Röʼë rinná bëʼë ladaj nupa nápagacatërö yöl-laʼ huáca,

lë́gaca Querubín,

ateʼ rizxizi luyú.

2 Nayë́pisëtërëʼ Xanruʼ lu yödzö Sión,

ateʼ rinná béʼenëʼ bönachi yúguʼtë yödzö izáʼa.

3 Ral-laʼ ilaʼgúʼu Lëʼ yöl-laʼ ba yúguʼtë bönachi,

tuʼ caní saʼyéaj,

en le run ga runruʼ Lëʼ bal.

¡Láʼayi náquiëʼ Lëʼ!

4 Nadxíʼi quézinuʼ le naca tsahuiʼ,

Liʼ,

Bönniʼ unná bëʼ nayë́pisë.

Tsaz naguixjuʼ le naca dxiʼa tsáhuiʼdoʼ,

en nuzúʼ quégaquiëʼ zxíʼini xiʼsóëʼ Jacob le naca tsahuiʼ,

en le naca idútë li.

5 ¡Guliʼgún zxönëʼ Xanruʼ Dios!

Buliʼzechu zxíbiliʼ lahuëʼ Lëʼ ga röʼë rinná bëʼë.

¡Láʼayi náquiëʼ Lëʼ!

6 Guláquiëʼ Moisés,

en Aarón bixúz queëʼ,

ateʼ benëʼ Samuel tsözxö́n nupa gulaʼyéaj ládxiʼgaca Lëʼ.

Buluʼlidzëʼ Xanruʼ,

ateʼ bubíʼi cazëʼ didzaʼ.

7 Tu lu böaj bë́ʼlenëʼ légaquiëʼ didzaʼ.

Gulunëʼ ca taʼnná bëʼ xibá queëʼ,

en yuguʼ le gunná béʼenëʼ légaquiëʼ.

8 Bubiʼu didzaʼ lógaca bönachi quiuʼ,

Xantuʼ Dios.

Buluíʼinuʼ légaquiëʼ nacuʼ Dios,

en runiti loʼ bönachi,

pero rubiʼu quégaquiëʼ ca saʼyéaj döʼ tuʼë.

9 ¡Guliʼgún zxönëʼ Xanruʼ Dios!

¡Buliʼzechu zxíbiliʼ lahuiʼ lo guíʼa láʼayi ga zoa cazëʼ,

tuʼ náquiëʼ láʼayi Xanruʼ Dios!