza na u ɓolongi ka̱u,
i ɗa i ɓarakpa ba.
Vuza na u ɓolongi kenu,
u namba ili ba.”◊
Taitu n a̱ja̱Ꞌa̱ a̱ ni
16 N cikpa ta̱ Ka̱shile a na u zuwai Taitu u ciga ɗa̱ tsu na mpa n cigai ɗa̱.
17 Taitu wu ushuku ta̱ kuyaꞋan ili i na tsu danai ni u yaꞋan.
U ciga ta̱ ka̱u u bana wa̱ ɗa̱,
ali kafu tsu dana yi u bana.
18 Ci ta̱ a̱ kusuku yi koɓolo n vuza tsu,
vuza na a̱Ꞌisa̱ a aza o Kutoni ra̱ka̱ a cikpai adama a tsugbashi ci ni a ayin a na u danai uma Arabali a Singai.
19 A̱Ꞌisa̱ a aza o Kutoni kakau a zagba yi ta̱ u bana n a̱tsu a̱ ubuta̱ u kuneke ikebe i nam pa.
Ci ta̱ a kuyaꞋan tsugbashi tsu nam pa adama a na ci neke Vuzagbayin tsugbayin,
ka̱ta̱ kpamu tsu yotsongu a na mayun ɗa ci cigai kuɓa̱nka̱.
20 Nannai ɗaɗa ci ciga vuza u ciya̱ tsu n unushi adama e kuneꞋe ka̱ a̱bunda̱i ku nam pa ba.
21 Amma a̱tsu ci ciga ta̱ ci yaꞋan ili i na Vuzagbayin u kupana uyoꞋo ali n uma feu.
22 Ci ta̱ kpamu a̱ kusuku vuma vi yoku koɓolo n uma e re a nan lo a.
Vuma vu nam pa ayin tutu wi ta̱ ufoɓushi adama a na u ɓa̱nka̱.
U yaꞋanka tsu ta̱ ɗe nannai a uye kakau n a̱bunda̱i,
u doku ta̱ kpamu u ciga kuɓa̱nka̱ gogo na ka̱u,
adama a na wu ushuku ka̱u n a̱ɗa̱.
23 Vuza na baci we ecei ukuna u Taitu,
danai vuza nan lo,
wi ta̱ ulinga nu mpa adama a na tsu ɓa̱nka̱ ɗa̱.
A̱Ꞌisa̱ a aza o Kutoni a ɗa feu a̱ suki uma e re a nam pa a kubana wa̱ ɗa̱,
ɗa e nekei Kishi tsugbayin.
24 Yotsongi le ucigi u ɗa̱,
adama a na a̱Ꞌisa̱ a aza o Kutoni a̱ ciya̱ e yeve a na ci yaꞋin derere a ayin a na ci m ma̱za̱nga̱ adama a̱ ɗa̱.