Namba wan pas
Cha Jon kareꞌe
Awirai vou laip-a kokai koroumo
1
Ya Awirai en mare kemeꞌe mopu en,
kuirai row ao voro kuinyia ven ato tija taim God-a ao mowmow kararerare,
ya baunke kuinyia kokai kuinyia iu mare.
Awirai vou ao en kemirivo veꞌen ato tija,
ya kemipirike revo ine memi veku,
ta kemoremomow ya eno memi veku kemavetao.
Ya awirai mowmow en kwereke revo awirai ya God ke kuinyia iu laip awakai-ya naromi aro bombiam vou meꞌri.
2 Ao en kuinyia ven ato tija ya kokai en,
yaꞌa veku laip vou uinyia toratora.
Ya kopei God-a karaonaka kakamap roiy aro bombiam koroumo ke kuinyia iu nepirikeiya.
Kemipirike ven ya mare awirai awakai yaꞌa ero inyia kemirirai mopu koroumo.
Awakai-ya kemirai mopu veka,
ao en yaꞌa veku ku vou laip vou uinyia toratora.
Tija awakai kakei iya God Cha Tata.
Ta mare God-a karaonaka kakairomi koroumo ke kuinyia iu nemipirikeiya.
3 Memi mare awirai rere ao en kemi pirikere ta kemirivo ta kemirirai mopu,
keta mopu minyiao kuinyia iu nokepi imi rimoꞌo moikerao.
Ya memi mowmow kuinyia iu nekemi revo rimoꞌo moikerao more ao mowmow ya nemibilip mova God Cha Tata eri Ma ya Yesus Krais.
4 Pas en kemeꞌe mopu ke pasin vou oꞌto notemi kuinyia iu rova neme mow revo ya nuinyia imi toratora.
Memi keta nekemi mow lait
5 Awirai en kemirivo moa Yesus Krais-a kairirai romi ta mare kemirirai mopu minyiao nopurivo:
God-a yaꞌa veku lait ta rorokeo via opoporariya vai.
6 Bo nemirai veka kekemi rimoꞌo moikerao miya God,
ta baunke kemute mow pasin vou rorokeo,
kemi ropomem memi veku ta via pasin-a emao ovuvuro iu awirai awakai ya God vai.
7 To bo nemibilip revo ta nemute mow pasin vou lait veka God-a veku kakei lait,
ya pasin en po korao kekemi rimoꞌo moikera miy aro bombiam mowmow ya God.
Ya noꞌo ya Yesus Ma ya God en,
inyia sin mowmow memi kopereoki ya kemininiu iu ine ya God.
8 Bo nemirai veka memi via sin-a emao,
kemiropomem memi veku ta awirai awakai via uinyia rimoꞌo kuro memi vai.
9 To bo sin memi nemirirai moa,
keta narao veka promis-a karao ven ero.
Keta pasin niniu narao ya sin memi napereoki,
ya pasin taipetaipe mowmow kemaremare via ereniniu iu ine ya God ero,
keta napereoki ya narao nemininiu.
10 To bo nemirai veka memi via sin-a emao,
ero ya keminaka veka God bia roporere ta awirai yaꞌa via uinyia rimoꞌo kuro memi vai.