Pas ve konoi romu bia bom ve. Momu bia bom^a God-a kamompe momu ven veka bia ya veku awere aro meꞌe mowmow momu. Memi mowmow awirai awakai ya God-a kemiyarau ven. Ya ku vou vevo po ta kanerenove revo. Ya kanake nanairai nove veka, via nena unake inyia kanerenove revo vai. Aro mowmow awirai awakai ya God-a keyarau ero, keperepove revo. 2 Ku vou kemeremove revo ero, ero korao veka, awirai awakai ya God-a kuinyia imi ven kupuana ya keta nuinyia toratora.

3 God Cha Tata eri Yesus Krais, Ma Biam ya God Cha Tata, keta neyokoku ya neremarimari pomi revo ya riꞌi mariri neraipomi. Ero korao veka, ao en keta inyia nemiko ero kokai iya God Cha Tata eri Ma Biam yaꞌa taim awirai awakai ya God nau pasin vou nemeremoiy revo aro ovu nuinyia roki revo laip memi.

4 Ao voro korao oꞌto pako kotena ero, ero korao veka, kanayarau veka ovu yei meꞌe momu ero pa kepikeo awirai awakai veka Cha Tata lo karomi pa nemikeo ero. 5 Bia bom beiy, pas ve mare kaneꞌe nomu emo, awirai-ya kuinyia ina ke pa nopikeo. Nena via anairai now lo tare tin vai. Baun ben! Nena kanairai now lo kemiko ven ato tija ero. Kanatere nove ke nemeremoiy revo aro ovu. 6 Pasin vou nemeremoiy revo aro ovu, korao veka, keta nekemi revo riꞌi moikera ya pa nemikere revo lo ya God. Lo yaꞌa keveko ven ato tija ero, keta pa neverikeo pasin vou nevereroiy revo aro ovu.

7 Mowmow yei beiyo roporere mare kekepi ven ta inyia kyiutute kyiararao meꞌri ve. Beiyo ve via kuinyia iu nyirirai veka Yesus Krais-a kararo meꞌri nau reka veka bio awakai. Beiyo roporere ve kekepi veka aro ine kepiatrotropu revo Krais. 8 Korao veka ta neve orerariu revo! Awenari awirai ya Krais-a neverereo ya ao neman inyia kemirevapana mow ero, keta noawiapu. Keta neverori kupuana ya ao neman mowmow em God-a kuinyia iu narove ero keta neveko. 9 Bo bio awirai ya Krais-a narereo ya naopuki nanoi rore awirai eremara reo awirai ya Krais, God-a via akei iya bio emo vai. To bo bio awirai ya Krais-a navo kupuana, Aka eri Ma keraikepi rovo iu laip ya bio emo. 10 Korao veka ta, bo bio raꞌa nakai ive ta skul-a narove ta awirai veka via nako nakai, via umonai neman-a neverao roa ya neveko yaꞌa nanoi rove oꞌro meve vai. 11 Bio umonai neman-a narao roa ta pasin neman-a narao roa bio emo, kakei roki boꞌo taipetaipe ya bia emo.

12 Awirai prumo kerinyia ina ke nanairai nove. Ta nena konina via awirai ve naneꞌe nerinyia rovo pas ve vai. Kanakinakinao veka keta nakane nanapirikeve ya nekemi awirai-ya nemirai po roꞌo. Ya ao en keta norao mowmow memi oꞌto notemi revo. 13 Aro meꞌe vou rou momu God-a kamompe vou kokei veka bio ya veku ero, umonai neman-a kesalim pomu.