Mopu keta spirit-a nopu traim yei ya noporopopoiy revo
4
Mopu aro Kristen raꞌai awere rou neman nena,
via nopubilip poiy aro nekape ipu ya nyirai popu veka,
“Spirit ya God-a awirai-ya karona.”
Mopu keta spirit voro noputraim yei ya noporopopoiy revo veka,
spirit em ya God o bauni.
Ero korao veka,
mowmow yei profet roporere mare kekepi ven boko mowmow vou meꞌri em.
2 Pasin vou nopusave yaꞌa revo Spirit ya God korao veka:
Bo bio raꞌa nairai veka,
“Yesus Krais kararo veka bio awakai” kuinyia iu nopuyarau veka Spirit ya God-a kakei iya bia emo.
3 To beiyo via awirai veka inyia nyirirai pova Yesus,
spirit voro via ekape piya God.
Spirit ero ya bio inyia ine keiyatrotroru Krais ero.
Bio ine keiyatrotroru Yesus en,
tija kopurivo veka keta nakai,
ya mare kakai ven ya kakei meꞌri en.
4 Mopu mevova neman nena,
mopu aro ya God ta awirai mopu kotawoki ven awirai yei profet roporere.
Ero korao veka,
Holi Spirit bia yaꞌa kupuana pako kuinyia iya ero,
boko kako ven ta kakeiroki laip mopu ya katawoaka Satan,
bia yaꞌa inyia kanoi cha row meꞌri en.
5 Aro em,
inyia keperepore revo ao vou meꞌri en.
Korao veka ta awirai prumo kyirai pore ao vou meꞌri ve.
Ta aro vou meꞌri en inyia ova koroꞌoi revo ke awirai yei nerivo.
6 Memi aro ya God,
korao veka ta aro voro kesave yaꞌa God ero,
awirai memi inyia kerivo.
Ta yei aro via yiave aro ya God,
awirai memi via erivo.
Ya rara em po,
kuinyia iu nemiyarau revo Spirit vou awirai awakai ta spirit vou roporere.
Beiyo narererova revo God keta narereroiy revo aro ovu
7 Mopu aro Kristen raꞌai awere rou neman nena,
memi veku keta nemeremomi revo aro Kristen raꞌai awere rou.
Ku vou korao veka,
God-a yaꞌa veku ku vou pasin vou narereroiy revo aro bombiam.
Beiyo pasin vou neperepoiy aro bombiam-a nuinyia iꞌiy,
kesave yaꞌa revo God ta kekepi veka meꞌe yaꞌa God.
8 Bio pasin vou narereroiy revo aro ovu via nuinyia iya,
via asave yaꞌa God.
Ero korao veka,
God-a yaꞌa veku ku vou pasin vou narereroiy revo aro ovu.
9 God-a kasalim yaꞌa Ma moikera yaꞌa po kararo meꞌri en ke kuinyia iu laip vou uinyia toratora nemiko mow boꞌo voro karao romi ero.
Ya pasin emo God-a kariritami revo koroumo veka karereromi revo.
10 Pasin vou nemeremow,
ero pasin awakai ya God.
Memi via nemitoro veka kemeremova God ato tija.
Bauni.
Kopei po God-a karereromi ato tija ta Ma moike yaꞌa po kasalim yaꞌa kararo meꞌri veka ofa ke sin memi napereoki.
11 Mopu aro Kristen raꞌai awere rou neman nena,
pasin ve God-a kariritami veka karereromi revo.
Korao veka ta memi minyiao keta nemeremoiy revo aro ovu.
12 Bio raꞌa via apirikeiya God vai.
To bo nemeremoiy revo aro ovu,
God-a keta boko nako ya nakeiroki laip memi ya pasin yaꞌa arereromi revo ero keta nuinyia imi kupuana.
13 Memi kemiyarau veka kemipomokeiya ta kekemiroki revo iya God ta yaꞌa minyiao kakeiroki laip memi.
Ero korao veka,
Spirit ya karomi keta nakeiroki laip memi aro bombiam nape kemipomokeiya ta kekemiroki revo iya God.
14 Ya ao en Cha Tata God-a karao kemipirike ven.
Kasalim yaꞌa Ma yaꞌa kararo ke nako yei varu aro bombiam vou meꞌri en.
Korao veka ta awirai vou ao en kemipirike ta kemirirai.
15 Bo bio raꞌa nairai veka,
“Yesus yaꞌa Ma Biam ya God,”
God-a kaporokeiya ta kakeiroki revo laip ya bia en ta bia em minyiao kaporokeiya ta kakeiroki revo iya God.
16 Korao veka ta nemiyarau revo veka,
God-a karereromi revo.
Ya laip memi veku kemow revo pasin yaꞌa.
God-a yaꞌa ku vou pasin vou narereroiy revo aro ovu.
Ya beiyo neperepoiy revo aro ovu,
kepopokeo ta kekepiroki revo iya God ta God-a yaꞌa minyiao kakeiroki iꞌiy laip yei.
17 Bo nemeremoiy revo aro ovu ya nekemiroki pasin ya Krais-a karao taim kakei meꞌri en,
pasin em keta nuinyia imi kupuana.
Taim kekemi meꞌri en,
kekemi veka Krais veku.
Korao veka ta via kuinyia iu ova nemikinakinao pako ta nemiriri mow de pako vou kot ya God-a keta nokamap meꞌri en.
18 Via nemiriri moa God kanapo vai.
Ero korao veka,
karereromi revo ta ao en korao kekemiroki revo pasin vou nemeremoiy revo aro ovu.
Ya pasin vou nemeremoiy revo aro ovu,
inyia koririkeoki pasin vou riri.
Bo nemiriri moa God,
ero koriritao veka,
kemiriri mow ao taipo God-a keta narao romi ero.
19 Memi inyia kemeremoiy revo aro ovu,
ero korao veka,
God-a yaꞌa veku karereromi ato voꞌo.
20 Bo bio nairai veka,
“Kanerenova God,”
ta ine kareitrotroru ta via arereroiy revo Kristen raꞌai o rou raꞌa,
bia en yaꞌa bia roporere.
Bo via nemeremoiy aro ovu inyia kemipirikei revo ine memi veku ero,
to korao vekaipe ta nemeremova God,
bia voro memi via emipirikeiya revo ine memi?
21 Lo ya Krais-a karomi korao veka:
Beiyo neperepova revo God,
keperepoiy minyiao Kristen raꞌai o rou raꞌa.