Yesus-a disaipel 12-pla kairai roiy kenopi
(Matyu 10.5-15; Mak 6.7-13)
9
Yesus-a kairiy disaipel 12-pla yaꞌa,
ya namba nau kupuana karoiy ke spirit mowmow etaipetaipe neririkeikirei aro a oraie ero,
ke nepaie neneman varu.
2 Ya kopei kasalim yei kenopi ke awirai vou kingdom ya God-a nyirirai poiy.
Ya aro a oraie ero nepaie neneman varu.
3 Ya kairai roiy veka,
“Taim nonopi,
viake ao ovu nopuko,
nonopi kanapon.
Viake awiya joko,
ekoko,
aokorom pa,
ketao va nau noreka minyiao via nopuko.
4 Oꞌro bekaipe neko mopu,
keta nokepi iꞌiy po nonoi nuinyia iu taim nopepeo mataimon voro.
5 Bo aro mataimon voro via neko mopu nonopi oꞌro yei,
keta mataimon yei nopepeo.
Ya meꞌri mo oporoporo kanro mopu,
nopu puraraoa ke pasin yei epao ero neyarau kotaipo revo ta via awirai ya God-a eperepow vai.”
6 Ya disaipel-a kenopi popore boko mowmow awirai neman ya God-a kyirirai ta aro a oraie ero kepaie keneman varu.
Cha Herot karake nayaraka revo Yesus yaꞌa bia nape
(Matyu 14.1-2; Mak 6.14-16)
7 Taim evo,
Cha Herot kakei gavanab vou boko emo ta awirai-ya karivo veka Yesus-a ao mowmow kararerare.
Ya inyia ova kakinakinao pako,
ku vou korao veka,
aro ovu kyirai veka Cha Jon Baptais karai ven ta kavariko varu.
8 Aro ovu kyirai veka,
“Yesus yaꞌa Cha Elaija kakai varu.”
Ta yei aro ovu kyirai veka,
“Yesus yaꞌa raꞌa yei profet tora kavariko varu.”
9 Ya Cha Herot kairai veka,
“Poko kenyauro Cha Jon karai ven va,
to bia emo inyia kyirai pova ero,
to yaꞌa bia bekaipe?”
Ya inyia kaorenaka Yesus ke napirikeiya.
Yesus-a aokorom-a karoiy 5,000 beiyo
(Matyu 14.13-21; Mak 6.30-44; Jon 6.1-13)
10 Taim aposel-a kekape varu,
kyirai poa Yesus row ao mowmow inyia keparepare.
Ya kako yei kenopi pova ya kepepei aro bombiam emo ya yei po kenopi mataimon Betsaida.
11 Ya aro bombiam mowmow em kerivo veka,
Yesus-a kanoi bo vere ta pa va kepearopi.
Ta oꞌto kocha roiy aro mowmow ekape ero ta awirai vou kingdom ya God-a kairai roiy.
Ya aro a oraie ero karaie keneman varu.
12 Kopei bariri revo ya disaipel 12-pla kekapepiya Yesus ya kyirai poa veka,
“Namairai moiy aro mowmow ke nenopi popore boko mememe erinyia kakuke,
ke aokorom-a nau bo yei ninyia ero nyiorenao.
Ero korao veka,
bo en beiyo va kewaun.”
13 Ya Yesus-a kairai roiy veka,
“Mopu veku keta aokorom-a nopoiy nepa.”
Ya kopei kyirai poa veka,
“Bret 5-plac nau ba riepin po kuinyia emo.
Era memi ta nenomi aokorom-a nemiko moiy aro mowmow em vai?”
14 Taim ve,
korao veka 5,000 aro biam-a kekepi.d
Ya kopei Yesus-a kairai roiy disaipel yaꞌa veka,
“Nopirai poiy nekepi popore ku moike moike.
Ta namba yei beiyo keta nuinyia iu veka fifti fifti.”
15 Ya disaipel-a kepao veka Yesus-a kairai roiy em ya kekepio.
16 Ya Yesus-a beret 5-pla nau ba riepin-a kako ya ine kaoreko heven ya oꞌti kaoroa God ya ba va nau beret-a kawetari.
Ya karoiy disaipel,
ya kewani konoi roiy aro bombiam.
17 Kopei aro mowmow em aokorom-a kepa konoi kuinyia iu rokomoi ya aokorom pa kerinyia.
Ya kopei disaipel-a aokorom pa kyiopokeke ya kechao koraro yam 12-pla rokore nau.
Cha Pita kairai Yesus yaꞌa bia nape
(Matyu 16.13-19; Mak 8.27-29)
18 Roraꞌa Yesus-a unake kakei ya inyia beten-a karao ta yei disaipel yaꞌa kekepi ya katereroiy veka,
“Aro mowmow kyirai nena bia nape?”
19 Ya kyirai poa veka,
“Ovu kyirai veka mema Cha Jon Baptais,
yei ovu kyirai mema Cha Elaija,
ta ovu kyirai mema profet raꞌa yei profet tora kama variko varu.”
20 Kopei katereroiy disaipel vova veka,
“To mopu veku kopirai nena bia nape?”
Kopei Cha Pita kairai roa veka,
“Mema Kraise ya God.”
Yesus-a kairai keta narai ya navariko varu
(Matyu 16.20-28; Mak 8.30–9.1)
21 Ya Yesus-a awirai kupuana va kairai ine kanana rariy revo via to emo nyirai poa bia raꞌa vai.
22 Ta kairai roiy veka,
“Ma ya Bio keta nai pako va napoi,
ta yei hetman ta yei bikpris awei saveman vou lo keta oreva neupoa.
Keta nepyeiya narai.
Kopei umo riepin raꞌa moike,
keta navariko varu.”
23 Kopei kairai roiy disaipel-a veka,
“Bo bio raꞌa karake pa narenaroi,
keta o nonaparaka row yaꞌa veku ya umo mowmow aꞌai tirikif yaꞌa po napoi ya pa narenaroi.
24 Bo bio raꞌa karake laip yaꞌa veku navo kupuana,
laip yaꞌa keta norei roki.
Kopei bio raꞌa laip yaꞌa narereo rona,
ero korao veka,
pa karenaroi ya laip yaꞌa via kuinyia iu norei roki.
25 Bo bio raꞌa ao mowmow vou meꞌri ve nainyia iu ta laip yaꞌa nobagarap o norei roki,
ao mowmow em ta noelpim yaꞌa norao vekaipe?
26 Bo bio raꞌa reka noyova row awirai nena ta nena,
Ma ya Bio minyiao keta reka noyova rova bia emo,
taim nararo nau lait pako yaꞌa eri Aka yaꞌa awei ensel holi minyiao.
27 Awakai-ya kanairai nopu.
Beiyo ovu kekepi evo viake neviri.
Keta baunke nekepi nepirike kingdom ya God-a nokai iꞌiy voꞌo.”
Reka ya Yesus-a komara
(Matyu 17.1-13; Mak 9.2-13)
28 Kopei 8-pla de konoiki ven,
Yesus-a awirai emo kairai,
ya kako yaꞌa Cha Pita,
Cha Jon,
Cha Jems awei kakoi tou nake ke beten-a narao.
29 Taim beten-a inyia karao,
ine yaꞌa konoi komara ya noreka yaꞌa kowutoki nau.
30 Ya bia riepin kerai ropi a va kerai yirai piya.
Bia riepin ve,
Cha Moses eri Cha Elaija.
31 Keraikape nau lait pako.
Ta kerai ropi a va kerai yirai piya Yesus rore ao voro keta noraonao,
taim nanoi Jerusalem ya meꞌri ve narereo ya nakoi nake.
32 Cha Pita awei disaipel riepin-a kevovo keraiki.
Kopei taim kevereko,
kepirike lait pako ya Yesus.
Ta bia riepin minyiao kerai ropi piya.
33 Taim bia riepin-a keraipepeiya Yesus,
Cha Pita kairai roa veka,
“Bia beiy,
koneman nekame moma.
Keta oꞌro sel 3-pla nemirira,
raꞌa mema,
raꞌa ya Cha Moses,
raꞌa ya Cha Elaija.”
Awirai em kairai ta yaꞌa veku via ku vou awirai em ayarau vai.
34 Taim Cha Pita awirai ve kairai,
uteno wuto koraro koririy ta keriri.
35 Poko raꞌa koraro uteno wuto ta kwei veka,
“Bia emo yaꞌa Ma nena,
nena veku kanamompe yaꞌa.
Awirai yaꞌa keta nopiarivo.”
36 Taim poko ve kwei konoi ven,
Cha Pita awei disaipel riepin-a kepirikeiya Yesus-a unake po karoi.
Ta via yiraipoa bia raꞌa row ao en epirikeo.
Ao en kuinyia iꞌiy po.
Yesus-a karao bia mentanaka raꞌa spirit taipo kakei iya kaneman varu
(Matyu 17.14-21; Mak 9.14-29)
37 Kopei uri vou,
Yesus awei disaipel 3-pla kekepi tou nake ya kopei keparo varu.
Ta aro bombiam koka kekape kevakakeiya Yesus.
38 Bia raꞌa kakei iꞌiy aro bombiam prumo ta kaiy kairai veka,
“Ma Tikse,
nena ma biam moikera po kakei ina,
ta inyia kanaterenoma nakame namapirikeiya voꞌo.
39 Spirit taipo karikorova ta bererenki po kaororo ta karao reka inyia keiyarererere ya ropi wuto keiyakai roꞌo.
Spirit taipo kakei iya ta karao reka yaꞌa ine korao toro ta via arereiya bereren vai.
40 Inyia kanatere kanamomonai revo disaipel mema ke neririkeiyaki,
ta via inyiapi.”
41 Ya kopei Yesus-a kairaiki veka,
“Mopu aro bombiam taim mare voꞌo,
ao taipetaipe po inyia koparepare ta via opu bilip.
To era kopitoro ta baunke naken nipu ke nopu bilip pona vai?
Ma mema namako yaꞌa nakai.”
42 Taim ma ve kaute kakai iya Yesus,
spirit taipo em kaivia kararaiyo meꞌri ta karerere.
Ya Yesus-a katoivia spirit taipo vo ya karereiya.
Ya kopei karao bia mentanaka kaneman varu.
Ya Yesus-a kaivia roa varu aka yaꞌa.
Yesus-a kairai vova veka keta narai
(Matyu 17.22-23; Mak 9.30-32)
43 Ta yei aro bombiam mowmow kupuana ya God-a kepirikeo ta keririko toro.
Taim aro bombiam ova inyia kekinakinao pako rore ao mowmow Yesus-a kararerare,
ya kairai roiy disaipel yaꞌa veka,
44 “Awirai emo nanairai nopurivo revo.
Ma ya Bio vo keta nepoiy eno peꞌe yei aro taipei.”
45 Ta yei disaipel awirai ve kairai roiy emo via ku vou eyarau.
Ku vou awirai ve kuinyia roki rei ta via eyarau.
Keriri ta via etere poa Yesus ke awirai em nairai roiy.
Bia nape keta nakei veka bia pako
(Matyu 18.1-5; Mak 9.33-37)
46 Yei disaipel ya Yesus-a kekepi ketovetove bia nape keta nanoi roiy cha.
47 Ya Yesus-a romo kuro yei kayarau,
ya kako yaꞌa bia mentanaka raꞌa kareria karoi iya tairi.
48 Ya kairai roiy veka,
“Beiyo ova nakinao rona ta karao roa revo bia mentanaka evo,
karao rona revo.
Kopei bio narao rona revo,
karao roa revo bia ero kairai rona ta kanaro.
Ero korao veka,
bio voro awoꞌo pako via ako romopu,
bia ero yaꞌa bia pako.”
Beiyo via ine aruputrotropu kave kura mopu
(Mak 9.38-40)
49 Kopei Cha Jon kairai roa Yesus veka,
“Bia beiy,
kemi pirike bia raꞌa spirit taipo karirikei row awoꞌo mema ta kemake nemaomariya.
Ero korao veka,
yaꞌa via bia raꞌa yei aro memi inyia emi towa momoma vai.”
50 Ya Yesus-a kairai roa veka,
“Via nopaopariya,
bio via ine aruputrotroru,
bia ero karoi ipu.”
Aro Samaria via eperepova Yesus nakai boko yei vai
51 Taim ya God-a karake nako yaꞌa Yesus-a nakoig kokaku ven,
ta Yesus-a kakupuana revo ke nanoi mataimon Jerusalem.
52 Ya kairai roiy beiyo awirai-ya neko nenopi poa cha.
Kenopi boko moike raꞌa yei Samaria ke ao mowmow nepaokeiya ke nakai.
53 Ta yei aro boko vere via oꞌto otei rova,
ero korao veka,
yaꞌa keta nanoi mataimon Jerusalem.h
54 Taim disaipel riepin evo,
Cha Jems eri Cha Jon ao en keraipirike,
keraitere poa Yesus-a veka,
“Biapako to mema kamitoro vekaro,
era aiyerao vou heven-a neimi noraro aro vere notei o bauni?”
55 Ta Yesus-a karovoruka ya katovei,
56 ya kenopi vova boko raꞌa.
Yesus-a kairai row rara vou pa nepekeiya
(Matyu 8.19-22)
57 Taim kyiute pow rara emo,
bia raꞌa kairai roa Yesus veka,
“Bo bekaipe nanomi keta pa nanimaron.”
58 Kopei Yesus-a kairai roa veka,
“Yei rapa uka bo yei kuinyia ke nekepi roki,
ta rere ruꞌu,
u rere kuinyia.
Kopei Ma ya Bio,
bo yaꞌa ainyia ero kowaun.”
59 Ya kairai roa bia raꞌa vova veka,
“Pa naminaron.”
Ya kopei bia emo kairai roa veka,
“Biapako,
to era kuinyia iu namin ke nanoni aka nena nanere voꞌo.”
60 Kopei Yesus-a kairai roa veka,
“Aro eviri ven,
keta yei veku nepere,
nanomi awirai vou kingdom ya God-a namairirai.”
61 Kopei bia raꞌa kairai roa Yesus veka,
“Biapako,
nena ta pa nanemaron.
To era kuinyia iu namin ke nanoni varu eno nanei naraiyo aro nena voꞌo”
62 Ya Yesus-a kairai roa veka,
“Bio bo nena narao ta ao mowmow vou meꞌri narin noaiviaka varu,
via kuinyia iu bo ya God-a narao vai.”