3
Pirike!
God Cha Tata,
kairimi veka meꞌe awakai yaꞌa.
Korao veka ta inyia karereromi revo.
Awirai en,
ero awakai.
Ta yei aro bombiam vou meꞌri en via eyarami revo veka memi aro meꞌe ya God.
Ero korao veka,
God minyiao keroivinaka.
2 Mopu aro Kristen raꞌai awere rou neman nena,
mare kekemi veka mevova ya God.
To kopei kokai pa ere keta nekemi nemao vekaipe,
ao en God-a via airai ovatironki romi revo ke kuinyia iu nemiyarau vai.
Ta memi kemiyarau ven veka,
taim Krais-a nakai koroumo,
memi keta nemao miya revo veka yaꞌa veku.
Mare awakai,
kuinyia iu ao en nemiyarau,
ero korao veka,
keta nemipirikeiya revo ine memi veku nararo nau glori yaꞌa.
3 Aro mowmow inyia kekepikeiya em,
kepao yei veku keniniu iu ine ya God veka Krais veku kaniniu revo.
4 Taim aro bombiam sin-a inyia nepao,
lo ya God-a kyiawetari.
Ero korao veka,
pasin vou sin-a koriritao koroumo veka ero pasin vou lo koawetari.
5 Mopu kopuyarau ven veka,
Krais-a kakai ke sin memi napereoki.
Pasin vou sin via uinyia laip yaꞌa vai.
6 Beiyo nepopokeo ta nekepiroki revo iya Krais,
pasin vou sin-a inyia kepepeoki revo.
Beiyo inyia nekepiroki pasin vou sin,
aro ero via epirikeiya Krais ta esave yaꞌa revo vai.
7 Mopu mevova neman nena,
nopuyarau ke,
via nopin ke beiyo neropopepu vai.
Beiyo pasin neman-a nepao,
keniniu iu ine ya God,
veka Krais veku kaniniu.
8 Yei aro sin-a kepao ero,
aro em kekepi rovo revo ao taipetaipe mowmow ya Satan.a
Ero korao veka,
Satan ya bia nambawan vou sin-a kastat karao ato ke taim God-a meꞌri en karao ya kokai kuinyia iu revo mare.
Ku ya Ma Biam ya God-a kararo em,
kakai ke boꞌo mowmow ya Satan-a napereoki.
9 Aro kekepi veka meꞌe ya God,
via kuinyia iu pasin vou sin-a nyiavo nyiaororou laip yei vai.
Ero korao veka,
laip neman ya God-a kuinyia rovo iꞌiy.
Korao veka ta pasin vou sin-a kepepeoki revo ta via kuinyia iu nekepi roki vova pasin vou sin.
10 Row rara em po,
kuinyia iu nemiyarau veka aro nape kyiave meꞌe ya God ta aro nape kyiave meꞌe ya Satan.
Bio via inyia narereroiy Kristen raꞌai o rou raꞌa,
o via pasin niniu narao iu ine ya God,
via ave ma ya God.
Memi keta nemeremoiy revo aro ovu memi
11 Awirai en kopurivo ven ato tija veka keta noperepoiy revo aro ovu memi.
12 Via pasin ya Cha Kein pa nemikeo.
Bia yaꞌa pasin taipo ta kayeiya raꞌai awakai yaꞌa karai.
To korao vekaipe ta kayeiya raꞌai awakai ya karai?
Ero korao veka,
raꞌai yaꞌa pasin niniu karao iu ine ya God,
kopei yaꞌa pasin taipo awakai-ya karao iu ine ya God.
13 Aro Kristen raꞌai awere rou,
via nopuririko taim aro meꞌri ine nepeputrotropu.
14 Kemiyarau veka rara vou rai-ya kememeo ven ya kemikamap ven rara vou nekemi tare toratora.
Ao en kemiyarau,
ero korao veka,
kemeremoiy revo aro Kristen raꞌai awere rou.
Beiyo via neperepoiy Kristen raꞌai awere rou baunke kekepi rara vou rai.
15 Bio via narereroiy revo aro raꞌai o rou ovu yaꞌa,
karao veka bio ayei beiyo eviri.
Mopu kopuyarau ven veka,
aro yei beiyo ovu kepyei keviri ero,
laip vou uinyia toratora via uinyia iꞌiy vai.
16 Memi kemisave veka pasin vou nemeremoiy beiyo,
ero korao veka,
Yesus-a laip ya veku karereo ya karai ya kalpim memi.
Korao veka ta,
laip memi minyiao nemoiy aro Kristen raꞌai awere rou ke noelpim yei minyiao.
17 Bo bio raꞌa ao mowmow vou meꞌri en nerinyia iya ta via arererow ta alpim yaꞌa Kristen raꞌai o rou raꞌa ao va owaun reiya ero,
pasin God karererow ero via uinyia iya.
18 Mopu mevova neman nena,
taim nemirai veka pasin vou nemeremoiy aro ovu nuinyia imi,
via roꞌo nemiraraki ya nemirai kanapo vai.
Riꞌi memi keta nemoiy revo ya pasin neman-a nemao moiy.
19 Ao voro inyia emamao ero keta noriritami veka pa kemikeo awirai awakai.
Ao en kuinyia iu riꞌi mariri nau kupuana noromi taim neromi iu ine ya God.
20 To bo riꞌi memi kot-a noremirao row ao raꞌa,
kuinyia iu nekemi riꞌi mariri iu ine ya God.
Ero korao veka,
God-a ao mowmow kayarau ven ta save yaꞌa ero kotawo revo save uinyia riꞌi memi.
21 Aro Kristen raꞌai awere rou neman nena,
taim riꞌi memi via kot-a noremirao,
kemiyarau veka kekemi kemineman iu ine yaꞌa God.
Ya kuinyia iu nekame neromi iu ine ya God ta via kuinyia iu nemiriri vai.
22 Ya ao arape kemitere moa kuinyia iu naromi.
Ero korao veka,
awirai yaꞌa kemirivo ta pa kemikeo lo yaꞌa veka karererow ero.
23 Ya lo kupuana karao romi ke nemibilip mow awoꞌo ya Ma yaꞌa Yesus Krais ya nemeremoiy aro ovu veka kairai romi nemao ero.
24 Beiyo voro pa kepikeo lo ya God ero,
kepopokeiya ta kekepiroki revo iya God ta yaꞌa minyiao kakeiroki iꞌiy.
Holi Spirit-a karomi ven ta kakeiroki laip memi.
Ya ao en po inyia korao kemiyarau veka God-a kakei kura awakai memi.