Pas Cha Pol kareꞌe roa
Cha Filemon
1
Nena Cha Pol,
nena kakeni bio kalabus ya Krais Yesus.a
Ma Filemon,
memi aro kemibilip mova God ta kekemi veka aro noꞌo yaꞌa veku.
Mepi raꞌai memi Cha Timoti,
kepiperepoma revo veka raꞌai awakai memi.
Ta mema minyiao kakemi imi boꞌo ya Yesus-a nemao.
Ta pas en kepipepoma.
2 Pas en kepipeꞌe popu aro emo:
Mema veku,
rou memi Kwa Apia minyiao,
ta yaꞌa Cha Arkipus,
bio yaꞌa kakei veka soldia kupuana ya God ta karoi rovo imi roma pako en.
Ta yei aro bombiam vou sios inyia kekape ta kyiopokeo oꞌro moma minyiao.
3 God Cha Tata memi eri Biapako Yesus Krais kuinyia iu neraimarimarib popu ya riꞌi mariric neraipopu.
Pasin neman ya Cha Filemon korao Cha Pol ova korova revo
4 Umumo taim beten-a kanao noa God nena,
ova inyia kanakinao noma ya oꞌti kaonoa God.
5 Ku vou korao veka,
inyia kanarivo veka mema bio riꞌi va kaomoa Biapako Yesus ta inyia pasin neman-a kamao moa.
Ta pasin veka emo minyiao kamao moiy aro bombiam mowmow kebilip pova God.
6 Nena beten-a inyia kanao kanatere noa God ke bilip mema narao nokupuana ke kuinyia iu namalpim yei aro bombiam yaꞌa,
ta yei minyiao kuinyia iu nepao naromi kupuana.
Bo norao veka,
God-a veku keta boꞌo awakai-ya narao ke namayarau veka,
ao neman inyia kerekamap imi rimoꞌo kuro,
emo ao rere keta awoꞌo ya Krais-a nemavoko nake.
7 Raꞌai,
mema kameremoiy revo aro bombiam kebilip pova God.
Ta pasin en kamao riꞌi korei kupuana ta kebilip pova Krais Yesus ta boꞌo awakai-ya kepiapao.
Ta ao en korao ova korona revo ta riꞌi mariri kanako.
Ku vou vevo po,
ta inyia beten-a kanao ya oꞌti kaonoa God.
Cha Filemon keta nako yaꞌa varu Cha Onesimus veka raꞌai awakai
8 Row awoꞌo yaꞌa Krais awirai kupuana kanairai noma awarape keta namao ta nena via anariri vai.
9 Ta nena kanayarau veka,
via kuinyia iu nanairai nama ao en namao vai.
Pasin vou nameremoiy aro bombiam ovu,
ero ao pako mepi minyiao.
Korao veka ta nena keta awirai-ya nanairai noma mariro.
Nena Cha Pol,
ya koranaore ven ta mare kakeni bio kalabus vou awirai ya Krais Yesus.
10 Ta nena kanake nanatere noma ke pasin neman-a namao moa bio raꞌa kakei veka ma nena.
Taim kakeni roki kalabus,
bio ve kakai ina ya kanalpim yaꞌa ta kabilip rova Krais.
Ya mare karao veka ma awakai nena,
awoꞌo yaꞌa Cha Onesimus.
11 Tija kataipia ta via boꞌo neman-a arao ke noelpim mema vai.
Ya kopei mare emo kave bio neman awakai ke kuinyia iu boꞌo nalpim mepi.d
12-14 Bio ve,
kanerenova revo.
Kanitoro nanaivia nakei ina ve bopo nako woma ke nalpim nena.
Ero korao veka,
boꞌo va kanakupuana now awirai neman ta keperenaki kakeni roki kalabus.
Ta mare kanasalim yaꞌa veꞌen kanoi ima varu.
Ta ve korao kanaokoku nova revo.
Ta via ao raꞌa nanao ruru nena vai taim tok orait-a via amona.
Ta mema veku awarape kamayarau veka koneman ta kamake namao ke noelpim nena,
nena keta nanapirikeo po ta via nanaririkema vai.
15 Awakai,
Cha Onesimus karerema po taim korama.
Awenari ao en kokamap ke kuinyia iu namako yaꞌa varu ya nakei ima toratora.
16 Mema via namapirikeiya Cha Onesimus veka wokboi kanapo mema vova vai,
baun ben!
Kuinyia iu nakei veka wokboi kanapoe mema,
ya kopei mare keta namapirikeiya veka raꞌai awakai mema.
Nena veku kanayaraka ven veka raꞌai awakai ta riꞌi nena kuinyia rova.
Ta mema minyiao keta nameremova revo.
Ero korao veka,
kave wokboi ta raꞌai awakai mema row awoꞌo ya Biapako.
17 Bo namapirikena nanave kura mema row boꞌo ya Krais ta inyia pasin neman-a kamao mona,
keta namako yaꞌa varu Cha Onesimus ya pasin veka inyia kamao mona ero namao moa minyiao.
18 Bo rong-a raꞌa narao o dinau ovu narao ima ta via nabekim,
keta namin nuinyia eno peꞌe nena veku.
19 Nena Cha Pol pas ve kaneꞌe noma eno nena veku.
Nena veku ketao vou dinau keta nanoma.
Nena kuinyia iu nanairai veka laip mema dinau korao ina.f
Ta nena via awirai vou ao en nanairai now vai.
20 Raꞌai nena,
mepi kepikepi veka aro ya Krais.
Row awoꞌo ya Biapako,
kanerenoma keta pasin neman-a namao mona ke namao riꞌi nerena kupuana ya kuinyia iu riꞌi mariri nanako.
21 Nena kanayarau ven veka ao en kaneꞌe kerinyia pas emo keta namao.
Ya mema keta pa va namikeo revo ya namao notawoki pasin mare kanatere noma namao.
22 Ta nena ao raꞌa vova kuinyia ina keta nairai noma.
Nena kanabilip veka God-a keta beten mopu narivo ya rara narao rona nakane nanapirikepu.
Korao veka ta oꞌro mema keta rum raꞌa namaonao mona ke kuinyia iu nanainyia taim nakane nakeni ipu.
Aro boꞌo kepao piya Cha Pol umonai neman-a kesalim poa Cha Filemon
23 Cha Epafras umonai neman yaꞌa kasalim roma.
Kepikepi minyiao kalabus row boꞌo ya Krais Yesus.
24 Yei aro boꞌo kemao minyiao emo,
umonai neman-a kesalim poma.
Aro vevo:
Cha Mak,
Cha Aristarkus,
Cha Demas ta ya Cha Luk.
25 Marimari ya Biapako Yesus Krais kuinyia iu nuinyia iu spirit mopu.