Yuguʼ dza nupa tuʼdíʼi nedaʼ taʼbía no nedaʼ.

2 Yuguʼ dza nupa bitiʼ taʼléʼe nedaʼ dxiʼa tuáʼ döʼ quiaʼ.

Zián nupa taʼdíl-lalen nedaʼ lu yöl-laʼ run ba zxön cuínguequi.

3 Cateʼ radxi ridzö́bidaʼ,

uzxöni ládxaʼa Xanruʼ.

4 Ruzxöni ládxaʼa-nëʼ Dios,

en riguʼa yöl-laʼ ba xtídzëʼë.

Ruzxöni ládxaʼa-nëʼ,

en bitiʼ bi gádxidaʼ.

¿Bizxi caz gaca ilún quiaʼ bönachi?

5 Yuguʼ dza tun nigui nedaʼ nupa bitiʼ taʼléʼe nedaʼ dxiʼa.

Taʼzáʼ ládxiʼticaʼsö nacxi iluáʼ döʼ quiaʼ.

6 Tuʼdubëʼ ga nagáchiʼsö,

en tuʼyúlanëʼ yúguʼtë le runaʼ,

para gataʼ quégaquiëʼ lataj ilútiëʼ nedaʼ.

7 Bubiʼë quégaquiëʼ,

Dios,

ca naca döʼ tuʼë,

en lu yöl-laʼ rilé quiuʼ busuniti légaquiëʼ.

8 Nöz quézinuʼ Liʼ ca röʼa böniga.

Nurixuʼ Liʼ nisa ribödxi quiaʼ.

¿Naruʼ cabí nuzúʼ léguequi lu guichi quiuʼ?

9 Cateʼ ulidzaʼ Liʼ,

laʼ dza náʼasö uluʼhuécja gúz cúdzuʼlö nupa tuʼdíʼi nedaʼ.

Nöz quézidaʼ rácalen cazuʼ nedaʼ,

Dios.

10 Ruzxöni ládxaʼa-nëʼ Dios,

en riguʼa yöl-laʼ ba xtídzëʼë.

Ruzxöni ládxaʼa-nëʼ Xanruʼ,

en riguʼa yöl-laʼ ba xtídzëʼë.

11 Ruzxöni ládxaʼa-nëʼ,

en bitiʼ bi gádxidaʼ.

¿Bizxi caz gaca ilún bönachi quiaʼ?

12 ¡Gunnaʼ quiuʼ,

Dios yuguʼ le guzxíʼ lu naʼa!

¡Cuʼa Liʼ yöl-laʼ ba!

13 Busölóʼ nedaʼ lu yöl-laʼ guti,

en nuzúʼ nedaʼ tsutsu.

Ridá cazaʼ loʼ Liʼ,

Xantuʼ Dios,

lu beníʼ ruʼu quégaca nupa nabángaca.