Bulusu n azusuki a aꞋuwa
11
N tsulau ci kenu tsu va̱ dem n yeve ta̱ ve kureme ta̱ ka̱ɗu nu mpa.
E,
n folono wu ta̱ vi reme ka̱ɗu nu mpa.
2 Ili i bura mu ta̱ n a̱ɗa̱ uteku u na kpamu Ka̱shile ili i burai ni n a̱ɗa̱.
Yi ta̱ an mekere ma na me yevei vali ba,
ɗa n yaꞋankai ni uzuwakpani u na wo olo vali vi te koci,
a̱yi ɗa ta na Kishi a̱ ka̱ci ka̱ ni.
3 Amma gogo na mi ta̱ a kupana wovon ta lo a̱ ta̱wa̱ a̱ puwa̱nka̱ n a̱ɗu a̱ ɗa̱ adama a na i ka̱sa̱kpa̱ kutono Kishi m mayun koɓolo n ka̱ɗu ka ciɗa,
tsu na koko ka̱ ya̱nsa̱i Hawa n ugboji u gbani-gbani u ni.
4 Tsu dana ɗa̱ ta̱ ukuna u Yesu,
ɗa i ciya̱i Ayinviki a̱ Ka̱shile,
ɗa yi isai akaka a̱ tsu.
Amma ɗa i ka̱sa̱kpa̱i uma o yoku a danai ɗa̱ ili i yoku kau yu ukuna u Yesu.
Gogo na yi ta̱ ufoɓushi adama a na yi isa ayinviki o yoku kau koɓolo kpamu n akaka o yoku.
5 Aza a na e ci ɗeke ka̱ci ke le “azusuki a gbagbaꞋin” n sheshe a na a laꞋi mu ba.
6 U gaꞋan ba mi a kufuɗa kuyaꞋan kadanshi mayin ci le ba,
amma n yeve ta̱ ili i na mi a kudansa.
Ci yotsongu ɗa̱ ta̱ ɗe ili i nam pa hawun a uye kakau dem.
7 N zuwa ɗa̱ i tsupa mu adama a Arabali a Singai a na n danai ɗa̱ ba.
N goyo ta̱ ka̱ci ka̱ va̱ ɗa n nekei ɗa̱ tsugbayin.
Nannai va n nusa ta̱?
8 Wi ta̱ adanshi uboki u ɗa mi a kuyaꞋan ana mi isai ikebe a̱Ꞌisa̱ a aza o Kutoni kakau ciya̱ m ɓa̱nka̱ ɗa̱ koci,
adama a na n yaꞋanka ɗa̱ tsugbashi.
9 Ayin a na mi koɓolo n a̱ɗa̱ n namba baci ili,
n ce ece a̱ɗa̱ i ɓa̱nka̱ mu ba.
Aza a̱ tsu a na a̱ uta̱i a Makidoniya ɗa a yawai ɗe e neꞋe mu ta̱ ili ra̱ka̱ i na n cigai.
N saꞋwa kufolono ɗa̱ i ɓa̱nka̱ mu ba,
mi ta na a kuyaꞋan feu ba.
10 Babu vuza na u kuta̱ a iɗika i Akataya ka̱ta̱ u sa̱nka̱ mu kudansa ukuna u nan lo ka̱u.
N dansa ta̱ ili i nam pa m mayun u Kirisiti Kishi a̱ ka̱ɗu ka̱ va̱.
11 Ana n dansai n ciga mo oꞋuso ɗa̱ ba,
ɗaɗa m kpa̱ɗa̱i kuciga ɗa̱?
A̱Ꞌa̱!
Ka̱shile ke yeve ta̱ a na n cigai ɗa̱!
12 Mi ta̱ a kulyaꞋa kelime n kuyaꞋan ili i na mi a kuyaꞋan gogo na,
adama a na n ciga ta̱ n sa̱nka̱ uma a nan lo kuciya̱ uye u na a kuyaꞋanka a̱ra̱ɗi.
I ta̱ a kuciga a dana ulinga u na i a kuyaꞋanka a̱ra̱ɗi a u te u ɗa n ulinga u tsu.
13 Uma a nam pa a azusuki a aꞋuwa a ɗa.
A ci yaꞋan ta̱ aꞋuwa adama a ulinga u na i a kuyaꞋan,
ka̱ta̱ o bonoko ka̱ci ke le adama a na o yotso azusuki a mayun a̱ Kirisiti Kishi.
14 Amma ili i mereve i ɗa wa̱ va̱ ba,
adama a na Kalijani feu u tsu bonoko ta̱ ka̱ci ka̱ ni adama a na u ciya̱ u yotso kalingata ka kutashi.
15 Ili i mereve i ɗa wa̱ tsu ba,
a na agbashi a MalyaꞋi feu o tsu bonoko ka̱ci ke le adama a na o yotso agbashi a na a ci yaꞋan ulinga u singai.
Amma a kanna ku uteku,
i ta̱ a̱ kuciya̱ atakaci derere a ili i na a yaꞋin.
Bulusu u yaꞋin kadanshi ka atakaci a̱ ni
16 N dana ɗa̱ kpamu:
Ka̱ta̱ vuza we ene mu an kalau ba.
Amma i sheshe baci nannai,
to,
panakai mu,
tsu na i kupanaka kalau,
ayin a na feu mi a kuyaꞋan a̱ra̱ɗi kenu.
17 Ayin a na baci mi a kucikpa ka̱ci ka̱ va̱ tsu nan lo,
mi a kuyaꞋan kadanshi tsu na Vuzagbayin u tsu dansa ba,
amma tsu na kalau ka tsu dansa.
18 Uma n a̱bunda̱i i ta̱ a kuyaꞋan kadanshi ka̱ a̱ra̱ɗi adama a ili i na a yaꞋin punu a aduniyan.
Mi ta̱ feu a kuyaꞋan nannai.
19 A̱ɗa̱ na i danai yi ta̱ n ugboji,
yi a kupana uyoꞋo u kupanaka alau!
20 Ali a̱ɗa̱ e kureme a̱ɗu n aza a na o bonokoi ɗa̱ agbashi e le.
A̱ɗa̱ kpamu e kureme a̱ɗu n aza a na a kulyaꞋa ɗa̱,
ko aza a na i a̱ kuya̱nsa̱ ɗa̱.
Ali a̱ɗa̱ e kureme a̱ɗu n aza a na a ci ɗika ka̱ci ke le a laꞋa ɗa̱ ta̱,
ko aza a na a tsu ɓasasa ɗa̱.
21 M pana ta̱ wono ana n danai utsura u kuyongo u tsu u yawa u nan lo ba.
I baci a kufuɗa kuyaꞋan a̱ra̱ɗi,
mpa n kuyaꞋan ta̱ feu,
amma nannai va tsulau tsu ɗa.
22 A danai ele va Umaci wi Ibrahim u ɗa,
ko?
Mpa feu vuza vu Umaci wi Ibrahim u ɗa.
Ele aza a Israila a ɗa?
Mpa feu vuza vi Israila ɗa mi.
Ele ntsukaya mi Ibrahim n ɗa i?
Mpa feu ma ɗa mi.
23 Agbashi a̱ Kishi a ɗa i?
Tsulau tsu ɗa mu ana n yaꞋin kadanshi tsu nam pa,
amma n laꞋa le ta̱ a kuyaꞋanka yi tsugbashi.
N laꞋa le ta̱ a kuyaꞋan ulinga ka̱u.
A zuwa mu ta̱ ugbashi ayin tutu u laꞋi tsu na ele feu a yaꞋin ugbashi wa.
Ulapi u na n soꞋi u laꞋa ta̱ u le n a̱bunda̱i.
Ayin n a̱bunda̱i n ci yaꞋan ta̱ adanshi mi ta̱ a̱ kukuwa̱.
24 Ayahuda a fabai mu ali kamankupa n kuci m mashauri.a
A yaꞋan ta̱ nannai va ali kutawun.
25 Aza o Roma a lapai mu n alangu.
A yaꞋanka mu ta̱ nannai ali kutatsu.
Kute a varai mu adama a na a una mu.
Mpa a nwalu a kpantsu ɗa ku ɓosoi eshere-eshere.
Nannai u yaꞋan ta̱ ali kutatsu.
Ɗa ta na n ta̱ɗukpa̱i a̱ mini n gita̱i n kulivi sai a na kpamu kulivi ku yoku ku bonoi.
26 Ayin a na mi a nwalu n a̱bunda̱i,
n soꞋo ta̱ atakaci ali ɗevu n kukuwa̱ adama a nyeneke n na n uwai m mini,
koɓolo n oboki a yunatsu.
N uwa ta̱ a̱ ka̱tsuma̱ ka atakaci adama a uma a̱ va̱,
Ayahuda,
koɓolo kpamu n adama a Aza̱ka̱yimbi.
N yongo ta̱ o kusoꞋo atakaci punu a̱ likuci i gbagbaꞋin,
na ɗe a kakamba,
m punu kpamu a mala.
N yongo ta̱ kpamu a̱ ka̱tsuma̱ ka atakaci adama a uma a na a danai ele aza o Kutoni a ɗa,
ashe ta na ba.
27 N yaꞋan ta̱ ulinga ka̱u ali mo oꞋoi,
ayin n a̱bunda̱i n nambai alavu.
N yongo ta̱ a kupana kambulu n kakuli dem,
n yongo ta̱ babu ilikulyaꞋa ayin n a̱bunda̱i.
N ci yongo ta̱ kpamu a kupana uta̱ni adama a na ntogu n yawa mu ba.
28 N kudoku ta̱ kpamu nahannai,
n ci yaꞋan ta̱ adanshi n ɗika ta̱ a̱miki a kaci ka̱ va̱ ayin tutu adama a uteku u na ili i burai mu n a̱Ꞌisa̱ a aza o Kutoni kakau ra̱ka̱.
29 Aza o yoku ikyamba i kuwa̱ le baci,
mpa feu i kuwa̱ mu ta̱.
Ko kenu ka̱ɗu ka̱ va̱ ka̱ da̱sa̱ngu ba,
a ayin a na baci a̱ ya̱nsa̱i vuza adama a na u yaꞋan unushi.
30 Mi baci a kucikpa ka̱ci ka̱ va̱,
mi ta̱ a kuyaꞋan nannai adama a ili i na i yotsongi a na ikyamba i va̱ i kuwa̱i.
31 Ka̱shile ke yeve ta̱ aꞋuwa ɗa mu ba.
A̱yi Ka̱shile kaꞋa n Dada vu Vuzagbayin Yesu Kirisiti Kishi,
i ta̱ ta na a kucikpa yi ali ayin a babu uteku.
32 Ayin a na mi ishi a Dimaska,
gomuna (vuza na Mogono Arita u zuwai) u cigai kuka̱na̱ mu,
ɗa u zuwai aza a kindi a̱ likuci ya ra̱ka̱.
33 Amma a̱ja̱Ꞌa̱ a̱ va̱ o zorukpoi mu n katusu a mabana punu a mashilya ma̱ likuci ma.
Nannai ɗa n fa̱ta̱tsa̱i e ekiye o gomuna.