Awirai roporere kopaulim yei aro bombiam ta bilip awakai yei kepepeo
4
Holi Spirit-a awirai-ya kairirai veka kokai paire,
beiyo ovu keta nerovoru ya bilip yei nepepeo.
Ero korao veka,
teve ketetei spirit voro inyia keropopei beiyo ta pa kepikei spirit taipo.
2 Aro roporere keta awirai roporere nyirai poiy aro bombiam.
Ruru yei aro vevo kopaul ta via kuinyia iu reka noyoe row sin yei epao ero vai.
3 Aro ve ine kenanaopariy aro bombiam via om-a nepunare o biam-a nererunai,
ta aokorom ovu minyiao via nepa vai.
Ta aokorom ve God-a karao romi aro bombiam ve kemibilip ta awirai awakai yaꞌa kemisave revo ero,
kuinyia iu nemiko nema ya oꞌti neumoa.
4 Ero korao veka,
ao mowmow God-a kararerare kereneman revo.
Via nemirai veka ao en keretaipo vai.
Ao en kemiko keta oꞌti neumoa God.
5 Awirai ya God nau beten memi inyia korao ao en kereholi.
Cha Timoti keta nakei veka bia niniu ke boꞌo ya Krais-a narao
6 Bo awirai ve inyia namairirai nonoi roiy aro bombiam ebilip,
mema wokboi neman ya Krais Yesus.
Kupuana keta namako mow awirai neman inyia kemibilip mow ero nau ruru neman ta skul voro pa kamikeo ero.
7 Mema awirai roporere ku vou kowaun ero,
row pasin vou meꞌri ve via namarivo vai.
Oreva namow awirai voro ya pa namikeo rara neman ke norao naromi kupuana ya pa namikeo pasin neman iu ine ya God.
8 Mema kamasave veka,
bo kemake reka memi nemao nokuprapana,
keta trening-a nemiko vo,
ke noelpim memi.
Ta ao en koelpim memi po taim korama.
Bo pa nemikeo pasin neman awakai iu ine ya God,
ao en keta norao nemikupuana vova ke.
Laip mare kekemi emo kuinyia iu noelpim memi ta laip voro keta noelpim memi minyiao kokai pa ere.
9 Awirai ve mare kanake nanairai nopu emo,
awirai ve awakai ya mowmow memi keta nemirivo ya nemibilip.
10 Nemibilip mova revo God voro kakei toratora,
bia ya nako memi varu aro bombiam mowmow.
Awirai ve,
emo awakai revo,
keta natuvori romi aro emibilip mova.
Korao veka ta boꞌo kupuana va kemao mow ao en,
ya inyia kekemikeiya ke narao romi revo.
11 Awirai ve keta namairai moiy aro bombiam ya skul-a inyia namoiy ke pa nepikeo.
12 Keta nepirikema veka mema bia yangpla,
ta via nepitoro veka mema bia kanapo vai.
Bauni.
Pasin neman maramara keta namao,
ke aro ebilip ero neyarau ya pa nepikeo.
Awirai neman keta namairirai ya pasin neman po pa namikeo.
Pasin vou nameremoiy revo aro ovu,
keta nuinyia ima ya namabilip mova God ya nakemi namaniniu revo iu ine ya God.
13 Nostat mare ya nonoi nuinyia iu taim nakane,
keta boꞌo va namao naromi kupuana ke awirai ya God-a namaritim moiy aro bombiam-a nererivo,
ya ku vou awirai ve namairirai ya skul-a namoiy pasin ve God karererow.
14 Taim aro vou sios-a eno keperetama,
ya taim ve,
raꞌa yei awirai profet-a kairai rova God kupuana karoma ke boꞌo ve namao.
God-a boꞌo ve karoma veka presen,
keta namao viake namamalolo.
15 Boꞌo ve keta baunke inyia namao,
viake namamalolo vai,
nonoi nuinyia iu aro mowmow pasin nau boꞌo mema nepirikeo veka koneman ta inyia konoi.
16 Boꞌo nau pasin mema namaoremamiu revo ya skul-a namoiy aro bombiam.
Taim boꞌo ve po inyia namamao,
God-a keta nako mema varu awei aro awirai mema erivo ero.