Yesus-a kairai roiy beiyo 72 kenopi
10
Kopei Biapako beiyo 72 kamompe yei ya kairai roiy nenopi riepin riepin,
nenopi poa cha.
Nenopi mataimon nau boko mowmow voro karake nanoi rorore ro.
2 Ya kairai roiy veka,
“Aokorom prumo kere oꞌro ven erora.
Ta yei beiyo bo epao ero via eprumo.
Korao veka ta noputere poa Aka vou erora ve,
ke nairai roiy aro bo epao ero nenopi aokorom yaꞌa nepao.
3 Nonopi!
Kanairainopu nonopi veka sipsip-aa kerenori romore boko voro rapa uka va kekepi ero.
4 Mopu viake paus vou ketao va nopikoro,
o viake ekoko o kanro mopu nopavere.
Ao raꞌa minyiao mopu viake a va nopiraipoiy beiyo taim nopute po rara.
5 “Taim nonopi oꞌro aꞌari raꞌa,
tija nopiraipoiy veka voꞌo,
‘Mopu aro oꞌro voro kuinyia iu nokepi riꞌi mariri.’
6 Bo aka vou oꞌro voro yaꞌa bia riꞌi mariri,
awirai vou riꞌi mariri kopirai poa keta nako.
Bo nowaun,
awirai vou riꞌi mariri keta nokai ipu varu.
7 Keta nokepi po oꞌro voro,
awarape nepopu,
nopa ya pii noputon.
Ero korao veka,
bio bo arao ero keta presen-a nako row bo yaꞌa.
Viake nonopi popore oꞌro,
keta nokepi po oꞌro voro.
8 “Taim nonopi mataimon raꞌa ta aro oꞌto notei ropu ta aokorom arape nepopu,
keta nopa iꞌiy po.
9 Aro ekepi mataimon voro ta a oraie ero,
keta nopaie neneman varu ya awirai ve nopiraipoiy,
‘Kingdom ya God-a kokai ipu kakuke.’
10 Kopei bo nonopi mataimon raꞌa ta via oꞌto notei ropu,
keta nonopi rara pako vou mataimon ya nopirai veka,
11 ‘Meꞌri mo vou mataimon mopu koporoporo taw kom memi.
Kemi purarao ke noriritapu veka,
pasin ve kopao ta via awirai ya God-a koperepow vai.
Mopu keta ao en nopu yarau,
kingdom ya God-a kokai kakuke.’
12 Kanairainopu veka,
taim ve God-a kamompe ke kot-a nareirao aro bombiam.
Nai voro keta naroiy aro bombiam vou mataimon voro,
keta notawo nai yei aro bombiam vou mataimon Sodomb eko ero.”
Mirarapu revo aro bombiam via riꞌi va opu rovoru
(Matyu 11.20-24)
13 Ya Yesus-a kairai vova veka,
“Mopu aro bombiam mataimon Korasin,
mirarapu revo!
Ta mopu aro bombiam mataimon Betsaida minyiao,
mirarapu revo!
Bo bio raꞌa nanoi mataimon Tair ta Saidon,c
ta mirakol-a nararerare veka kanaoromopu,
aro em keta riꞌi va nerovoru ya ao warawara nepikokope ya nekepirovope okukum.d
14 Taim God-a,
kot-a nareirao aro bombiam mowmow,
nai yei mataimon Tair awei Saidon viake nopako revo,
veka mopu keta nopuko ero.
15 Ta mopu aro mataimon Kaperneam,
era kopitoro veka ta nokope heven,
vai?
Boun ben!
Mopu keta noparo bo yei aro eviri ven.
16 “Bio awirai-ya narivoropu,
a va karivorona.
Bo bio oreva naropu,
oreva karona.
Kopei bio oreva narona,
oreva kaoroa God,
bia ero kairai rona ta kanaro.”
Beiyo 72 kopei kekape varu
17 Kopei beiyo 72 kekape varu ta ova koroꞌoi revo ya kyirai poa Yesus veka,
“Biapako,
spirit taipetaipe minyiao a va kerivo pomi taim awoꞌo keiminama.”
18 Ya Yesus-a kairai roiy veka,
“Kana pirikeiya Satan-a karei kararo veka bo koperem koraro uteno nake.
19 Kupuana kanopu ke noropitai uꞌu,
aropaiyao,
nau kupuana ya Satan.
Ta ao raꞌa via kuinyia iu nobagarapim mopu vai.
20 Ta mopu viake ova noropu rore spirit taipetaipe inyia a va ere rivoropu.
Keta ova noropu row ao en,
God-a awoꞌo mopu karere ven kerinyia heven.”
Yesus-a ova korova ta oti kaoroa God
(Matyu 11.25-27; 13.16-17)
21 Kopei taim ve Yesus-a ro va kare row Holi Spirit ya oꞌto kocha ya kairai veka,
“Oꞌti kanoma,
Ma Tata,
Biapako vou heven nau meꞌri.
Ero korao veka,
ao voro kamere rokime mei aro saveman awei aro ruru neman.
Kamiritai po aro ekepi veka aro mevova.
Awakai!
Ma Tata,
ao en kamao veka mema veku kamake namao.”
22 Ya kopei Yesus-a kairai roiy disaipel 72 veka,
“Ao mowmow Cha Tata nena karokoreri kokai eno peꞌe nena.
Ma ya Bio,
bio raꞌa via asave yaꞌa vai,
yaꞌa bia nape,
Aka ya unake po kasave yaꞌa.
Aka yaꞌa minyiao,
bio raꞌa via asave yaꞌa vai,
yaꞌa bia nape,
Ma yaꞌa unake po awei aro kamompe ke nariritai.”
23 Kopei ya karovoruka iꞌiy disaipel yaꞌa,
ta kairai roiy yei po veka,
“Yei aro ao epirikere veka kopu pirike,
kuinyia iu ova noroꞌoi.
24 Kanairainopu veka,
yei profet awei king mowmow kepake ao va nepirikere veka kopu pirikere ro,
via kuinyia iu nepirikere vai.
Ta awirai ve kepake nerivo minyiao veka kopurivo ero,
ta via erivo.”
To piksa ya bio Samaria
25 Roraꞌa saveman raꞌa vou lo kavariko ta karake natraim yaꞌa Yesus.
Ya katere roa Yesus veka,
“Ma Tikse,
to arape nanao ke nakeni revo toratora?”
The Good Samaritan (Luk 10:25-37)
26 Kopei Yesus-a kairaikire roa veka,
“To awirai bekaipe kepeꞌe kuinyia lo?
Kamapirike ta ku vou awirai voro kamako korao vekaipe?”
27 Ya bia emo kairai roa Yesus veka,
“ ‘Biapako God mema,
ta nameremova revo riꞌi mema,
nau spirit mema,
kupuana nau ruru mema.e
Keta nameremoiy revo kura mema minyiao veka mema veku kameremoma.’ ” f
28 Ya Yesus-a kairai roa vova veka,
“Awirai mema ero awakai.
Namao veka keta nakemi tare.”
29 Ya saveman vou lo karake narao veka ke aro nepirikeiya veka kaneman revo.
Ya tare katere roa Yesus-a veka,
“To nape kura mema?”
30 Ya Yesus-a tare katere roa vova veka,
“Beiyo raꞌa kakei mataimon Jerusalem ta kaute kararo mataimon Jeriko.
Ya taim evo,
aro aokakana kyiaivia ao va kepunao peiya.
Noreka ketaitai peiya ya kepyeiya revo konoi kuinyia iu karai kaopuko ya kepepeiya.
31 Kopei taim ve pris raꞌa kaute kararo rara ve.
Ya kapirikeiya bia emo kainyia row rara,
ya karereiya ya kaveroro rara ika ya kaute kanoi.
32 “Kopei Livaig raꞌa minyiao kaute kararo rara ve,
ta kapirikeiya po ya karereiya kaveroro rara ika ya kaute kanoi.
33 Ya kopei Samaria raꞌah minyiao kaute kararo rara ve,
ya kavakakeiya.
Taim kapirikeiya,
riꞌi va koiya eperuki rova revo bia emo.
34 Kanoi iya bia emo ya wel-a nau wain-a keiya niri aoka ya keiyaro.
Ya bia emo kaiviako kareria kakeitaw donkii yaꞌa,
ya kerai nopi oꞌro pasindia raꞌa ya karao roa revo.
35 Kopei uri vou,
ketao silva riepin-a kako kaoroa aka vou oꞌro pasindia ya kairai roa veka,
‘Mema ta namaoremamiya.
Kopei nakane varu,
ta ketao mema nanoma varu veka bia emo kamaoremamiya.’ ”
36 Ya Yesus-a tare katere roa saveman vou lo veka,
“Beiyo 3-pla evo,
nape kave kura yaꞌa bia emo epyeiya em?”
37 Ya saveman vou lo kairai roa Yesus veka,
“Bio ve kaokokurova revo ta eno kaoroa.”
Ya Yesus-a kairaikire roa veka,
“Nanomi pasin em namao minyiao.”
Yesus-a kanoi kakei oꞌro vou Kwa Marta eri Kwa Maria
38 Yesus-a awei disaipel yaꞌa kenopi ya kerepiki boko raꞌa.
Boko vere bia bom raꞌa awoꞌo vou Kwa Marta,
kuiria ke nanoi iu oꞌro vou.
39 Kwa Marta raꞌai raꞌa awoꞌo vou Kwa Maria.
Kwa Maria kokai kokei kakuke iu kompeꞌe ya Biapako ya awirai-ya korivo roa.
40 Ya Kwa Marta inyia ova kokinakinao pako row aware keta norao ero.
Ya kokai iya Yesus ya kuirai roa veka,
“Biapako,
era via amaokokumoni vai?
Raꞌai neni korereni,
ta neni unake po kekeni aware koka kenao.
Ta namairai mow Kwa Maria nokai eno va noroni.”