Satan-a katraim ya Yesus
(Matyu 4.1-11; Mak 1.12-13)
4
Yesus-a rovakare row Holi Spirit,
ya pii Jordan-a karereo ya Holi Spirit-a kako yaꞌa kanoi bo ramata kanapo beiyo ewaun.
2 Ya kakei boko vere konoi kuinyia iu umo 40-pla ya kopei Satan-a katraim yaꞌa.
Umo ve kerenori ven,
aokorom-a via raꞌa ara vai,
ta koraiyova revo.
3 Ya kopei Satan-a kairai roa veka,
“Bo mema Ma Biam ya God,
namairai mow topa voro norovoru norao veka beret ya nama.”
4 Ya Yesus-a kairaikire roa veka,
“Awirai-ya kuinyia buk ya God-a kuirai veka,
‘Beiyo via kuinyia iu nekepi tare row aokorom vai.’ ” a
5 Kopei Satan-a kako yaꞌa kakoi nake ya bererenki po kingdom mowmow vou bo meꞌri kariritaka.
6 Ya kairai roa Yesus veka,
“Kupuana nena keta nanoma ke namaoremamire kingdom mowmow ve ya awoꞌo pako va keta namako.
Kingdom mowmow em God-a karona keta naonoa nape kanerenova.
7 Bo boratapo namatumeriyo ya lotu namao mona,
keta ao mowmow em nanoma nau.”
8 Ya Yesus-a kairaikire roa Satan-ab veka,
“Awirai-ya kuinyia Buk ya God-a kuirai veka,
‘Mema ta lotu namao moa Biapako,
God mema ya bo yaꞌa unake po namao.’ ”c
9 Satan-a kako yaꞌa Yesus-a kanoi mataimon pako Jerusalem ya kareria karoitaki revo tempel nake ya kairai roa veka,
“Bo mema Ma Biam ya God,
namaopuki namaro pika.
10 Ero korao veka,
awirai-ya kuinyia Buk ya God-a kuirai veka,
‘God-a ta nairai roiy ensel yaꞌa nyioreparima ya nepaoparima revo.
11 Ta nyiavema eno yei ke via topa raꞌa kom-a norematutari vai.’ ”d
12 Ya Yesus-a kairai roa Satan-a veka,
“Awirai-ya kuinyia Buk ya God-a kuirai veka,
‘Via nama traim ya Biapako,
God mema.’ ”e
13 Satan-a katraim yaꞌa Yesus row ao prumo maramara ven,
ya karereiya kanoi kakei keiya roraꞌa vova.
Aro yei mataimon Nasaret via eperepova Yesus
(Matyu 4.12-17; Mak 1.14-15)
14 Ya Yesus-a kanoi varu distrik yaꞌa Galili row kupuana ya Holi Spirit.
Ta aro bombiam prumo vou boko vere awirai-ya kerivo veka Yesus-a kopei kakai ven kakei Galili.
15 Kanoi rorore oꞌro lotu yei Judaf skul-a karoiy aro bombiam mowmow.
Ta aro mowmow awoꞌo yaꞌa kyiavoko revo nake.
Ku vou korao veka,
kepirikeiya veka yaꞌa tikse neman.
Nasaret-a ova koreiroro rova Yesus
(Matyu 13.53-58; Mak 6.1-6)
16 Yesus-a kanoi varu mataimon Nasaret boko voro kapako ero.
Ya de Sabat-ag kokai ya kanoi oꞌro lotuh yei Juda,
veka inyia kararao.
Ya kavariko karoi ke awirai uinyia Buk ya God-a naritim.
17 Ya buk ve awirai ya profet Aisaia kuinyia keupoa.
Buk-a kavoki konoi ya kapirike awirai raꞌa kuirai veka,
18 “Spirit ya Biapako kakei ina,
ero korao veka,
kamompe nena ven ke awirai neman ya God-a nanako nanoni noiy beiyo ao va owaunrei.
Kairai rona nakane awirai awakai-ya nanairirai nopu veka,
‘Beiyo okepi kalabus kuinyia iu kalabus-a nopepeo ya nonopi upuo,
kopei beiyo ine taipo,
kuinyia iu neperi varu.’
Kairai rona nanoni ke nanin beiyo nai pako yei aro ovu eko ero,
kuinyia iu nenopi kanapo.
19 Ta kasalim nena ke awirai neman-a nanairirai noiy veka de-ya kokai ven keta Biapako va naelpim yei aro yaꞌa.”i
20 Yesus-a buk-a karitim ven ya kopei karoroka ya kaoroa bio buk-a aorerariu ya kanoi kakeiyo.j
Ta aro bombiam-a kekepi oꞌro lotu aꞌari,
ine yei konoi rova yaꞌa unake po.
21 Ya kopei kairai roiy veka,
“Mareakai awirai-ya kuinyia Buk ya God akai-ya koraonao iu teve mopu.”
22 Aro mowmow ve awoꞌo yaꞌa kyiavoko nake ya ova kekinakinao pako row awirai neman airai roiy em.
Ta yei veku ketere veka,
“Bia emo,
yaꞌa ma ya Cha Yosep.
To korao vekaipe ta awirai em kairai?”
23 Ya Yesus-a kairai roiy veka,
“Kanayarau ven veka,
awirai ve ta nopirai pona,
‘Ma Dokta,
reka mema veku namao noneman varu.
Awirai vou ao va kamaremare mataimon Kaperneam kemirivo.
Mare namao minyiao oꞌro ku mema.’ ”k
24 Ya kairai veka,
“Awakai-ya kanairai nopu.
Beiyo via kuinyia iu awirai ya profet raꞌa nerivo taim nautute oꞌro ku yaꞌa veku.
25 Awakai-ya kanairai nopu veka,
taim ya profet Elaija,
aro bom prumo am-a keviripere ven kerekeri Israel.
Taim ve,
God-a via arin aꞌ va oai oraro meꞌri vai,
konoi kuinyia iu veka ainini 3-pla ura 6-pla.
Ta aokorom minyiao kowaunki ta boko mowmow vere koraiyoe revo.
26 Ta God-a via asalim yaꞌa profet Elaija anoi rire aro bom prumo am-a eviripere vai.
Kopei po kasalim yaꞌa kanoi iu pon bia bom raꞌa.
Bia bom ve,
vou via Juda.
Kokei boko Sarefatl kakuke iu mataimon Saidon,
am vou karai ven.
27 Ya taim ya profet Elisa minyiao,
aro prumo kekepi Israel.
Lepro koraie ta via alpim yei ke naraie neneman varu.
Kalpim yaꞌa pon bia raꞌa vou kantri Siria karao reka keiya niniu varu,
awoꞌo yaꞌa Cha Naman.”
28 Taim aro mowmow kekepi oꞌro lotu yei Juda awirai ve kerivo,
ova koreiroro revo.
29 Ya kevereko Yesus-a kerainyiaka kenopi mataimon upuo.
Mataimon yei kuinyiatao tou,
ya kerainyiaka kenopi tou ika paripari kepake neturakaki raronarei.
30 Ta karerei kaute kanoi romoiy aro bombiam prumo ya kanoi kawaunki.
Yesus-a spirit taipo karirikeiya
(Mak 1.21-28)
31 Ya kopei kararo mataimon Kaperneam kuinyia distrik Galili,
ya de Sabat skul-a karoiy aro bombiam.
32 Keririko toro row awirai yaꞌa,
ero korao veka,
awirai airai roiy ero kokupuana.
33 Bio raꞌa spirit taipo kakei iya kakei oꞌro lotu aꞌari yei Juda.
Kaiy pako ya karo kairai veka,
34 “Ei!
Yesus vou mataimon Nasaret,
arape kemao moma?
Era mema kakame ke ao taipo namao momi vai?
Kanayarama ven,
mema Bia Holi ya God.”
35 Ya Yesus-a katoveu spirit taipo ya kairai row veka,
“Roꞌo va nometo!
Ya nomemeiya!”
Ya spirit taipo bia emo koaivia koraraiyo romoiy ya korereiya.
Ta via ao taipo raꞌa orao roa vai.
36 Aro bombiam koka keririko toro ya yei veku kyirirai veka,
“Bou,
emo awirai bekaipe?
Namba nau kupuana kuinyia iya ta,
a va kairai roiy spirit taipetaipe ta a va kerivo poa ya kepepeiya.”
37 Ta awirai vou ao en kararerare konoi rorore boko mowmow vou bo em.
Yesus-a aro prumo karaie keneman
(Matyu 8.14-15; Mak 1.29-31)
38 Yesus-a oꞌro lotu yei Juda karereo,
ya kanoi oꞌro ya Cha Saimon.
Oꞌoro ya Cha Saimon,
a va korao ta reka koroim revo.
Ta kenopi ketere poa Yesus ke nalpim vou.
39 Ya karoi kakuke iu bia bom ve ya awirai kupuana kairai row reka iꞌim ya reka iꞌim ve korereo.
Bererenki bia bom-a a va orao em,
kopei koneman varu ya kovariko konoi aokorom-a korao roiy kepa.
Yesus-a aro bombiam prumo karaie keneman
(Matyu 8.16-17; Mak 1.32-34)
40 Taim umo va karake nararo,
aro ve a mara oraie em,
aro yei keko yei kekape piya Yesus.
Ya eno kareretatai moike moike ya karaie keneman.
41 Ya karao spirit taipo kepepei ya kyepi kyirai veka,
“Mema Ma Biam ya God.”
Ta katovei kairai roiy via a va nyirirai vai.
Ku vou korao veka,
spirit taipetaipe ve keyarau ven veka yaꞌa Krais.
Yesus-a kautute mataimon ovu
(Mak 1.35-39)
42 Kopei roronaike,
Yesus-a kanoi boko raꞌa beiyo ewaun.
Ta aro bombiam prumo va kyiorenanaka kenopi ya kevakakeiya.
Ya kopei kepaopariya ke via narerei.
43 Ta kairaiki roiy veka,
“Ku ya God-a kasalim nena,
ero korao veka,
nena ta awirai neman vou kingdom yaꞌa nanairirai nonoi rorore mataimon ovu minyiao.”
44 Ya awirai-ya kairirai konoi rorore oꞌro lotu erinyia boko mowmow yei Juda.