Cha Jon Baptais awirai ya God-a kairirai
(Matyu 3.1-12; Mak 1.2-8; Jon 1.19-28)
3
Kopei namba 15 ainini ya Cha Sisar Taiberius kakei king vou kantri Rom,
ta kantri mowmow erinyia Rom kaorerarire.
Aro vevo yei minyiao kepiakepiroko Cha Sisar Taiberius ta kaorerariy,
Cha Pontius Pailat kaorerariu Judia kopei Cha Herota kaorerariu Galili.
Raꞌai ya Cha Herot awoꞌo ya Cha Pilip,
kaorerariu Ituria awei Trakonitis.
Cha Lisanias kaorerariu Abilene.
2 Kopei taim ve,
Cha Anas eri Cha Kaiapas keraikepi hetprisb vou tempel.
Ma biam yaꞌa Cha Sekaraia awoꞌo yaꞌa Cha Jon,
kanoi kakei bo ramata kanapo beiyo ewaun ya God-a awirai-ya kaoroa.
3 Ya kanoi rorore boko mowmow kerinyia kakuke iu pii Jordan.
Ya awirai ya God-a kairirai roiy aro bombiam,
ke riꞌi va nerovoru ya baptais-a neko,
ke God-a sin yei naririkeoki.
4 Ao en kokai pa va korikeo awirai uinyia buk ya profet Aisaia.
“Poko ya bio raꞌa kwei bo ramata kanapo beiyo ewaun ya kuirai veka,
‘Mopu keta rara ya Biapako nopere noneman
ya nuinyia notopan po.
5 Bo poruporuwo meꞌri noputi
ya tou mememe nau ipipo,
noporo nereraro pika.
Rara rororoka ta neretopan po,
kopei rara ere woriworiko ta neretoto po.
6 Aro bombiam mowmow vou meꞌri keta nepirikeo bo en,
God-a karao ke nako memi varu.’ ” c
7 Aro mowmow inyia kekapepiya Cha Jon ke baptais-a neko,
ta kairai roiy veka,
“Mopu meꞌe yei uꞌu taipetaipe,
nape kairai ropu ta kopake nopepeo ao taipetaipe akai,
God-a karake narao nokai em?
8 Mopu keta ao ovu noparepare ke noriritao veka riꞌi va kopurovoru.
Via nopirai veka,
‘Cha Abraham yaꞌa apo raiyau memi.’
Kanairai nopu,
God-a kuinyia iu topa ve narovoru nererao veka meꞌe ya Cha Abraham.
9 Aimonkamo kuinyia ven ku rere aꞌai.
Ta aꞌai voro via akai-ya ereave revo ero,
keta nyirokipe nereworuru ya neparai nonoi aiyerao.”
10 Aro bombiam prumo ketere poa Cha Jon veka,
“To memi keta arape nemao?”
11 Ya Cha Jon kairaikire roiy veka,
“Bio noreka riepin nuinyia iya,
keta raꞌa naoroa bio raꞌa no owaun reiya ero.
Kopei bio aokorom-a nuinyia iya,
yaꞌa minyiao keta narao veka.”
12 Beiyo takis-a eko ero,
yei minyiao kekape ke baptais-a neko.
Ya ketere poa veka,
“Ma Tikse,
to memi keta arape nemao?”
13 Ya kairaikire roiy veka,
“Mopu viake ketao va nopukopei beiyo notawo mak veka gavman-a kairai ropu nopuko ero.”
14 Ta yei soldia ovu ketere poa veka,
“To memi minyiao ta arape nemao?”
Ya kairaikire roiy veka,
“Mopu viake ao kanapon-a nopirai poiy beiyo ke ketao va aokakana nopao voiy vai.
Ova keta noropu row ketao voro gavman-a karopu ero.”
15 Aro bombiam mowmow va kekepikeiya Krais ke nepirikeiya.
Ya ao en kepirikere ya ova kekinakinao romoꞌo kuro yei veka,
“Era Cha Jon,
yaꞌa Kraisd vai?”
16 Ta Cha Jon kairaikire roiy veka,
“Nena pii kanapon-a kanabaptaisim mopu,
bio raꞌa ta nakaiwona pa.
Kupuana yaꞌa kotawo kupuana nena.
Nena via ananeman revo ta via anainyia niu ke tiꞌi vou sendel yaꞌa nenia raritou.e
Keta nabaptaisim mopu row Holi Spirit nau aiyerao.
17 Savol-a kavo kuinyia eno yaꞌa ke wit-a narovoru ya akai-ya nairiri narere nerinyia oꞌro aꞌari yaꞌa.
Kopei wit mo,
ta nakirari aiyerao voro via kuinyia iu nokiyo.”
18 Cha Jon awirai prumo vova minyiao kairai roiy ke riꞌi va nokokonai.
Karao veka ta awirai neman ya God-a kairai konoi roiy aro bombiam.
Cha Herot kareriaki Cha Jon kakei kalabus
19 Kopei taim ve,
Cha Jon katoivia Cha Herot gavana voro aorerariy ero,
row ao taipetaipe arao ero.
Kako vou Kwa Herodias om ya raꞌai yaꞌa.
Ta pasin taipetaipe akai-ya kararerare minyiao.
20 Cha Herot ao taipo raꞌa karao vova,
kareriaki Cha Jon kakei kalabus.
Cha Jon kabaptaisim ya Yesus
(Matyu 3.13-17; Mak 1.9-11)
21 Taim aro bombiam mowmow baptais-a keko,
Yesus-a ya minyiao baptais-a kako.
Ya kopei beten-a karao ya heven-a koruriki.
22 Ya Holi Spirit-a kararo iya Yesus veka ruꞌu mampai.
Taim ve awirai raꞌa koraro heven kuirai veka,
“Mema Ma nena.
Nena kanerenoma revo ta ova koronaroma.”
Aro apo ya Yesus
(Matyu 1.1-17)
23 Taim Yesus-a bo yaꞌa inyia karao,
ainini yaꞌa korao veka 30.
Ta aro bombiam-a kepitoro veka Yesus-a yaꞌa ma ya Cha Yosep.
Aka ya Cha Yosep,
Cha Heli.
24 Aka ya Cha Heli,
Cha Matat.
Kopei aka ya Cha Matat,
Cha Livai.
Kopei aka ya Cha Livai,
Cha Melki.
Kopei aka ya Cha Melki,
Cha Janai.
Kopei Cha Janai,
aka ya Cha Yosep.
25 Cha Yosep aka ya Cha Matatias.
Kopei aka ya Cha Matatias,
Cha Amos.
Kopei aka ya Cha Amos,
Cha Nahum.
Kopei aka ya Cha Nahum,
Cha Esli.
Kopei aka ya Cha Esli,
Cha Nagai.
26 Kopei aka ya Cha Nagai,
Cha Mat.
Kopei aka ya Cha Mat,
Cha Matatias.
Kopei aka ya Cha Matatias,
Cha Semen.
Kopei aka ya Cha Semen,
Cha Josek.
Kopei aka ya Cha Josek,
Cha Joda.
27 Kopei aka ya Cha Joda,
Cha Joanan.
Kopei aka ya Cha Joanan,
Cha Resa.
Kopei aka ya Cha Resa,
Cha Serubabel.
Kopei aka ya Cha Serubabel,
Cha Sealtiel.
Kopei aka ya Cha Sealtiel,
Cha Neri.
28 Aka ya Cha Neri,
Cha Melki.
Kopei aka ya Cha Melki,
Cha Adi.
Kopei aka ya Cha Adi,
Cha Kosam.
Kopei aka ya Cha Kosam,
Cha Elmadam.
Kopei aka ya Cha Elmadam,
Cha Er.
29 Aka ya Cha Er,
Cha Josua.
Kopei aka ya Cha Josua,
Cha Elieser.
Kopei aka ya Cha Elieser,
Cha Jorim.
Kopei aka ya Cha Jorim,
Cha Matat.
Kopei aka ya Cha Matat,
Cha Livai.
30 Aka ya Cha Livai,
Cha Simeon.
Kopei aka ya Cha Simeon,
Cha Juda.
Kopei aka ya Cha Juda,
Cha Yosep.
Kopei aka ya Cha Yosep,
Cha Jonam.
Kopei aka ya Cha Jonam,
Cha Eliakim.
31 Aka ya Cha Eliakim,
Cha Melea.
Kopei aka ya Cha Melea,
Cha Mena.
Kopei aka ya Cha Mena,
Cha Matata.
Kopei aka ya Cha Matata,
Cha Natan.
Kopei aka ya Cha Natan,
Cha Devit.
32 Aka ya Cha Devit,
Cha Jesi.
Kopei aka ya Cha Jesi,
Cha Obet.
Kopei aka ya Cha Obet,
Cha Boas.
Kopei aka ya Cha Boas,
Cha Salmon.
Kopei aka ya Cha Salmon,
Cha Nason.
33 Aka ya Cha Nason,
Cha Aminadap.
Kopei aka ya Cha Aminadap,
Cha Atmin.
Kopei aka ya Cha Atmin,
Cha Arni.
Kopei aka ya Cha Arni,
Cha Hesron.
Kopei aka ya Cha Hesron,
Cha Peres.
Kopei aka ya Cha Peres,
Cha Juda.
34 Aka ya Cha Juda,
Cha Jekop.
Kopei aka ya Cha Jekop,
Cha Aisak.
Kopei aka ya Cha Aisak,
Cha Abraham.
Kopei aka ya Cha Abraham,
Cha Tera.
Kopei aka ya Cha Tera,
Cha Nahor.
35 Aka ya Cha Nahor,
Cha Seruk.
Kopei aka ya Cha Seruk,
Cha Reu.
Kopei aka ya Cha Reu,
Cha Pelek.
Kopei aka ya Cha Pelek,
Cha Eber.
Kopei aka ya Cha Eber,
Cha Sela.
36 Aka ya Cha Sela,
Cha Kainan.
Kopei aka ya Cha Kainan,
Cha Arpaksat.
Kopei aka ya Cha Arpaksat Cha Siem.
Kopei aka ya Cha Siem,
Cha Noa.
Kopei aka ya Cha Noa,
Cha Lamek.
37 Aka ya Cha Lamek,
Cha Metusela.
Kopei aka ya Cha Metusela,
Cha Enok.
Kopei aka ya Cha Enok,
Cha Jaret.
Kopei aka ya Cha Jaret,
Cha Mahalalel.
Kopei aka ya Cha Mahalalel,
Cha Kenan.
38 Aka ya Cha Kenan,
Cha Enos.
Kopei aka ya Cha Enos,
Cha Set.
Kopei aka ya Cha Set,
Cha Adam.
Kopei Cha Adam ya ma ya God.