Yesus-a karao wokboi ya kepten yei soldia kaneman varu
(Matyu 8.5-13)
7
Taim Yesus-a awirai-ya kairai roiy disaipel awei aro bombiam-a kerivo ven ya kopei kanoi mataimon Kaperneam.
2 Ta kepten raꞌa yei 100 soldia kakei,
ta wokboi raꞌa kakei iya minyiao.
Wokboi emo kepten-a karererova revo,
kopei mare wokboi emo a va koraka ta karake narai.
3 Kepten-a awirai ya Yesus-a karivo roiy ya kairai roiy hetman yei Juda nenopi netere poa Yesus-a nakai ke wokboi yaꞌa naraka naneman varu.
4 Kenopi kepirikeiya Yesus,
ya ketere kemomo naka ya kyirai veka,
“Kepten ve kaneman kuinyia iu namalpim yaꞌa,
5 ero korao veka,
inyia karereroiy revo aro bombiam memi Juda ta oꞌro lotu memi karao.”
6 Ya kopei Yesus-a kaute kanoi roiy.
Kanoi kakuke iu oꞌro ya kepten ve,
ya kairai roiy kura ovu yaꞌa kenopi kyirai poa Yesus veka,
“Biapako,
bo via namareva mow,
ero korao veka,
nena via ananeman ke nakame oꞌro aꞌari nena.
7 Nena kanayarau veka via ananeman ke kuinyia iu nena veku nakane nima.
Ta mema kamairai ya wokboi-ya kaneman varu.
8 Nena minyiao kenyiakeni roko bia aorerarina.
Ta yei soldia minyiao kepenakepi roko.
Bo nanairai noa soldia raꞌa veka,
‘Nanomi,’
ya inyia kanoi.
Kopei raꞌa nanairai noa veka,
‘Nakame,’
ya inyia kakai.
Taim nanairai noa wokboi nena veka,
‘Mema ao en namao,’
ya inyia ao en karao.”
9 Yesus-a awirai ve karivo ya ova kakinakinao pako,
ya kopei karovoruka iꞌiy aro bombiam prumo pa va epekeiya ya kairai roiy veka,
“Kanairai nopu,
kanapirike bilip yaꞌa bia emo kopako revo,
ta bio raꞌa yei Israel bilip veka via uinyia iya vai.”
10 Ya aro ve kepten-a kairai roiy kenopi piya Yesus ero,
kenopi varu oꞌro ya kepirikeiya wokboi ya kepten ve kopei kaneman varu.
Yesus-a karao bia yangpla raꞌa yei mataimon Nain kavariko varu
11 Kopei Yesus-a kanoi mataimon raꞌa keipinao Nain,
ta disaipel yaꞌa awei aro bombiam prumo kenopi pova.
12 Kakai kakuke iu kamo vou reiy pako vou mataimon ve,
ya aro ovu bia raꞌa karai ven kepoiy kenopi upuo.
Bia emo,
moꞌo koaivia yaꞌa unake.
Aka yaꞌa minyiao karai ven ta moꞌo yaꞌa po kokei.
Ta aro bombiam prumo vou mataimon-a kenopi pow bia bom ve.
13 Biapako kapirikeo bia bom ve,
ta kaokoku row ya kairai row veka,
“Via nonro vai.”
14 Ya Yesus-a kanoi eno kareretao wua ya aro wua epoi ero keriraki.
Ta Yesus-a kairai veka,
“Bia yangpla,
kanairai noma,
namavariko!”
15 Ta bia emo arai ero,
kavariko ya a va inyia kairirai.
Ya Yesus-a karereaki kanoi iu varu moꞌo yaꞌa veku.
16 Aro bombiam mowmow keririko row ao en ta awoꞌo ya God-a kyiavoko.
Ya kyirai veka,
“Profet pako raꞌa kararo romomi ven,”
ta “God-a kararo ven ke naelpim yei aro yaꞌa.”
17 Awirai vou ao en Yesus-a arao ero,
koawetari konoi rorore boko mowmow vou distrik Judia nau boko mowmow kerinyia kyioroka rariu.
Yesus eri Cha Jon Baptais
(Matyu 11.2-19)
18 Aro disaipel ya Cha Jon Baptais,a
ao mowmow ve Yesus-a kararerare kyirai poa Cha Jon Baptais ya kairiy riepin yei kekape piya.
19 Ya kairai roiy kerainopi piya Biapako ke neraitere poa veka,
“Era mema bia God-a kairai namaro ero,
o keta nekemikeiya bia raꞌa vova vai?”
20 Bia riepin-a kerainopi piya Yesus,
ya kerai yirai poa veka,
“Cha Jon Baptais kairai ropi kepikape nepitere poma,
‘Era mema bia God-a kairai namaro ero,
o keta nekemikeiya bia raꞌa vova?’ ”
21 Taim ve bia riepin keraikape piya Yesus,
ta aro prumo a mara oraie ero awei aro spirit taipetaipe inyia obagarapim yei ero,
karaie keneman varu.
Ta yei aro prumo ine orei taipo ero kopei karaie ao va kepirikere varu.
22 Ya kopei Yesus-a kairai roiy bia riepin voro awirai-ya keraiko keraikape ero,
“Norupunopi varu ya norupirai poa Cha Jon row ao en orupu pirikere ta orupu rivo.
Ao veka:
aro ine orei taipo keperi varu,
aro kom-a ereirai kyiute varu,
aro lepro oraie ero keneman varu,
aro teve okapurai awirai-ya kerivo varu,
aro eviri ven ero kevereko varu,
ta yei aro mererai awirai neman ya God-a kerivo.b
23 Beiyo nepirikena,
bilip yei viake norei,
kuinyia iu oꞌto notei.”
24 Taim bia riepin ve awirai-ya keraiko keraikape poa Cha Jon kerainopi ven,
ya Yesus-a kairai roiy aro bombiam prumo row ao ya Cha Jon veka,
“Mopu konopi bo yin kanapon beiyo ewaun ke arape nopupirike?
Era mopu konopi ke oito raꞌa puꞌu va inyia kwavovo nopupirike vai?
Bauni.
25 Mopu konopi ke arape nopupirike?
Era mopu konopi ke nopu pirikeiya bia no neman neman-a karikoko vai?
Bauni.
Beiyo inyia no neman-a kepikokope ta ao neman-a kuinyia iꞌiy ero,
yei aro veka po ta kekepi oꞌro yei king.
26 To mopu konopi ke arape nopupirike?
Era mopu konopi ke profet raꞌa nopu pirikeiya vai?
Aꞌo!
Kanairai nopu,
bia emo katawoi profet ovu.
27 Buk ya God-a kuirai rova bia ero veka,
‘Bia raꞌa awirai nena nako,
ta nanairai noa nanoi roma cha
ya rara va neremarao nau.’ c
28 “Kanairai nopu veka,
aro mowmow moꞌo va ereave ero,
raꞌa yei via atawoaka Cha Jon.
Bo bio nakei veka bia mentanaka iu kingdom ya God,
bia emo kotawoaka Cha Jon.”
29 Aro bombiam prumo kekepi awei aro takis-a eko ero,
awirai ve kerivo ven ta kyirai veka,
“God-a kaniniu revo.”
Awirai emo kyirai,
ku vou korao veka,
Cha Jon kabaptaisim yei.
30 Ta yei Farisi awei saveman vou lo oreva kepo ao voro God-a karake narao roiy ero,
ta via enopi piya Cha Jon ke baptais-a neko.
31 Ya Yesus-a kairai vova veka,
“Yei aro bombiam mare vo,
keta awirai bekaipe nanairai noiy ke noriritai pasin yei?
To kepao vekaipe?
32 Kepao veka aro mevova kekepi bo kuriri ta kyepepi konoi kokai roiy yei veku ya kyirai veka,
‘Memi moura va kemiputu mopu ke noputiti
ta via oputiti,
monrai bio rai-ya kyemi,
ta via opuro.’
33 “Cha Jon Baptais-a kakai,
beret-a via ara ta wain-a via aton ta kopirai veka,
‘Cha Jon Baptais,
spirit taipo raꞌa kakei iya.’
34 Ma ya Bio kakai aokorom-a kara ya wain-a katon ta kopirai veka,
‘Nopu pirikeiya bia emo,
aokorom-a karirow ta wain koka va katon.
Bia emo yaꞌa kura yei aro inyia takis-a eko awei aro yei sin-a epao ero.’
35 Mopu inyia kopirai kopararao veka,
aro bombiam nape kyiute pow save neman ya God veka mevova yaꞌa,
kepiritami veka save neman yaꞌa ero,
koniniu revo.”
Bia bom sin-a korao ero sanda koyaruru Yesus
36 Farisi raꞌa kairia Yesus-a kakai ke aokorom-a nara iya oꞌro yaꞌa.
Ya Yesus-a kanoi oꞌro aꞌari ya Farisi ve ya kakeiyo ke aokorom-a nara.
37 Taim ve,
bia bom raꞌa inyia sin-a korao kokei mataimon ve.
Bia emo korivo veka Yesus-a kakei aokorom-a kara oꞌro ya Farisi ve.
Ta botol ine neman-a raꞌa kwavo.
Botol ve topa keko ya kepao ta sanda kechao kuinyia kuro.
38 Kokai ya konoi koroi iya oreva ya Yesus kakuke iu kompeꞌe yaꞌa,
ya koro ya inepe kowere koraro tao kompeꞌe ya Yesus ya kopitata.
Koro ven ya kopei chapeꞌe vou kwavo ei-ya keiyato kompeꞌe Yesus.
Iri koyakirikiri kompeꞌe ya Yesus ya sanda koyaruru.
39 Kopei Farisi voro kairia Yesus-a kakai oꞌro yaꞌa ero,
ao en kapirike ta yaꞌa veku kairai varuvaru veka,
“Bo bia emo yaꞌa profet awakai,
kuinyia iu nayarau nape eno koreretaka.
To vou bia bom vekaipe.
Keta nayarau veka bia emo sin-a korao.”
40 Ta Yesus-a ruru yaꞌa kayarau ven ya kairaikire roa veka,
“Ma Saimon,
awirai raꞌa kuinyia ina keta nanairai noma.”
Ya Cha Saimon kairai veka,
“Ma Tikse,
namairai mona.”
41 Ya Yesus-a kairai roa veka,
“Bia riepin dinau va keraipao piya bia raꞌa.
Bia raꞌa dinau ya korao veka pe vou 50-pla fotnait kuinyia iya,
kopei raꞌa dinau veka pe vou 5-pla fotnait kuinyia iya.
42 Ta yei rara vou ketao va nerepoa varu kowaunrei.
Ya kopei kairai roiy dinau yei nuinyia noreu.
To bia nape keta narererova revo?”
43 Kopei Cha Saimon kairaikire roa veka,
“Nena kanitoro bia emo dinau pako arao ero.”
Ta Yesus-a kairai roa veka,
“O kinao mema kowuwurow.”
44 Ya karovoruka iu bia bom ya kairai roa Cha Saimon veka,
“Bia bom ve namapirikeo?
Kakane oꞌro aꞌari moma,
pii va via amona ke kompeꞌe nanini vai,
ta bia bom ve inepe vou korenaniri kompeꞌe ya chapeꞌe vou kwavo ei-ya kerenato kompe.
45 Mema via iri emina kirikiri,
ta bia bom evo po,
taim kakane oꞌro mema kokai kuinyia iu mare vo,
bia bom evo po kompeꞌe iri kerena kirikiri.
46 Via wel-a amako cha emena muru,
ta bia bom emo po sanda va koko ya korena ruru kompe.
47 Kanairai noma veka,
bia bom-a korererona revo pako,
ero korao veka,
sin mowmow vou ya God-a kapereoki.
Kopei bia nape sin mentanaka po narao ta God-a napereo,
yaꞌa ta karererona mentan po.”
48 Ya Yesus-a kairai row bia bom veka,
“Sin momu kanapereoki ven.”
49 Ta yei beiyo kekepi aokorom-a kepa yei veku kyirirai veka,
“Yaꞌa bia bekaipe ta sin yei beiyo kapereoki?”
50 Ya Yesus-a kairai row bia bom-a veka,
“Bilip momu kuinyia rona ta God-a kako momu varu.
Ta mare nonomi nau riꞌi mariri.”