Beten-a keta nemao nemitere moa God ke nalpim yei aro bombiam
2
Ao en kanerenow revo keta namao vo,
namairai moiy aro bombiam mowmow beten-a nepao poa God.
Ya oꞌti neupoa ya netere poa ke nalpim yei aro bombiam mowmow.
2 Beten-a keta nepao netere poa ke nalpim yei king awei gavman ta memi mowmow kuinyia iu riꞌi mariri nemiko ya nekemi revo.
Ya kuinyia iu pa nemikeo pasin neman iu ine yei aro bombiam ta ya God minyiao.
3 Beten veka koneman iu ine ya God,
bia ya nako memi varu,
ta korao riꞌi neman-a kako ta ova korova revo.
4 Karake nako yei varu aro bombiam mowmow ke kuinyia iu neyarau revo ku vou awirai awakai.
5 Emo korao veka,
memi God moikera po kakei ta bia rora moikera po inyia karoi romomi aro bombiam ta ya God.
Bia emo yaꞌa Krais Yesus.
6 Taim ya God-a veku kamompe,
Yesus-a laip yaꞌa veku karomi ke noko memi varu aro bombiam mowmow.
Ya pasin ve God-a kariritami veka karake nako memi varu aro bombiam mowmow.
7 Ku vou vevo ta God-a kamompe nena kakeni veka aposel ke awirai ya nanairirai.
Awirai ve ero awakai,
via anaroponepu vai.
Boꞌo va karona ke skul-a nanoiy aro bombiam via yiave Juda ke kuinyia iu nebilip pova Krais ya awirai awakai ve neyarau revo.
8 Korao veka ta,
kanerenow veka aro biam vou boko mowmow keta eno nepuko nake ya beten-a nepao.
Kanerenow revo veka laip yei keta neupoa God ya nekepi neholi ya pasin vou tovetove ta awirai-ya nyiopakeo ero nepepeo.
Ya pasin ve po pa nepikeo ya prea nepao.
Pasin vou boꞌo neman-a nemao ero bilas rere aro bom
9 Kanerenow minyiao veka aro bom viake bilas neman-a nererikokore ke ine nereiraoki aro bombiam mowmow vai.
Ta via chapeꞌe nau reka rere ao ine neman-a nereyoro veka gol,
ta ao maramara veka manemane,
noreka ta no inyia kereko ketao rere kopako ero.
10 Ta boꞌo neman neman-a keta nererao ke noriritao veka kererake pa nererikeo revo awirai ya God.
Boꞌo ve nererao korao veka aoworo awakai rere.
11 Keta nere daunim rere veku ya nerekeri toropo ya awirai ya God-a nereko.
12 Nena kanairai aro bom-a via nerenori roiy aro biam-a cha ta awirai ya God-a skul-a nereroiy vai.
Bauni.
Keta nere daunim rere ya awirai-ya nererivo po.
13 Ero korao veka,
God-a karaonaka Cha Adam vo,
ya kopei karaonao Kwa Iv.
14 Satan-a ruru karurovoru Kwa Iv ya karoporeo sin-a korao.
Kopei Cha Adam,
Satan-a via ruru eyarovoru ta aroporeiya vai.
15 Ta rere aro bom kuinyia iu meꞌe va nereru.
Bo nerebilip rova revo Krais ya pasin neman-a nererao nerereroiy aro ovu ya nerekeri nereholi,
God-a keta nako rere varu.