Aro bom ovu minyiao kereute rova Yesus
(Matyu 13.2-23; Mak 4.1-20)
8
Kopei kovevenki,
Yesus-a kanoi rorore mataimon nau boko ya awirai neman vou kingdom ya God-a kairirai roiy aro bombiam.
Ta yei disaipel 12-pla kenopi pova minyiao.
2 Aro bom ovu minyiao kerenori rova.
Aro bom ve,
tija spirit taipetaipe kekepi pire ta a korare ero,
Yesus-a karao kereneman varu.
Raꞌa rere aro bom ve Kwa Maria,
mataimon vou Makdala.
Bia bom ve,
Yesus-a spirit taipo 7-pla karirikei kire reu.
3 Ta Kwa Joana eri Kwa Susana awere aro bom prumo minyiao,
kerenori rova.
Kwa Joana vou om ya Cha Kusa,
bia emo yaꞌa bos vou oꞌro ya Cha Herot.
Rere aro bom ve ao rere inyia kereriy ke noelpim yaꞌa Yesus awei disaipel yaꞌa.
To piksa ya bio wit iri kataratarao erora
(Matyu 13.2-23; Mak 4.1-20)
4 Aro bombiam prumo inyia kekape piya Yesus rorore mataimon moike moike.
Ya kenopi kyiopokeke ya aꞌai-ya karari roiy veka,
5 “Bio raꞌa kanoi wit iri kataratarao erora.
Wit iri inyia kataratarao ta ovu kerevere row rara ya beiyo va kenyia pakiri ya ruꞌu va kerera.
6 Wit iri ovu kerevere meꞌri.
Meꞌri ve topa nore ya kopei taim kerewori,
bo emo pii va kowaun ta kere ura ya kereviri nau.
7 Kopei wit iri ovu kerevere romore tiꞌi erere.
Wit iri erewori romore tiꞌi erere ro,
tiꞌi erere kwararore ya kere ura.
8 Kopei wit iri ovu kerevere row meꞌri awakai evo,
kerekore kereneman revo.
Ta iri moike moike kereave veka hanret hanret.”
Awirai em kairai ven,
ya kopei kaiy veka,
“Bio teve neyainyia,
keta awirai em narivo.”
Yesus-a aꞌai-ya karari roiy po aro via ebilip
(Matyu 13.10-17; Mak 4.10-12)
9 Disaipel yaꞌa ketere poa row ku vou awirai aꞌai-ya arari roiy em.
10 Ya kairai roiy veka,
“God-a karin kopuyarau ven awirai kuinyia roki iu kingdom yaꞌa.
Ta nena aꞌai-ya raꞌa kanari noiy aro ovua
‘ke nepirikeo,
ta via ao va raꞌa eyarau vai.
Awirai-ya kuinyia iu nerivo ta via kuinyia iu ku vou neyarau vai.’” b
Ku vou aꞌai-ya karari row wit iri
(Matyu 13.18-23; Mak 4.13-20)
11 Ya Yesus-a kairai vova veka,
“Ku vou aꞌai-ya kanari nopu korao veka,
wit iri em,
ero awirai ya God.
12 Wit iri kerevere row rara en,
kererao veka aro bombiam awirai ya God-a kerivo.
Ya kopei Satan-a kararo romoꞌo kuro yei ya awirai ya God-a kakoki rei,
ke via nebilip pova God ke nako yei vai.
13 Wit iri kereveretao meꞌri topa ero,
ero yei aro awirai ya God-a kerivo ta ova koroꞌoi ya keko.
Beiyo ve kepao veka wit,
kaꞌa rere kerewaun.
Kebilip po taim korama kanapon,
kopei traim-a norereka iꞌiy,
bilip yei kepepeo ya oreva keupoa God.
14 Wit iri kereveretao meꞌri romore tiꞌi erere ero,
korao veka beiyo awirai ya God-a kerivo.
Ta keokoku pore ao voro keta norereka iꞌiy.
Ao vou meꞌri veka ketao va nau ao vou nererao beiyo nekepi ova noroꞌoi,
ao emo koririy.
Kepao veka wit iri akai-ya kereave,
ta via kuinyia iu neiyoro.
15 Wit iri kereveretao meꞌri awakai ero,
kererao veka beiyo riꞌi yei kowuwurow ta koneman.
Awirai ya God-a kerivo ta kyiavo kupuana ta inyia kuinyia akai-ya koave.”
Lam-a kepuri ta via epere roko uro meꞌri
(Mak 4.21-25)
16 Yesus-a kairai vova veka,
“Bio raꞌa lam-a via aruri arere roko uro meꞌri o arere roko tebol paraparako.
Bauni.
Ta narere nuinyiatao tebol,
ke aro bombiam-a nekape aꞌari ya lait-a nepirike.
17 Ao erinyia roki,
keta kopei nerekare vatiron.
Kopei aoware keta nerekare vatiron ya beiyo neyarare.
18 Korao veka ta mopu nopuyarau revo taim awirai-ya nopurivo.
Bo bio raꞌa ao ovu nuinyia iya ven,
God-a keta tare ovu naoroa vova.
Bo bio raꞌa save nowaunreiya,
ta karitoro veka save kuinyia iya,
God-a keta napereoki reiya veka yaꞌa veku karitoro kuinyia iya.”
Moꞌo ya Yesus awei aro raꞌai yaꞌa.
(Matyu 12.46-50; Mak 3.31-35)
19 Ya moꞌo ya Yesus-a awei aro raꞌai yaꞌa kekape ke nepirikeiya.
Kekape ra via kuinyia iu nenopi piya kakuke,
ero korao veka,
aro ve keprumoki ta iri kyiapepariya revo.
20 Ta beiyo ovu kyirai poa veka,
“Moꞌo mema awei aro raꞌai mema keropi upuo kepake nepirikema.”
21 Ya Yesus-a kairaikiroiy veka,
“Moꞌo nena awei aro raꞌai nena,
yei aro awirai ya God-a inyia kerivo ta pa kepekeo.”
Yesus-a kairai ya puꞌu pako kopikimko
(Matyu 8.23-27; Mak 4.36-41)
22 Umo raꞌa Yesus-a kairai roiy disaipel yaꞌa veka,
“Nenomi para vou pivei Galili.”
Ya kenopi keparo bot raꞌa ya kenopi.
23 Inyia keparara kenopi,
Yesus-a kavowoa.
Bounke kavowoa,
puꞌu pako koputuruko ya naomonaomo ipipo koraoko ta kowere roiy bot kuro ta korake novuvo.
24 Disaipel-a kenopi piya Yesus ya kipiako ya kyirai poa veka,
“Bia beiy,
Bia beiy,
kemake nemiviri!”
Ya kavariko puꞌu va katoveu eri naomonaomo ipipo.
Ya naomonaomo ipipo eri puꞌu va kopikimko ya pii va kuinyia toropo.
25 Ya katere roiy veka,
“Bilip mopu uinyia bekaipe?”
Kopei disaipel-a keriri ya kekinakinao pako ta yei veku keteretereka veka,
“Bia emo yaꞌa bia bekaipe,
awirai kupuana va kairai row puꞌu eri naomonaomo ta awirai-ya kerairivo poa?”
Yesus-a spirit taipo karirikeiki reiya bio raꞌa
(Matyu 8.28-34; Mak 5.1-20)
26 Keparara kenopi para yei Gerasa.
Bo ve kuinyia para vou pivei pako Galili.
27 Yesus-a bot-a karereo ya kakoi meꞌri nake,
ta bio raꞌa yei mataimon ve kakai iya.
Spirit taipo va kerekeri iya bio emo.
Bio emo toratora no va raꞌa va via aku rariu reka yaꞌa vai.
Ta via akei oꞌro raꞌa vai.
Bio emo yaꞌa ta inyia kakekei matmat.
28 Bio emo kapirikeiya Yesus,
ta kaiy ya raro karei kakuke iu kompeꞌe ya Yesus.
Ya kaiy pako kairai roa Yesus veka,
“Yesus,
mema Ma Biam ya God Bia Nake!
To arape namaomona?
Aotere kupuana kanaonoma via namao reka noararana revo vai.”
29 Ya poko kaparareru,
ero korao veka,
Yesus-a awirai kupuana va kairai ta spirit taipo va kererereiya bio emo.
Taim mowmow,
spirit taipo koko yaꞌa.
Ta yei beiyo sen-a kepia nopiro kom-a nau eno yaꞌa ero,
inyia kyiorepariya revo.
Kopei sen-a kaiperu ya spirit taipo kererao kanoi bo beiyo ewaun.
30 Kopei ya Yesus-a katere roa veka,
“To awoꞌo mema?”
Ya kairai roa veka,
“Awoꞌo nena Cha Mowmow.”
Ero korao veka spirit taipetaipe mowmow kerekeri iya.
31 Spirit taipetaipe ve awirai-ya kyirai kemomonaka ke via naririkei neparo kamo voro ku vou kowaun.
32 Boko emo,
rao prumo kererori tou iꞌ aokorom-a kerera.
Ya spirit taipetaipe a va kereyirai keremomo naka ke narin nerenori nere rikorore rao,
ya karin kerenori.
33 Ya spirit taipetaipe kererereiya bia emo,
ya kerenori kere rikorore rao.
Ya rao va kere praprara kereraro tou iꞌ paripari ya kerevoroki pivei pako Galili.
Pii va keretonton ya kereviri.
34 Yei beiyo inyia rao va kyioreparire,
ao en kepirikeo ya kepraprara kenopi awirai vou ao en kyirirai konoi rorore mataimon nau boko ovu minyiao.
35 Ta aro bombiam-a kenopi ke ao en nepirikeo.
Kekape piya Yesus,
ya kepirikeiya bia emo spirit taipetaipe kererereiya.
Ya ruru awakai-ya kako varu ya no va kaku ya kakeiyo kakuke iu kompeꞌe ya Yesus.
Aro bombiam ao en kepirikeo keriri.
36 Aro bombiam ao en kepirikeo,
kyirai poiy aro ovu rova Yesus spirit taipetaipe karirikere reiya bia emo ya kopei kaneman varu.
37 Ya kopei aro bombiam mowmow vou mataimon Gerasa keriri toro ya ketere poa Yesus ke narerei ya nanoi.
Ya Yesus-a kanoi kararo bot ya kanoi varu.
38 Bia emo spirit taipetaipe kererereiya,
ya a va kairai kamomo naka revo Yesus ke nanoi rova.
Ta Yesus-a kairai roa nanoi varu.
Ya kairai roa veka,
39 “Nanomi varu boko mema ya namairai moiy aro bombiam ao pako God-a karao roma.”
Ya bia emo kanoi ya kairai roiy aro mowmow vou mataimon row ao arape Yesus-a arao roa.
Bia bom mentanaka raꞌa korai eri bia bom raꞌa a va korao
(Matyu 9.18-26; Mak 5.22-43)
40 Yesus-a kanoi varu para vou pivei Galili ya kopei aro bombiam prumo oꞌto kotei rova.
Ero korao veka,
inyia kekepikeiya.
41 Ta bio raꞌa awoꞌo yaꞌa Cha Jairus kakai karei ya boratapo katureri iu kompeꞌe ya Yesus ya a va kairai kamomo naka ke nanoi rova oꞌro yaꞌa.
Cha Jairus,
yaꞌa raꞌa yei hetman vou oꞌro lotu yei Juda.
42 Kanoi kapirikeiya Yesus,
ku vou korao veka,
ma bom moikera po karererow,
ainini vou korao veka 12-pla.
Ya korake norai.
Yesus-a kaute kanoi oꞌro ya Cha Jairus,
ta aro bombiam prumo minyiao kenopi pova ta kyiatoka.
43 Taim evo bia bom raꞌa konoi roiy.
Bia emo,
noꞌo va inyia konoi reu konoi kuinyia iu veka ainini 12-pla.c
Ta bio raꞌa via kuinyia iu narao noneman varu vai.
44 Bia bom ve kokai po oreva ya Yesus,
ya eno kwavo iya no iꞌ ya bererenki po noꞌo korow roveki.
45 Ya Yesus-a katere veka,
“Bia nape eno kavetana?”
Ya mowmow yei kyirai,
“Nena bauni.
Neni bauni.”
Ta Cha Pita kairai roa veka,
“Bia beiy,
aro bombiam prumo kekukum ta kyiute kekivirikema.”
46 Kopei Yesus-a kairai roiy veka,
“Bia raꞌa eno kavetana ta kanayarau veka,
kupuana koraꞌa nena koreꞌe.”
47 Ya bia bom-a koyarau veka via kuinyia iu nokei roki vai,
ta korerere ya kokai boratapo kotureriyo iu kompeꞌe ya Yesus.
Ya kuirai roiy aro mowmow row ku vou eno koavetaka Yesus ya bererenki po a orao ero ya korereo.
48 Ya Yesus-a kairai row veka,
“Ma bom,
bilip momu korao komuneman varu.
Nonomi nau riꞌi mariri.”
49 Yesus-a kakei inyia a va kairai roiy aro bombiam ta bio raꞌa kaute kakai oꞌro ya Cha Jairus,
hetman vou oꞌro lotu yei Juda.
Kakai kairai roa Cha Jairus veka,
“Ma bom mema korai ven,
via nai-ya naomoa tikse vai.”
50 Ya Yesus-a awirai ve karivo ta kairai roa Cha Jairus veka,
“Via namariri,
bilip po,
ta ma bom mema noneman varu.”
51 Ya Yesus-a kanoi oꞌro ya Cha Jairus.
Aro bombiam-a via arin erenori rova oꞌro aꞌari.
Kako yaꞌa Cha Pita,
Cha Jon,
Cha Jems,
awei akamoꞌo vou bia bom ve po kenopi pova aꞌari.
52 Ya aro bombiam-a kekepi inyia keokoku pow revo bia bom mentanaka orai em ya kerokekeu.
Ta Yesus-a kairai roiy veka,
“Via nopurokekeu vai,
bo via orai,
bo vou kovovo po.”
53 Ta avoto va kepapaka Yesus,
keyarau veka bia mentanaka ya korai ven.
54 Ya Yesus-a eno vou bia bom mentanaka karuvavo ya kairiuko,
“Ma bom,
nomuvariko!”
55 Ya spirit vou kokai iu varu ya bererenki kovariko kokei.
Ya Yesus-a kairai roiy aokorom ipin-a nepo nora.
56 Ya akamoꞌo vou bia mentanaka evo keraiririko toro ya awirai kupuana kairai roiy ke via neraiyirai poiy beiyo row ao en.