4 A va kairai roiy ven ya kairai roa Cha Saimon veka,

“Bot-a namaturukeki pii vororo re ya chao va noparaiyo ke ba va nopavei.”

5 Cha Saimon kairaikire roa veka,

“Bia beiy,

bo kemirevapana mow revo roro ririva kokai kuinyia iu roronai,

ta via ba va raꞌa emaivia vai.

Kamairai ta keta chao va nanaraiyo vova.”

6 Chao va keparaiyo pii ya ba prumo kekonai ta chao va rovakore revo ta korake noipepe.

7 Korao veka ta eno ketao poiy ovu yei ekepi bot raꞌa ere ke nekape nelpim yei.

Kekape ya ba kechao koraro bot riepin ta bot riepin-a kererake nerevuvo.

8 Cha Saimon Pita ao en kapirikeo,

ya boratapo katureriyo iu kom ya Yesus ya kairai roa veka,

“Biapako,

namemena ya nanomi,

nena sin-a kanao.”

9 Cha Saimon Pita awei aro ovu yaꞌa keririko taim kepirike ba prumo kyiavei.

10 Meꞌe biam riepin ya Cha Sebedi,

Cha Jems eri Cha Jon,

yei minyiao keraiririko.

Cha Jems eri Cha Jon yei aro inyia ba kepao piya Cha Saimon.

Ta Yesus-a kairai roa Cha Saimon veka,

“Via namariri.

Mare ta nonoi,

bo mema keta beiyo va namako yei.”

11 Ya bot riepin-a keringo kokoi kuinyia meꞌri nake,

ya ao mowmow yei kepepere ya pa va kepekeiya Yesus.

12 Yesus-a kanoi kakei mataimon raꞌa,

ya bio raꞌa kakai iya.

Bia emo,

reka yaꞌa lepro koraka nau.

Kapirikeiya Yesus ya boratapo katureriyo ya okokati koraro meꞌri ya inyia katere roa Yesus veka,

“Biapako,

bo kamake naelpim nena,

kuinyia iu reka taipo nena namao noneman varu.”^b

13 Yesus-a eno kareretaka bia emo ya kairai roa veka,

“Kanerenoma.

Namaniniu.”

Ya bererenki lepro korereiya bia emo.

14 Ya Yesus-a to kupuana va kairai roa veka,

“Via namairai moa bia raꞌa row ao en.

Keta nanomi miya po pris vou tempel ya reka mema namiritaka.

Ya ofa namao ke noriritao veka reka mema ya koneman ven veka Cha Moses kairai.

Namao veka ke beiyo va nepirike reka mema ya koneman varu.”

15 Ta awirai ya Yesus-a koawetari ya konoi.

Ya kopei aro mowmow kekapekape ke to nepiarivo ta aro a oraie ero,

naraie neneman varu.

16 Yesus-a inyia karerei aro bombiam ya kanoi bo beiyo ewaun ya inyia beten-a karao.

17 Umo raꞌa Yesus-a skul-a inyia karoiy aro bombiam ta yei Farisi awei tikse vou lo kekepi bo ve.

Farisi awei tikse vou lo kekape popore boko mowmow vou mataimon Jerusalem,

distrik Galili ta Judia.

Kupuana ya Biapako kuinyia iya Yesus ke beiyo a va oraie ero,

naraie neneman varu.

18 Ta yei aro ovu bio raꞌa kainyia rovore bet raꞌa poiy kekapenaka.

Kom-a nau eno yaꞌa bio evo keiyarai ta kepake poiy nenopi oꞌro aꞌari ke neperiaki kakuke iya Yesus.

19  Kekape ya kepirike veka beiyo va keprumo revo ta via kuinyia iu poiy nenopi piya Yesus.

Ya poiy kekope oꞌro koꞌom nake ya oꞌro koꞌom-a kekapopo ya keperiao kararo revo rora iu bo Yesus-a aroi em.

20 Yesus-a kapirike bilip yei ya kairai roa bia emo veka,

“Kura,

sin mema kanapereoki ven.”

21 Farisi awei saveman vou lo^c inyia ova kekinakinao veka,

“Bia ere yaꞌa bia bekaipe ta karake bopo va nako vova God,

ta awirai ve kairai?

Bio raꞌa via kuinyia iu sin-a napereo vai.

God-a unake po kuinyia iu sin-a napereo.”

22 Yesus-a ruru yei kayarau ven ya katere roiy veka,

“To korao vekaipe ta ruru veka kuinyia romoꞌo kuro mopu?

23 Awirai bekaipe keta nomariro rona nanairai?

Nena keta nanairai veka,

‘Sin moma kanapereoki,’

o nena keta nanairai veka,

‘Namavariko ya namaute?’

24 Kanerenow nopuyarau veka,

Ma ya Bio^d kupuana kuinyia iya meꞌri ve ta kuinyia iu sin-a napereo.”

Ya karovoruka iya bia emo kom-a nau eno oyarai em,

ya kairai roa veka,

“Kanairai noma,

namavariko bet mema namako ya namaute nanomi oꞌro mema.”

25 Ya bererenki po bia emo kavariko iꞌiy ine yei aro bombiam ya bet voro ainyiatao ero kako ya awoꞌo ya God-a inyia kavoko kaute kanoi oꞌro yaꞌa.

26 Aro prumo kekepi keririko toro ta awoꞌo ya God-a kyiavoko.

Keriri revo ta inyia kyirai veka,

“Mare ao mara kemipirike revo!”

27 Ao en kerenori ven ya Yesus-a kanoi upuo ta kapirikeiya bio raꞌa takis-a kako awoꞌo ya Cha Livai^e kakei oꞌro takis.

Ya Yesus-a kairai roa veka,

“Pa namenarom.”

28 Ya Cha Livai kavariko ao prumo karereo ya pakeiyaroi.

29 Kopei oꞌro Cha Livai,

aokorom pako karao roa Yesus.

Ta yei aro prumo takis-a eko awei aro ovu kekepi aokorom-a kepa piy minyiao.

30 Kopei kovevengki Farisi awei tikse vou lo yei Farisi^f kyirirai nai disaipel^g ya Yesus veka,

“To korao vekaipe ta aokorom-a kopa pii va koputon piy beiyo takis-a eko awei beiyo sin-a epao ero?”

31 Kopei Yesus-a kairaikire roiy veka,

“Beiyo via a oraie,

via kuinyia iu nenopi piya dokta.

Yei beiyo a oraie ero po kuinyia iu nenopi piya dokta.

32 Nena via akane ke nainiy beiyo eniniu iu ine ya God.

Nena kakane ke nainiy beiyo inyia sin-a epao ero ke riꞌi va nerovoru.”

33 Ta aro kyirai poa veka,

“Yei aro inyia pa epekeiya Cha Jon,

umumoka aokorom-a kekepiyao ta beten-a kepao.

Ta yei aro inyia pa epekei Farisi minyiao ao en kepao.

Kopei yei aro inyia pa kepekema,

aokorom-a inyia kepa ta pii va keton.”

34 Ya Yesus-a kairaikire roiy veka,

“Bo bia raꞌa karake om-a nako,

era kuinyia iu nopirai poiy kura yaꞌa aokorom-a nekepiyao taim bia emo baunke nakei iꞌiy vai?

Bauni.

35 Kopei bia emo om-a karake nako ero,

aro yaꞌa keko yaꞌa kenopinaka ven,

ya kopei taim emo aro kura yaꞌa aokorom-a kekepiyao.”

36 Ya aꞌai-ya raꞌa karari roiy,

“Bio via kuinyia iu no tare narororu ya koraꞌa mentanaka nako naimimetao no tora.

Bo narao veka,

keta no tare notaipo ya noto tare keta via norao iu minyiao no tora vai.

37 Ao raꞌa minyiao,

bio raꞌa via kuinyia iu wain tare navere noraro wain tao tora.

Bo narao veka,

keta wain tare ropi vou noputu ya wain tao tora keta notari.

Keta wain-a novere ya wain tao minyiao keta ya notaipo nau.

38 Korao veka ta,

wain tare keta nevere norarotao wain tao tare.^h

39 Kopei bio wain tora naton keta via kuinyia iu wain tare narererow vai.

Kayarau ven veka,

‘Wain tora koneman revo.’ ”