Namba tri pas
Cha Jon kareꞌe
1
Nena Cha Jon,
hetman vou sios ya God,
pas ve kaneꞌe konoi roma,
Kristen raꞌai neman nena Cha Gaius.
Memi aro awirai awakai ya God-a kemiyarau ven ero ya ku vou vevo po ta inyia kanerenoma revo nakemi veka kura neman nena.
2-3 Ova korona revo taim kanarivo veka yei Kristen raꞌai awere rou ovu kerekare kerirai rona veka,
mema inyia kamabilip mow awirai awakai ya God,
ta ao mowmow kamaremare ero,
pa korikeo po awirai awakai ya God.
Korao veka ta Kristen raꞌai neman nena,
beten-a inyia kanao noa God rore ao prumo kamao ero,
keta nereneman po ya mema veku kuinyia iu nakemi oꞌto notema veka spirit vou bilip mema inyia kakei revo.
4 Taim kanarivo veka aro mevova nena awirai awakai ya God kyiavo kupuana ta pa kepikeo,
oꞌto pako awakai-ya kotena kotawo oꞌto tija koko nena ero.
Cha Gaius pasin neman-a karao roiy Kristen ovu
5 Kristen raꞌai neman nena,
mema bia ya pa kamikeo revo awirai awakai ya God.
Mema ta inyia kamalpim yei Kristen raꞌai raꞌa awere rou mema veku via amasave yei revo.
Korao veka ta pasin mema amalpim yei aro ovu ero,
ero ao pako awakai ta koriritao mak vou bilip mema.
6 Ovu yei Kristen raꞌai awere rou memi kenopi keyarama ya kopei kekapeka varu kyirirai poiy aro bombiam vou sios em veka,
pasin neman-a inyia kamao kameremoiy revo aro bombiam ta kamalpim yei minyiao.
Ya mare keta nekape nepirikema vova ya taim kepake nepepema nenopi boko raꞌa,
koneman bo ao ovu namalpim yei ke kuinyia iu neko nenopi nau.
Keta namalpim yei nuinyia iu veka mak God-a veku karereroma namao ero.
7 Ero korao veka,
boꞌo ya Yesus-a kepao,
ta inyia kyiute kyiararao boko mowmow awirai-ya kyirirai poiy beiyo row awoꞌo ya Yesus.
Ya taim boꞌo ve kepao kyiararao,
ao va raꞌa via ekopeiy aro via ebilip pova Krais vai.
8 Korao veka ta nemielpim yei aro veka ke kuinyia iu nemao veka aro boꞌo kemao minyiao ke kupuana nemow awirai awakai ya God.
Cha Diotrefes pasin neman-a via arao
9 Bio ve Cha Diotrefes inyia uruku kayeyeu kairai yaꞌa veku nanoi rore ao mowmow va cha.
Awirai memi via arivo ta pa arikeo vai.
Korao veka ta pas-a kaneꞌe konoi roiy ven aro bombiam vou sios kuirai roiy row ao en.
10 Korao veka ta,
taim nakanka boko mopu,
pasin yaꞌa arao ero keta nanairirai.
Bia ya ta awirai-ya kairirai kakami ta kabagarapim memi.
Ta via pasin ve po arao vai,
aro Kristen raꞌai awere rou nape inyia kekape ta awirai-ya kyirirai ero via ako yei enopi oꞌro yaꞌa vai.
Ya taim aro vou sios yaꞌa kepake neko yei Kristen raꞌai awere rou va nenopi oꞌro yei ke awirai-ya nyirirai,
inyia karaorariy ta karirikei minyiao via nekepi vova sios vai.
Cha Demitrius pasin neman-a karao
11 Kristen raꞌai neman nena,
mema via pa namikere pasin taipetaipe vai.
Keta pasin neman po pa namikere.
Beiyo pasin neman-a epao ero,
yei aro ya God.
Ta yei beiyo pasin taipetaipe epao ero,
yei via esave ya revo God.
12 Cha Demitrius emo,
beiyo mowmow inyia kyirirai pova row pasin neman yaꞌa.
Ta awirai awakai ya God ero minyiao kuirirai row pasin neman vou laip yaꞌa.
Korao veka ta row rara ve po,
awirai awakai ya God minyiao kuirirai row pasin neman yaꞌa.
Ya memi minyiao inyia kemirirai mow pasin neman yaꞌa ta mema namayarau veka awirai memi ero awakai revo.
Hetman vou sios-a karake napirikeiya Cha Gaius
13 Awirai prumo kerinyia ina ke nanairai noma.
Ta nena konina via awirai ve naneꞌe nerinyia pas em vai.
14 Nena veku ova kanakinao veka keta nakane nanapirikema ya nepikepi minyiao awirai-ya nepipirai po roꞌo.
15 Biapako kuinyia iu blesin-a naroma ya riꞌi mariri namako.
Ta yei Kristen raꞌai awere rou mema kekepi ina emo,
umonai neman-a kesalim poma.
Keta namairai moiy Kristen raꞌai awere rou moike moike nena vere veka,
umonai neman nena kanoi nau.