Awirai kerinyia rovo pas em via uirai revo vatiron bia nape pas em kareꞌe. Ta awirai prumo vou histori vou Kristen sios kuirai vatiron veka pas em kokai iya Cha Jon. Ta Cha Jon ya aposel em inyia kakei iya revo Yesus kakuke. Awirai mowmow vou pas em korao iu minyiao veka awirai kerinyia Awirai Neman Cha Jon kareꞌe. Taim Cha Jon pas ve kareꞌe, mowmow yei aposel ya Yesus keviri ven ta prumo yei tikse roporere kekamap ya inyia ketova ta keropopei ta karaipai revo Kristen ke pa nepikei po ruru mara via owerekeiya Yesus vai. Korao veka ta pas ve keta kupuana noroiy Kristen ke pa nepikeo pasin niniu ya God ta awirai voro kwerekeiya revo Yesus bia em bia bekaipe.

Ku raꞌa vou awirai ya Cha Jon karererow Kristen bombiam via nepin aro rorokeo em neropopei ta neraipai nepepeiya God vai. Aro em “aro yei rorokeo” inyia kyirai veka ao mare erinyia meꞌri en via ere neman revo vai. Ta kyirai minyiao veka Yesus ya Ma Biam ya God, ta via kuinyia iu nave bio awakai ta via kuinyia iu nakei rovo ao vou meꞌri en, veka memi aro bombiam inyia kemamao ero. Awirai raꞌa kyirai em korao veka, bio karake nakei iya revo God, ao vou meꞌri en via ova nakinao rore vai. Inyia kyirai minyiao veka, pasin neman ta pasin vou nemeremoiy revo beiyo ovu minyiao em ao vou meꞌri em po. Korao veka ta memi aro bombiam via nemi kinakinao more pasin em pa va nemikere vai. To kuro vou pas ya Cha Jon em, Cha Jon veku karererow veka memi aro Kristen bombiam via awirai yei nemirivo ta nemibilip mow vai.

Pas mare en, Cha Jon kakupuana row awirai awakai veka Yesus-a kave bio awakai ta aro bombiam-a kebilip pova ero, keta pa nepikeo pasin ya Yesus ke neperepova revo God ta neperepoiy aro bombiam ovu minyiao. God-a yaꞌa veku karereromi tija ta spirit ya karereroki riꞌi memi aro kemibilip mova. Ta yaꞌa veku inyia kupuana karoiy aro kebilip pova ta kekepiroki iya God ya pa kepikeo pasin ya Yesus nau awirai awakai ya God.