Kristen-a kebilip pova Ma ya God
5
Beiyo kebilip veka Yesus yaꞌa Krais,
kekepi veka meꞌe ya God.
Beiyo mowmow neperepova revo aka moike,
keperepoiy revo meꞌe ya minyiao.
2 Taim nemeremova revo God ta pa nemikeo lo yaꞌa,
kuinyia iu nemiyarau veka kemeremoiy revo aro meꞌe ya minyiao.
3 Bo nemeremova revo God,
keta pa nemikere lo yaꞌa.
Ta lo yaꞌa ero,
kereneman ta nai rere kowaun.
4 Beiyo nekepi veka meꞌe ya God,
kupuana vou meꞌri en via kuinyia iu notawoiki ta norao nerepi vai.
Yesus-a roma en katawoki veꞌen.
Memi inyia kemibilip mova Yesus ya rara em po,
roma en kemitawoki ya kupuana vou meꞌri en kemyewome.
5 Bio nape katawo kupuana vou meꞌri en ta kaiyevo?
Aro nape inyia nebilip veka Yesus yaꞌa Ma Biam ya God,
yei aro en po inyia ketawo kupuana vou meꞌri ta kepyewope.
Yesus yaꞌa bia bekaipe?
6 Yesus Krais,
bia em yaꞌa kakei heven ta kararo meꞌri.
Ta Cha Jon kabaptaisim yaꞌa row pii ya kopei karai ya noꞌo kawere.
Via abaptaisim yaꞌa row pii kanapon vai.
Baun ben!
Kakai row pii nau noꞌo minyiao.
Holi Spirit yaꞌa ku vou awirai awakai,
ta inyia pasin ya Yesus Krais-a kairirai.
7 Ao 3-pla kerirai revo awirai moikerao po veka,
Krais bia God-a veku kasalim yaꞌa kakai.
8 Holi Spirit,
pii nau noꞌo.
Ao 3-pla emo po awirai moikerao kerirai.
9 Taim aro vou meꞌri en awirai-ya nyirirai pow pasin yei,
inyia kemibilip mow revo awirai yei.
Korao veka ta nemibilip mow revo awirai ya God-a karomi ero.
Ku vou korao veka,
yaꞌa God ta awirai yaꞌa inyia karomi ero,
akai vou kopako ta kotawo revo awirai yei beiyo kanapo vou meꞌri en.
Ero korao veka,
yaꞌa via bia kanapo vou meꞌri en vai,
yaꞌa God ta awirai en kairirai romi ero,
awirai em ya Ma Biam ya veku.
10 Bio nabilip rova Ma Biam ya God,
awirai en kuinyia riꞌi yaꞌa ta kuinyia iu nairirai.
To bo bio via nabilip row awirai God-a kairirai ero,
bia em kairinaka veka God bio roporere.
Ku vou korao veka,
bia emo via abilip row awirai ya God-a kairirai rova Ma yaꞌa em.
11 Ya kopei awirai en God-a kairirai ero korao veka:
God-a laip vou uinyia toratora karomi.
Ta Ma Biam yaꞌa ero,
yaꞌa ku vou laip em.
12 Beiyo nepopokeiya Ma Biam ya God,
laip vou uinyia toratora kuinyia iꞌiy.
Ta yei beiyo via epopokeiya Ma Biam ya God,
laip vou uinyia toratora via uinyia iꞌiy.
Kuinyia iu nemiyarau veka laip vou uinyia toratora keta nuinyia imi
13 Awirai en kaneꞌe nopu aro kopu bilip pow awoꞌo ya Ma Biam ya God,
ke nopu yarau veka laip vou uinyia toratora kuinyia ipu.
14 Memi via emiriri taim beten-a kemao kemitere moa God rore ao.
Korao veka ta memi kemiyarau veka,
bo beten-a nemao mow ao raꞌa God-a veku karererore nemiko,
beten memi keta narivo.
15 Kemiyarau revo veka,
God-a ao mowmow beten-a kemao kemitere moa ero karivo ven.
Korao veka ta ao arape kemitere moa,
kemiyarau veka ao en kemiko ven.
16 Bo bio raꞌa napirikeo rou o raꞌai raꞌa sin-a narao,
ta sin voro via kuinyia iu norao nareiroki hel,
beten-a keta narao roa God ke laip vou uinyia toratora naoroa.
Ta sin ovu kuinyia iu nererao bio narei roki hel.
Nena via anairai now beten-a narao roa God row ao veka em vai.
17 Pasin mowmow via ereniniu,
ero sin.
Ta ao taipetaipe ovu,
via kuinyia iu nererao bio nakei reiya God-a rarapa ta narei roki hel vai.
18 Kemiyarau veka beiyo nekepi veka meꞌe yaꞌa God,
via epopokeo pasin vou sin vai.
Ero korao veka,
Ma Biam ya God-a inyia kaorerariy revo aro meꞌe ya God ta via arin Satan-a eno areretaka.
19 Kemiyarau veka memi aro meꞌe ya God,
ta yei aro bombiam kekepi meꞌri en kepia kekepi roko Satan.
20 Kemiyarau ven veka Ma Biam ya God-a kararo ven ta ruru neman-a karomi ke nemisave yaꞌa revo God awakai.
Korao veka ta mare kemipomokeiya ta kekemiroki revo iya God eri Ma Biam ya Yesus Krais.
Yesus yaꞌa veku po God awakai ta yaꞌa veku ku vou laip vou uinyia toratora.
21 Mopu mevova neman nena,
nokepi pei god roporere revo rarapa.