Jesús beonie ttu unbiyuu daa yatti niꞌa náni
9
Laniala beopi Jesús lheꞌe barcoha,
betee lo indattooha belhee attu ladu,
qui besine lheꞌe yies guee.
2 Nía bisín lencana ttu benni xua lo ttu breta daa yatti niꞌa náni lo Jesús.
Atti biláni Jesús gua riaba le ca unnuha dequi guadábe eyonie nua,
lania la re nu daa yatti niꞌa nániha:
—¡Tsitsi beni,
xiꞌinto!
Chiba uxía elha xen lasi gue ca tulha guelha.
3 Nianna ttulhe ca nu ruleꞌe nu rá lo ca ley bocaꞌana Moisés,
belabatteba lecani rácana:
“Unbiyuu du-ni nna rinne güebunna gue Tata Do Iyyabaaha rána aná.”
4 Ttiaca Jesús yuxeabe nu rulaba le ca nua,
nianna re cana:
—¿Biaca rulaba lele nu bittu anca tsee?
5 ¿Bi nua nu sattiru inne ttu benni?
¿Si innána:
“Chiba uxía elha xen lasi gue ca tulha guelha”,
aca?
¿Si innána:
“Guadha nna udátte”,
aca?
6 Quitti uyúle nna neti Benni unbiyuu daa iyyabaaha,
te elha ra xxen le quia yies lo yu-ni qui dhia elha xen lasi gue ca tulha gue ca benni.
Nianna re nu daa yatti niꞌa nániha:
—Guadha nna bodaxxutte breta xualu loenna beyyatte lheꞌe yoꞌo gueluha.
7 Nu daa yatti niꞌa nániha nna guadhatteba nua deyyana lheꞌe yoꞌo gueniha.
8 Atti bilen ca benni seꞌe nía nu ucaha nna bebanlhabaquinna.
Nianna ulequi xenttebacana Tata Do Iyyabaaha de bete Benniha elha rinnabia gue ca benni qui eyoncana ca nu rani.
Jesús uxie Mateo qui sanone
9 Atti chi deyya Jesús deyuꞌe neda nna biláttebanie neti,
láya Mateo,
doa atta ribía ca nu ruquixacana ca benni belhi nu deyya leni nu rinnabia do Roma.
Jesús nna ráttebe neti:
—¡Utá,
betteno neti!
Neti nna udulítteba diaya len Benniha.
10 Atti do Jesús go etta lheꞌe yoꞌo quia,
níaguaba bisína ixeru ca güequixa lhe adírba ca nu daa tisa guecani ancacana nu runi nu lä anca tsee lhe usiacana roꞌo mexa atta do Jesús lenie ca benni rudheti ca tisa ruleꞌe.
11 Ttiaca atti biláni ca benni fariseo,
unnaba tisattebacana ca benni rudheti ca tisa ruleꞌe Benniha,
rácana ca biꞌiniha:
—¿Biaca ro Benni ruleꞌenie le-na etta leni ca güequixa-na lhe len ca nu runi nu lä anca tsee-na lhe?
12 Atti bienin Jesús nu rá ca nua nna ráttebe cana:
—Ca benni bittu rani-na,
lägabi reasaquinna nuxa unna cana ramedi.
Ca nu rani-na liba reasaquinna nu eyonna cana.
13 Nu unlale nna gualeyya gualuni qui ttedeenle bixa dia le Tata Do Iyyabaaha inne atti re:
“Neti nna raca lasia satúa lele ca benni,
läriga gualutti ca nimala qui utele úna lo becoa quia.”a
Cumu neti nna läga delha yies lo yu-ni qui gaxia ca nu runi nu anca tsee qui odú xiyyancana.
Ca nu runi nu lä anca tsee-na liba raxia qui odú xiyyancana odaxxucana neda gue Tata Do Iyyabaaha.
Rinnaba tisacana Jesús gue nu rutte ubina lheꞌecani
14 Ca benni rudheti ca tisa ruleꞌe Juan biꞌini rugadi indaha nna ubigacabi lo Jesús rácabi Benniha:
—Riꞌitu nna lentu ca benni fariseo-na,
satíaba rutte ubina lheꞌetu.
¿Biacala ca benni rudheti ca tisa ruleꞌelu-na,
bittu rutte ubina lheꞌecani?
15 Jesús becabittebe guecani re:
—¿Si gua dica uxxúa lari yadhi iqui ca benni biyaxi tseꞌecana atta aca laní gue ca nu utsá nácani,
gansi níaba sna doba len lacana unbiyuu nu utsá nániha?
Ttiaca chi isía sá atti itúa unbiyuu utsá nániha len lacana,
laniarguaba nna cuꞌu ubina lheꞌe ca nu seꞌe nía.
16 ’Nuttuguaba nu benni te reguꞌuna saroꞌo lari cubi atta bisú gue xo yaxxu gueniha.
Cumu lari cubiha nna eyoba lo nua.
Lania nna utseꞌe loba nua lari yaxxuha,
atta bisúha nna adíla xxeni aca nua lania.
17 Nuttuguaba nu rigaꞌana vinu cubi lheꞌe ttu yieti yaxxu nu rixuu attiba ttu reꞌe.
Cumu vinu cubiha nna unba nua isú yieti yaxxuha gansi chi dia nua ralana.
Lania nna ilalba vinuha,
iseꞌeloguaba ca yietiha lhe.
Larcala nna lheꞌe yieti cubi liba ttaꞌa vinu cubiha,
lania nna läga tsia latti vinuha lhe yietiha lhe.
Jesús beonie ttu nuila, benie beacani xiꞌiniunná Jairo lhe
18 Laca du Jesús rinnee leni ca benni rudheti ca tisa ruleꞌe Juan,
bisíntteba ttu ca nu anca nu lo gue ca benni Israel bedú xibini lo Jesús.
Nianna rána Benniha:
—Bechitte utti xiꞌiniunnáya.
Ttiaca gansi lu italu uxxúa nálu iquini nna eyacabinna.
19 Jesús udulíttebe die denoe unbiyuuha lenie ca benni rudheti ca tisa ruleꞌe.
20 Nianna ttu nuila chi uca tsiꞌinu ida yuꞌuna isagüe rulalna reni,
ubigattebana daca cuꞌe Jesús qui uca bedaxxuna roꞌo xo Benniha,
21 cumu belaba leni rána:
“Gansi dhaba sattana ladiba roꞌo xo Ben-na,
lania nna güeyacaba.”
22 Jesús bequittebe begüie lo nuilaha,
nianna re na:
—¡Tsitsi beni,
xiꞌini!
Cumu de güia lelu guadába eyonia lu,
nuarca beacalu.
La laniatteba nna beaca nuilaha.
23 Atti bisíni Jesús lheꞌe yoꞌo gue nu anca nu lo gue ca benni Israel nna biláttebanie ca benni chi seꞌe güecuesi lhe ca benni seꞌe ubesi lhe.
24 Nianna re ca nua:
—Gualbiatta nii,
cumu läga utti uncuiti-na,
suntteba tiꞌedhi unná.
Ca benni seꞌe nía nna bedacalaquinna gue Benniha.
25 Ttiaca dequide chi bebeacana ca benni seꞌe nía,
utaꞌatteba Jesús atta te uncuitiha,
atti bedaxxuttebe ná nua.
Uncuitiha nna guadhattebana.
26 Nianna itúba ca nía bina ca benni gue nu beni Benniha.
Jesús beonie chupa ca nu xua locani
27 Atti chi bería Jesús nía,
chupa ca benni xua locani ribesiꞌacana denocana Benniha,
rácana:
—¡Benni datía David,
guatúachi lelu riꞌitu!
28 Atti chi besina Jesús lheꞌe yoꞌoha nna ubigatteba ca nu xua loniha loe.
Nianna unnaba tisattebe cana re cana:
—¿Si gua ria lele guadaya eyonia le?
Ca unnuha nna rácana:
—Guadábalu eyonlu riꞌitu,
xa tata.
29 Laniala nna utane iyya lo ca nua,
nianna re cana:
—Cumu de güia lele güeyacabale nuarca eyacabale.
30 Ca iyya lo ca unnuha nna bealittebacana.
Laniala nna tsitsiba belisa Jesús cana re cana:
—Gualun duelha qui tsa nuttu nu unana gue nu uca-ni.
31 Ttiaca cuentusiba beríacana nía,
utixxiꞌattebaquinna iyába ca benni seꞌe itúba lo yuha gue nu beni Jesús.
Jesús beonie ttu benni ancana biría
32 Sunruba chi bería ca benni uca nu xua loniha nía,
attirba chi bisín leni ca benni ttu unbiyuu ancana biría de yuꞌu be xxegüi lheꞌe cuerpu gueni.
33 Cuantusiba bebea Jesús be xxegüi yuꞌu lheꞌe cuerpu gue unbiyuuha nna unnettebana.
Ca benni seꞌe nía nna tsitsiba rebanquinna nianna ráttebacana:
—Ni ttu libe bittu chi bilenri aca loesi nu uca-ni,
lo yu gue Israel-ni.
34 Ttiaca ca fariseo nna rácana:
—Nu rinnabia ca be xxegüi-nba begüeena unná derechu qui ebeana ca be xxegüi yuꞌu lheꞌe cuerpu gue ca benni.
Jesús rixxiꞌe ixeba ca benni seꞌe reasaquinna unacana ca tisa gue Tata Do Iyyabaaha
35 Iyába lheꞌe ca yiesi xeni lhe lheꞌe ca lheꞌesi lhe requi Jesús ruleꞌenie ca benni,
lheꞌe ca yoꞌo atta rudheti ca benni Israel ca tisa gue Tata Do Iyyabaaha lhe.
Lee nna rixxiꞌenie ca benni seꞌe nía ca tisa tsee gue gaxasná rinnabia Tata Do Iyyabaaha,
reonie ca benni yuꞌu iyáloba isagüe lhe.
36 Atti biláni Jesús ixeru ca benni seꞌe nía,
lee nna besiꞌittebanie cana cumu seꞌe siꞌicana de suntterba lacana seꞌe,
attiba carneꞌe lä caa nuxa uyúncana.
37 Laniala re ca biꞌini rudheti ca tisa ruleꞌe: