Aro inyia kenopi cha boꞌo vou sios-a kepao ero keta pa nepikeo revo pasin neman
3
Awirai ve keta nanairai nopu emo,
emo awirai awakai.
Bo bio narererow revo boꞌo veka wasman vou sios-a nako,
boꞌo ve koneman revo ke narao.
2 Bio karake nave wasman keta pa narikeo po pasin niniu,
ke beiyo via kuinyia iu rong-a raꞌa nepirikeo piya vai.
Ya om moikera po nako ya nakeiyo toropo ya ao va naorerorow revo vo,
ya kopei narao.
Keta naorerariu yaꞌa veku ya pasin neman po pa narikere ya beiyo kuinyia iu awoꞌo yaꞌa nyiavoko.
Ao raꞌa minyiao,
keta pasin neman-a narao roiy aro inyia kekape oꞌro yaꞌa,
ya keta nayarau revo rara vou skul-a naroiy aro bombiam.
3 Viake naspak.
Viake o va neiyaroro ya roma narao iꞌiy aro ovu.
Keta namariro roiy.
Ta via narererow revo ketao.
4 Keta naorerariu revo om-a awei meꞌe yaꞌa,
ya narao mevova awirai yaꞌa neyarau revo ya pa va nepikeo.
5 Bia nape via kuinyia iu naorerariu revo om awei mevova yaꞌa veku,
via kuinyia iu boꞌo vou naorerariu sios ya God-a nako vai.
6 Kristen tare via kuinyia iu boꞌo vou wasman vou sios-a nako vai.
Boꞌo ve bo narao,
ruru taipo kuinyia iu nokai iya ya awoꞌo yaꞌa veku navoko ya pianoreria ya God-a kuinyia iu kot-a neyarao minyiao veka kot-a keriarao Satan.
7 Bio karake boꞌo vou sios-a nako nanoi roiy cha,
keta awoꞌo neman-a nako.
Aro voro via ekepi sios aꞌari minyiao keta awoꞌo yaꞌa nyiavoko ya nyirai veka bia emo kaneman.
Ya bia emo kuinyia iu boꞌo vou sios-a navo nanoi cha.
To bo bio awoꞌo taipo nako,
bio ve keta awirai maramara nyirai nebagarapim yaꞌa,
ya Satan-a kuinyia iu naivia naororova veka trep-a aomeꞌe va koawere.
Aro boꞌo vou sios-a kepao ero keta pa nepikere pasin neman
8 Korao po veka ta,
wokman ovu kemompe ke boꞌo nepao sios aꞌari,
yei minyiao keta awoꞌo neman-a nuinyia iꞌiy ya nerispetim yei.
Viake nespak ya ao va neperepore ya rara maramara nyiorenanare ke ketao va aokakana va nepao voiy aro ovu vai.
9 Yei veku keta neyarau veka keniniu iu ine ya God.
Yei keta awirai awakai God-a karomi aro kemibilip mova ero keta nyiavo kupuana.
10 Mopu keta nopuyarai revo vo,
bo aro ve via nai-ya neparepare,
kuinyia iu boꞌo vou sios-a nopoiy.
11 Aro bom yei minyiao,
keta pasin neman-a nererao ya awoꞌo neman-a nereko iu ine yei aro ovu.
Viake awirai-ya neriraikakakai o to va nerevitikei aro ovu.
Rere keta neyorerarire rere veku ya nere daunim rere ya boꞌo ve kepore emo nererao revo.
12 Wokman vou sios keta om moikera po nako ya naorerariy revo aro mevova yaꞌa awei aro mowmow inyia kekepi piya oꞌro yaꞌa ero.
13 Bo wokman vou sios-a boꞌo yei nepao revo,
keta aro mowmow awoꞌo yei nyiavoko revo ya kuinyia iu neropi kupuana,
ta wokman vou sios via kuinyia iu neriri pow nyirai veka bilip yei kuinyia rova Krais Yesus vai.
Ku vou pasin vou bilip memi
14 Mare kanake nakane nanapirikema,
ta ova kanakinaoko veka awirai ve nanenoma vo.
15 Bo via nakane bereren,
kuinyia iu awirai ve kerinyia rovore pas ve namapirikere ke noriritama pasin neman ve,
memi aro ya God keta pa va nemikeo.
Memi aro ya God,
kekemi veka sios ya God laip-a kuinyia iya toratora.
Ya sios ve korao veka para kupuana ta topa anai kopoi nau awirai awakai ya God.
16 Memi mowmow awirai awakai kemiyarau revo veka,
beiyo keta pasin neman-a nepao revo iu ine ya God ero,
ao en kopako revo.
God-a kariritami veka,
Kakai veka bio awakai
ta aro bombiam-a kepirikeiya ine yei,
ya Holi Spirit-a kariritao veka pasin yaꞌa koniniu revo
ta rere ensel minyiao kere pirikeiya ine rere.
Aro voro awirai yaꞌa keko
ta kyirirai konoi boko mowmow vou meꞌri ve,
ta yei aro bombiam vou meꞌri ve
kerivo ya kebilip pova,
ya God-a kako yaꞌa kakoi nake
ya kakei bo vou lait pako awakai.