Cha Timoti keta naorerariy aro bombiam veka aro noꞌo yaꞌa veku
5
Beiyo kepaovope ven via namatovei.
Awirai-ya namairai namananare moiy revo mariro veka kamao moa aka mema.
Pasin veka emo keta namao moiy minyiao aro biam yangpla veka inyia kamao moiy aro raꞌai mema veku.
2 Ya pasin veka emo minyiao keta namaomore aro bom kereravore ven veka kamaomore aro moꞌo mema veku.
Ta pasin ve minyiao keta namaomore aro bom yangpla veka kamaomore aro rou mema veku,
pasin emo koneman ta koniniu iu ine ya God.
Bia nape keta naorerarire aro bom am-a keviripere ven?
3 Mema keta namaoremarire revo aro bom am-a keviripere ven ero ya pasin neman-a namaomore.
4 To bo bia bom am-a narai reo ven ta yei meꞌe o apoti o oputi po nerekeri,
boꞌo namba wan rere iu ine ya God keta neyorerariu revo aro famili rere veku.
Korao veka ta kuinyia iu nereyorerariu revo opu pana ve.
Pasin ve keta nererao roiy aro aka moꞌo rere.
Ero korao veka,
taim keremememe,
aka moꞌo boꞌo kepao pore.
Ta pasin ve koneman iu ine ya God.
5 Bo bia bom raꞌa,
am-a narai reo ya vou unake po nokei ta aro via nyiorepariu,
keta nobilip rova revo God ya umo roro beten-a inyia norarao notere roa God ke nalpim vou.
6 To bia bom am-a karai reo ven,
ta kokei inyia kokoku rore revo pasin vou meꞌri ve,
koritoro veka kokei tare,
ta vou veku kokei veka bio orai ven.
7 Korao veka ta,
mema keta namairai more revo aro bom am-a keviripere ven ero,
ke pa nererikeo pasin vou beten-a nererao roa God.
Ya pasin neman-a nererao rore aro bombiam ovu ke via nerevitikere veka rong-a kererao vai.
8 Yei aro via yiorepariy aro noꞌo yei awei aro ovu inyia kekepi piy oꞌro yei ero,
bilip yei kepepeo ven ya ketaipei revo ketawoiki vova aro haiden row pasin taipetaipe awakai.
9 Mema keta awoꞌo namako nanare aro bom am-a keviripere ven ero ta anini rere kotawo 60.
Aro bom ve,
biam-a kererunai ya kopei biam-a keviripere ya rere po kerekeri ta via am tare ererunai vova vai.
10 Bia bom ve awoꞌo neman-a koko ta inyia boꞌo neman neman-a korarao.
Boꞌo veka ta korerariy revo meꞌe vou veku ya aokorom-a koko koroiy aro ovu yei boko raꞌa.
Aro ve kekape ta oꞌto kotei roiy aro kebilip pova God,
ta kekape oꞌro vou ya pii va kom-a koreiniri.
Kopei boꞌo raꞌa vova,
keta noelpim yei aro bombiam taim nai-ya nereko,
ke boꞌo awakai mara neparepare.
Mopu keta awoꞌo nopukonare aro bom veka vevo po.
11 Mema viake awoꞌo va namako nanare aro bom yangpla am-a keviripere ven ero vai.
Ero korao veka,
keta ova norareko vova ke am-a nererunai.
Ao en kuinyia iu norao oreva nerero boꞌo ya Krais.
12 Bo pasin veka nokamap,
aro bom ve taipo kereko iu laip rere veku ta via pa va ererikeo promisa tija kererao ero.
13 Ao raꞌa minyiao,
keta neyonire ya oꞌro yei aro ovu nerekirokiro.
Ta via pasin ve po ererao vai,
bauni.
Keta neretovatova ya ao rere aro ovu ererao ero keta neyirirai roiy ta ao raꞌa minyiao keta neriraikakai aro ovu.
Korao veka ta awirai prumo kereyirirai ero via nemirai vai.
14 Nena kanairai veka,
aro bom ve am-a keviripere ven ero,
biam-a keta nererunai vova ya meꞌe va nereavei ya neyorerariu revo oꞌro rere.
Bo nererao veka,
aro ine epemi trotropu,
rara yei nebagarapim yei aro bombiam ebilip ero keta nowaunki rei.
15 Aro bom ovu am-a keviripere ven ero,
kererovoruki ya rara neman-a kererereo ya pa va kererikeiya Satan.
16 Bo bia bom raꞌa nobilip rova Krais ta aro bom ovu am-a keviripere ven nerekeri iu veka aro famili vou,
boꞌo vou keta noelpim rere.
Ya ao en via kuinyia iu nai-ya noroiy sios-a nyioreparire vai.
Sios-a kuinyia iu nyioreparire aro bom am-a keviripere ven ero ta via beiyo yioreparire.
Memi keta nemoremariy revo aro boꞌo vou sios-a kepao ta kenopi cha
17 Aro kenopi cha ta boꞌo vou sios-a kyiorepariu ero,
boꞌo yei kepao koneman revo.
Sios-a keta awoꞌo yei nyiavoko nake ya ketao va nebaim yei cha vo ya kopei aro ovu.
Ta yei ovu boꞌo kepao revo ta skul-a kepoiy aro bombiam ta awirai-ya kyirirai ero,
sios-a keta oꞌto notei roiy cha.
18 Emo korao veka,
awirai-ya kemiritim kuinyia buk ya God-a kuirai veka,
“Taim bulmakau va boꞌo norao noroitatare rais ke tao va nereriririu,
viake roꞌo va nopuapo vai.”b
Mopu awirai raꞌa kopuyarau kuirai veka,
“Yei wokman vou sios,
ketao va keta neko pow boꞌo yei epao ero.”
19 Awirai ya bio raꞌa via namarivo moa navitikei beiyo enopi cha,
boꞌo vou sios-a yiorepariu veka rong-a kepao.
Bo beiyo riepin o beiyo 3-pla nepirikei veka ao en kepao,
kuinyia iu namarivo.
20 Bo raꞌa yei wokman vou sios-a sin-a baunke inyia narao,
keta pasin yaꞌa namairirai revo ine yei aro bombiam ovu vou sios,
ya yei ovu minyiao keta neriri ya via nepao veka.
Cha Timoti keta pasin yaꞌa veku naorerariu
21 Kanairai noma revo iu ine ya God,
ta Krais Yesus awei ensel yaꞌa veka,
keta namaoremamiu revo boꞌo mowmow kanairai noma ero.
Pasin ve po keta namao moiy minyiao aro bombiam mowmow.
Pasin neman-a via namao moiy po aro voro kameremoiy ero vai.
22 Ta via noririkema bereren ke eno nameretai aro enopi cha ya namamompe yei boꞌo ya God-a nepao vai.
Bo namao veka,
God-a keta napirikema veka mema minyiao kakemirovo miy aro voro eno kameretai ta kamamompe yei ero,
pasin taipo kamao.
Korao veka ta namaoremamiu mema veku ke kuinyia iu namaniniu revo iu ine ya God.
23 Mema viake pii po namaton.
Koneman wain mentanaka namatonko ke noelpim vou riꞌi mema ta a inyia orama ero norerema.
24 Aro sin-a kepao ero,
sin yei kuinyiaka vatiron ya konoi roiy cha kuinyia ven kot.
Ta yei aro ovu kekepi rokipe ta sin-a kepao ero,
ya kopei sin yei kokai vatiron.
25 Korao veka ta,
pasin neman neman keta nerekare vatiron.
Kopei pasin neman ovu kerinyia rokire ero,
via kuinyia iu nerinyia rokire nau vai.