Krais bia ya alpim memi
2
Mopu mevova neman nena,
awirai en kaneꞌe ke noelpim mopu ke via kuinyia iu sin-a nopao iu ine ya God vai.
To bo bio raꞌa sin-a narao iu ine ya God,
Bio Kamompe Memi ta awirai memi kapoi,a
inyia katere roa God Cha Tata ta sin memi kapereoki.
Bia en ta pasin niniu awakai-ya karao iu ine ya God awoꞌo ya Yesus Krais.
2 Bia em bopo kakowomi ta karao yaꞌa veku veka ofa neman awakai ke sin memi emao iu ine ya God ero napereoki.
Ao en via arao romi aro nape emibilip ven ero po vai,
bauni.
Ao en karao ke noelpim yei aro bombiam mowmow vou meꞌri en nau.
Bio kasave yaꞌa revo God pa karikeo revo lo mowmow yaꞌa
3 Bo pa nemikere lo ya God,
kuinyia iu nemiyarau veka kemisave yaꞌa revo.
4 Bo bio raꞌa nairai veka,
“Nena kanasave yaꞌa God,”
ta via pa arikere revo lo mowmow yaꞌa,
bio ve bio roporere ta awirai awakai ya God-a via uinyia iya rimoꞌo.
5 To bo bio awirai ya God-a narivo ta pa narikeo revo,
bio ve riꞌi yaꞌa kaoroa revo God ta karererova revo.
Ya rara em po,
kuinyia iu nemiyarau veka,
kemipomokeiya ta kekemiroki revo miya God.
6 Bio nape nairai veka kaporokeiya ta kakeiroki revo iya God,
keta pa narikeo revo kapoꞌo ya Yesus.
7 Mopu aro Kristen raꞌai awere rou neman nena,
nena via lo tare anenopu vova vai.
Baun ben!
Emo lo tora kopuko ven ato tija ta kopusave vou revo,
ya baunke kuinyia kokai kuinyia iu mare em.
8 Lo em minyiao korao veka lo tare mare inyia kanenopu vova.
Ero korao veka,
laip ya Yesus ta pasin yaꞌa nau laip ta pasin mopu mare,
koriritao veka lo en kotare.
Korao veka ta,
rorokeo inyia kwatikeki konoi ya lait awakai-ya kokai ven ta mare kuinyia em.
9 Bio nairai kanapo veka kakei lait,
ta ine narei trotroru Kristen raꞌai awere rou ovu,
bio veka baunke kakei rorokeo.
10 Bio narererova revo Kristen raꞌai o rou raꞌa,
kakei lait ta ao raꞌa via kuinyia iu nopoporariya rara ke norao navepakeowo vai.
11 Bo bio riꞌi neiyataipo ta via narererova Kristen raꞌai o rou raꞌa,
bio en kakeiroki rorokeo ta kaututerovo.
Ero korao veka,
rorokeo kopoporariya ven ine ta via ayarau revo rara bekaipe nanoi ero.
12 Mopu mevova neman nena,
pas en inyia kaneꞌe konoi ropu,
ero korao veka,
mopu aro kopubilip pova Yesus Krais.
Korao veka ta God-a sin mopu kapereoki ven.
13 Pas en kanenopu aro voro koropi kupuana ta kopubilip pova Yesus Krais ato kokai kuinyia iu mare,
kopao veka aro aka rika kopu kupuana ven.
Ero korao veka kopusave yaꞌa revo Yesus Krais,
bio en kakei ven ato tija taim God-a ao mowmow kararerare ya kokai kuinyia iu mare.
Pas en kanenopu aro koropi kupuana ta kopubilip pova Yesus,
kopao veka aro yangpla kupuana pako kuinyia ipu.
Ero korao veka,
koputawoka ven Satan,
bia ya inyia anaoi cha rore pasin taipetaipe.
14 Mopu mevova neman nena,
pas en kaneꞌe konoi ropu ven
ero korao veka,
mopu kopusave yaꞌa God Cha Tata.
Pas en kaneꞌe konoi ropu aro aka koropi kupuana pow bilip ato tija kokai kuinyia iu revo mare.
Ero korao veka,
kopusave yaꞌa revo Yesus Krais,
bia yaꞌa kakei ven ato tija taim God-a ao mowmow kararerare ya kokai kuinyia iu mare.
Pas en kaneꞌe nopu aro koropi kupuana ta kopubilip pova Yesus Krais kopao veka aro yangpla kupuana pako kuinyia ipu.
Ero korao veka,
kopubilip pova revo Krais ta awirai awakai ya God-a kuinyia kupuana revo riꞌi ta ruru mopu,
ya koputawoka ven Satan bia yaꞌa anoi cha rore pasin taipetaipe.
Memi via nemeremore revo pasin vou meꞌri en
15 Mopu via noperepore revo pasin taipetaipe ta ao maramara vou meꞌri en.
Bio nape narererore revo ao vou meꞌri en,
via inyia arererova revo Cha Tata.
16 Ao mowmow vou meꞌri en inyia kereraipami ta sin maramara veka kemamao:
laik taipo vou reka,
pasin vou aigris,
pasin vou mangal,
pasin vou pianoreremi nau pasin vou uruku nemyeo ta awoꞌo memi veku nemavoko more ao uinyia imi ta ao voro inyia emaremare ero.
Pasin veka via erekare iya Cha Tata God,
em pasin vou meꞌri po.
17 Meꞌri en nau ao maramara mowmow inyia kereraipami aro bombiam mowmow,
inyia konoi ya korake nowaunki nau,
ta bio inyia pa narikeo laik ya God keta nakei toratora.
Bio ine keiyatrotroru Krais kakai ven
18 Mopu mevova neman nena,
ya kemikamap iu ven taim vou meꞌri en korake nowaunki.b
Tija awirai yaꞌa bio voro ine keiya trotropu Krais kopurivo keta nakamap.
Ya mare,
beiyo mowmow ine kepiatrotropu Krais ya kekamap ven koroumo.
Ta ve koriritao veka kemikamap ven iu taim vou meꞌri en korake nowaunki.
19 Aro em kekepi imi ven ya kopei kepepemi kenopi upuo.
Ta ve koriritami koroumo veka,
via ekepi veka aro awakai memi vai.
Bo nyiave aro awakai memi,
keta baunke nekepi imi.
20 Ta mopu,
Krais-a Holi Spirit-a karopu ven.
Mopu aro awirai awakai-ya God-a kopuyarau ven.
21 Awirai en via aneꞌe ke noriritapu veka awirai awakai via opuyarau vai.
Bauni.
Kanayarau ven veka mopu awirai awakai-ya kopuyarau,
ta awirai roporere maramara kopurivo ero,
via okai iu awirai awakai ya God vai.
22 Bio nape bio roporere?
Bio nape kairai veka,
“Yesus via bio God-a kamompe ke nako yei varu aro bombiam yaꞌa veku vai.”
Bio nape awirai em nairai,
ine keiyatrotroru Krais ta oreva kaoroa Aka eri Ma.
23 Bio oreva naoroa Ma ya God,
oreva kaoroa Aka yaꞌa minyiao.
Bio nabilip ta nairai veka,
“Yesus bio God-a kamompe ke nakei veka bio yaꞌa nako varu aro bombiam mowmow yaꞌa,”
kakei veka kura awakai ya Ma ya God eri Cha Tata.
Holi Spirit inyia skul awakai-ya karomi
24 Mopu keta awirai voro kopurivo ven ato tija ero,
keta nopavo kupuana.
Bo awirai en nopavo kupuana ya pa nopikeo,
kopupopokeiya ta kokepi roki revo iya Ma yaꞌa God eri Cha Tata God.
25 Promis-a karaoromi ven keta laip vou uinyia toratora naromi.
26 Awirai en kanenopu ero kanake nanairai nopu beiyo voro kepake neropopepu ero.
27 Ya kopei mopu,
Krais-a kupuana ya Holi Spirit-a karopu ven ta boko kako ya kakeiroki laip mopu.
Korao veka ta via awirai-ya nopurivo poiy beiyo roporere ke skul mara tirin-a nepopu vova vai.
Ta Kupuana ya Holi Spirit inyia skul-a karopu rore ao mowmow korao iu veka awirai awakai kopuko ven ero,
ya awirai awakai yaꞌa emo kopuyarau ven ta via aroporere vai.
Korao veka ta mopu keta baunke inyia nokepi veka kura awakai-ya God.
Aro meꞌe ya God
28 Mopu mevova neman nena,
mopu keta nopupopokeo ta nokepiroki revo iya Krais.
Ya taim nakai koroumo,
kuinyia iu neromi kupuana ya via reka noyomi rova taim nakai.
29 Bo nopuyarau veka Krais-a kaniniu revo iya God,
mopu minyiao kopuyarau ven veka beiyo mowmow pasin niniu kepao iu ine ya God,
kekepi veka aro meꞌe awakai yaꞌa.