Awirai kerinyia rovo pas ve via uirai romi vatiron bia nape pas ve kareꞌe. Bio pas ve kareꞌe emo karinaka yaꞌa veku veka “hetman” vou sios ya God. Awirai prumo vou histori vou Kristen sios kuirirai veka pas emo kokai iya Cha Jon. Cha Jon yaꞌa aposel ve kaporokeiya revo Yesus kakuke. Cha Jon pas ve kareꞌe konoi roa Cha Gaius. Cha Gaius inyia pasin neman-a karao ta kaorerariy aro Kristen bombiam vou sios ya Cha Jon ta yei aro nape inyia bo ve kepepeo ta kenopi boko raꞌa ke awirai awakai ya God-a nairirai row awoꞌo ya Yesus Krais.

Cha Jon pas ve kareꞌe ke kupuana naoroa Cha Gaius row pasin vou naorerariy aro Kristen nape boꞌo ya Biapako kepao ero. Taim nemao veka, kemiritao bilip memi ya kamave aro kura ya God taim nemalpim yei aro nape boꞌo ya God-a kepao ke awirai awakai-ya nyirirai. Raꞌa minyiao Cha Jon kupuana kaoroa Cha Gaius ke naroi kupuana row pasin vou nalpim yei Kristen. Ta raꞌa vou minyiao, Cha Jon kupuana kaoroa Cha Gaius ke via pa nererikeo pasin ya hetman vou sios raꞌa, awoꞌo ya Cha Diotrefes. Bia emo via inyia pasin neman-a arao ta ako yei Kristen ovu voro inyia kekape awirai ya God-a kyirirai ero kenopi pova oꞌro yaꞌa vai. Cha Jon bio raꞌa awoꞌo karinaka minyiao awoꞌo ya Cha Demitrius, pasin ya inyia koriritao revo vatiron veka kasave ya God. Korao veka ta ku pako vou pas ve kupuana norow pasin vou bilip ta nemeremoiy aro ovu ya kamo nemuriki moiy Kristen ovu ke awirai awakai ya God-a nyirirai.