Namba wan pas Cha Pol kareꞌe roa
Cha Timoti
1
Nena Cha Pol,
aposel ya Krais Yesus pas ve kaneꞌe.
Bia ve Yesus evo,
kemisave yaꞌa revo ta inyia kekemikeiya ke nemipirikere ao veka promis-a karao ke nerekamap pa ero.
God,
bia ve kako memi varu emo,
eri Krais Yesus keremompe nena ke nakeni veka aposel yaꞌa.
2 Ma Timoti,
mema inyia kamabilip mova Krais Yesus ta pasin ve po korao kakemi veka ma awakai nena.
Pas ve kaneꞌe konoi roma,
ero korao veka,
God Cha Tata eri Biapako memi Krais Yesus keta neyokoku poma revo ya neremarimari poma ya neraipao nakemi riꞌi mariri.
Memi keta pa nemikeo po awirai awakai
3 Taim kanenema bo voro ya kanake nanoni provins Masedonia,
kanairai noma baunke nakemi mataimon Efesus ya awirai kupuana namairai moiy beiyo roporere via awirai roporere mara nyirai taim skul-a nepoiy aro bombiam row awirai ya God vai.
4 Yei keta pasin vou awirai kanakanapon ta awirai mowmow maramara nyirai pow awoꞌo yei aro raiyau yei ero nepepeoki.
Awirai vevo,
koroporei ta korao inyia ketovetove roma kepao kyiararao ta via kuinyia iu noelpim yei nebilip pova God,
ya boꞌo God-a karoi ero nepao vai.
5 Ta ku vou awirai kupuana ve kanairai nopu korao veka,
mopu keta noperepoiy revo aro bombiam ovu.
Pasin ve ta kokai rimoꞌo kuro ya bio nape ova kakinakinao veka,
via kuinyia iu pasin taipo narao vai.
Kayarau veka pasin niniu po karao iu ine ya God ta kabilip rova revo Yesus.
6 Aro ovu rara neman ve kepepeo ven ta mare pa va kepikeo rara vou awirai roporere ku vou kowaun.
7 Yei ta keperepow revo nekepi veka tikse vou lo voro God-a kaoroa Cha Moses ero.
Ta yei via eyarau revo ku vou awirai yei yirai ero vai.
Awirai yei kekupuana pow revo,
kepitoro awirai ve kesave revo.
Ta yei veku ku vou awirai voro inyia kyirai ero via esave revo vai.
8 Kemiyarau veka bo nemin lo boꞌo ve God-a kamompe row norao,
emo koneman revo.
9 Kemiyarau minyiao veka God-a via lo va arere ke kot-a noreirao aro pa epikeo pasin niniu vai.
Bauni.
Boꞌo vou lo,
keta nostretim yei beiyo inyia sin-a epao ero.
Aro inyia kebikhet ta piavakorerei,
ta yei aro via inyia pa va epikeo revo pasin niniu iu ine ya God.
Lo ve keta kot-a noreirao aro sin-a epao ero,
ta yei aro inyia pa kepikere ao vou meꞌri ve ta via pa epikeo pasin God-a karererow ero.
Lo va keta kot-a noreirao minyiao aro kepyei aka moꞌo keviri ero,
ta yei aro inyia kepyei beiyo keviri ero.
10 Lo keta kot-a noreirao aro bombiam inyia pasin pamuk-a epao ero ta yei aro biam veku inyia pasin pamuk-a kepao varuvaru ero.
Raꞌa vou minyiao lo va keta kot-a noreirao aro inyia beiyo keko yei kakana ta kesalim poiy aro ovu ta kepaonai kekepi veka wokboi kanapon yei.
Ta yei aro awirai roporere inyia kyirai ero.
Ta yei aro voro inyia promis-a kepao veka ao en ta nepao,
ta yei via epao.
Ta yei aro inyia ao ovu kepao kepiritao veka via eperepow revo awirai awakai ya God veka memi inyia kemirirai mow ero.
11 Awirai neman ve,
kuirai romi veka,
God memi yaꞌa veku kupuana kuinyia iya nau lait pako awakai.
Kamompe nena ta awirai ve karona ke nanairirai.
God ve awoꞌo kapako revo ta yaꞌa veku ku vou pasin vou oꞌto notemi.
God-a kaokoku rova Cha Pol ta Cha Pol oꞌti kaoroa
12 Nena oꞌti kaonoa Krais Yesus Biapako memi,
kupuana karona ta kayarau veka kuinyia iu naroni kupuana ya boꞌo ya nanao.
Korao veka ta kamompe nena ke boꞌo ve nanao.
13 Tija,
nena piakanari ta poko taipo kanairai noa Biapako ta aro yaꞌa minyiao inyia kanao noiy toro.
Nena bia pasin taipo awakai-ya kananao ta kanabagarapim yei kanapon aro bombiam ebilip ero.
Ta yaꞌa kaokoku rona revo,
ero korao veka,
taim nena veku ao en kanao,
via anasave yaꞌa ta via anabilip nova vai.
14 Biapako memi Krais Yesus emo kamarimari rona revo ta karao kanabilip nova ta riꞌi nena minyiao kanerenoiy aro ovu.
15 Awirai ve kanake nanairai nopu emo,
awirai emo awakai,
memi aro mowmow keta nemiko ya nemibilip mow.
Krais Yesus kararo meꞌri ve keta nako yei varu aro bombiam inyia sin-a epao ero.
Nena raꞌa yei aro ve ao taipetaipe keparepare emo,
ta nena ao taipo kanao kanatawoiki revo.
16 Ta mema kuinyia iu namapirikeo veka nena bia taipo awakai,
ya Krais Yesus-a kamarimari rona revo.
Ao en keta noriritai aro bombiam mowmow ke kuinyia iu neyarau veka ova keiyaroro.
Ta ororo yaꞌa via nokai bereren vai,
taim sin-a nepao iu ine yaꞌa.
Ao en keta neyarau ya nebilip pova revo ya laip vou nuinyia toratora neko.
17 Nena kanerenow revo memi aro bombiam mowmow awoꞌo ya God-a nemavoko nake ya mare nonoi ya toratora awoꞌo pako neumoa.
Ero korao veka,
yaꞌa unake God.
Yaꞌa king,
ta via kuinyia iu nemipirikeiya ine memi vai.
Keta nakei toratora ta via kuinyia iu narai vai.
Awakai no.
Cha Timoti keta narevapana revo rara vou pasin taipo natire ke via nerekare
18 Ma nena Ma Timoti,
baunke inyia kanairainama ya kupuana kanoma ke boꞌo ve kanoma evo namao,
ke kuinyia iu ova namakinao more awirai profet-a kyirai poma ero.
Kanao veka ke kuinyia iu ova namakinao more awirai yei profet ya kuinyia iu naromi kupuana ya boꞌo va namao awirai neman ya God-a namairirai.
Ya taim beiyo awirai mema netereo,
keta naromi kupuana mow awirai awakai ve veka soldia keropi kupuana taim vou roma.
19 Taim naromi kupuana veka,
keta namabilip mova revo Yesus ya kuinyia iu namayarau via ao taipo raꞌa amao iu ine ya God.
Aro ovu keyarau veka nai-ya kepao,
ta via epin God-a anoi roiy cha ke rara neman-a nariritai ke kuinyia iu pa nepikeo.
Korao veka ta bilip yei kotaipo veka wua raꞌa koringo tao rip ta kotaritari.
20 Riepin yei aro vevo inyia kepao veka emo,
Cha Himeneus eri Cha Aleksander.
Nena bia riepin ve kanereiki noa eno ya Satana ke kuinyia iu nereyarau veka,
ya poko taipo via neraiyirai poa God vova vai.