Wokboi kanapon keta pasin neman po nepao
6
Aro bombiam inyia kebilip pova Yesus ta kekepi veka wokboi kanapon yei aro ovu ero,
keta nepeikepiroko bos yei ya awoꞌo yei nyiavoko.
Pasin ve keta norao aro via ebilip ero,
viake awoꞌo ya God-a nau skul vou awirai neman yaꞌa ero netereo vai.
2 Bo bos yei wokboi kanapo inyia nebilip pova Yesus,
wokboi kanapo ve via nepitoro veka,
“Bos ve,
yaꞌa raꞌai nena,”
keta nebiket ya via awirai yaꞌa nerivo vai.
Wokboi kanapon ve,
ruru veka keta nuinyia iya,
“Bia ve boꞌo kanao noa ero,
yaꞌa raꞌai nena ta kanerenova revo.”
Ya pasin ve boꞌo va keta narao kupuana.
Pasin vou ketao va nemeremow revo ero ku vou rara taipo
Ao en keta skul-a namoiy aro bombiam ke onoraiko ya boꞌo awakai-ya nepao.
3 Bo bia raꞌa via narererow skul voro kemoiy aro bombiam,
ta yaꞌa veku skul mara karoiy via oraoriu minyiao awirai ya Biapako memi Yesus Krais.
Ta pasin neman God-a karererow via ariritai,
4 bia ve karererow revo pasin yaꞌa veku ya kabiket.
Ruru awakai-ya kowaun reiya.
Laik taipo vou awirai resis kuinyia iya,
ta awirai-ya kairai rore ao mememe,
veka awoꞌo bekaipe nemore pasin memi.
Awirai veka emo,
korao beiyo rimoꞌo yei kotaipo wararoiy beiyo ovu,
ta ketovetove ya keterei ta via kuinyia iu ruru awakai-ya neko vai.
5 Kekepi inyia ova koraiko row netovetove ta ruru yei kotaipo nau revo ta awirai awakai via eyarau vai.
Yei kepitoro veka,
rara vou pasin neman-a pa kepikeo revo iu ine ya God,
keta noelpim memi kago o ketao koka nemiko.
6 Awirai awakai-ya varu ve,
bo ova noromi row ao ve God-a inyia karomi ero,
kuinyia iu nemiyarau veka rara vou pa nemikeo pasin niniu iu ine ya God kuinyia iu noelpim memi revo.
7 Kemiyarau veka,
taim moꞌo koawemi,
kekame kanapon.
Ao va raꞌa via emiko ekame meꞌri ve vai.
Korao veka ta,
taim meꞌri ve nememeo,
keta nenomi kanapo.
8 Kopei bo aokorom o no ao veka nuinyia imi,
kuinyia iu nemirai veka ao en memi yauke.
9 Ta yei beiyo ao mowmow nau ketao va keperepore revo neko ero,
kerepirovope traim veka aome trep-a koavei.
Riꞌi va keta ova norai row ao taipetaipe mowmow neparepare ya keta nopaulim yei revo.
Ya pasin ve keta noraipai ya laip yei nonoi notaipo revo.
10 Pasin vou ketao va nemeremore keta pasin taipo maramara norereka imi revo.
Ovu yei beiyo ketao va keperepore ero,
bilip yei kepepeo ya ao taipo mowmow en korereka iꞌiy veka ao pepen raꞌa kotei.
Mema keta namaparara bereren ke laip uinyia toratora namako
11 Ta mema bia ya God,
ao taipo en keta namemere ya nakemimere rarapa.
Mema keta boꞌo namao kupuana ya pa namikeo pasin niniu iu ine ya God,
ya namabilip mova yaꞌa unake.
Keta nameremoiy revo aro ovu ya naromi kupuana ya nai-ya namapoiy ya awirai-ya namairai mariro moiy aro bombiam.
12 Pasin vou bilip,
korao veka resis.
Korao veka ta namaparara bereren laip uinyia toratora God-a kamompe roma ven ero namako.
Awirai vou ao en kamairirai revo iu ine yei aro bombiam mowmow.
13 Kemisave,
ao mowmow God-a laip-a inyia karore.
Raꞌa minyiao,
kemisave veka,
Cha Pontius Pailat aotere prumo karao roa Yesus Krais,
ya awirai awakai kairaiki roa.
Ya mare,
iu ine ya God eri Krais Yesus,
awirai kupuana kanairai noma veka,
14 ao mowmow ve keta pa namikere revo veka kamako ero.
Ta via kuinyia iu ao va raꞌa namao notaipo ke norao aro bombiam-a nyiraikakama vai.
Namao po veka nonoi nuinyia iu taim aro bombiam mowmow nepirikeiya Biapako memi Yesus Krais-a nararo varu.
15 Ao en keta nokamap taim voro God-a yaꞌa veku kamompe ven ero.
God-a yaꞌa veku ku vou blessing ta ao mowmow ve kararerare.
Yaꞌa King yei king mowmow,
ta yaꞌa Biapako yei aro beiy mowmow.
16 Yaꞌa unake po viake narai.
Kakei bo vou lait,
ta bio raꞌa via kuinyia iu nanoi iya kakuke vai.
Bio raꞌa via apirikeiya God ta via kuinyia iu nepirikeiya vai.
Korao veka ta toratora awoꞌo yaꞌa nemavoko nake nau kupuana yaꞌa.
Awakai no.
Aro ketao koka uinyia iꞌiy ero keta nebilip pova God ya nelpim yei aro bombiam
17 Namairai moiy aro ketao koka nau ao neman neman vou meꞌri uinyia iꞌiy ero,
via pianorerei ta awoꞌo yei veku nyiavoko vai.
Ao voro keta notaipo via nebilip pow revo vai.
Keta nebilip pova God,
ero korao veka,
ao mowmow neman korao ova koromi ero ta inyia karomi.
18 Namairai moiy ketao yei boꞌo awakai-ya nepao pow revo.
Ketao va via nepirike ya neperepow revo veka ao neman vai.
Ao neman awakai yei ero,
ero pasin vou nepao poiy revo aro ovu.
Pasin neman-a keta nepao nelpim yei aro ovu ao va owaun rei ero.
19 Bo pasin ve nepao,
keta norao veka ao kupuana bilip yei koavo,
veka topa kupuana oꞌro raꞌa koavo ta via kuinyia iu notaipo vai.
Korao veka ta bilip yei keta nokupuana ya kuinyia iu laip awakai ve kuinyia toratora neko.
Cha Timoti keta boꞌo ya naorerariu
20 Ma Timoti,
mema keta namaoremariu revo boꞌo voro God-a karoma eno peꞌe mema.
Oreva namore awirai taipetaipe via orao iu minyiao ruru ya God vai.
Nakemimei rarapa aro voro kepitoro savea neman-a kuinyia iꞌiy ero.
21 Aro ovu kebilip pa kepikeo save en,
ta bilip yei kepao koreiroki ven.
Marimari ya God-a kuinyia ipu.