—Reyuiri haxari remaa kuri mayetaa upurara kua warixiwaa uwapikawaa panye parana upe. 2 Kua warixiwaa irumu kuaita tuixawaita mundu upewaita, asui kuaita miraita mundu puraita aintaukau iwarixisawa puxuwerawa irumu. 3 Asui kua anju urasu ixe Espiritu ukuawasawa irumu yepe kampu kiti, akiti hamaa yepe kunya uwapika yepe suu pirangawaa rese, asui teresemu kua suu sera puxuwerawa irumu, uriku seti iakanga asui uriku dezi iakaita. 4 Asui isaya kua kunya piranga pixunawaa asui piranga murutingawaa yuiri, siya sese ipurangasawa uru suiwara, ita purangawaa, perula yuiri, asui ipu upe uriku yepe kupu uru suiwara teresemu ae ipuxuwerasawa irumu iwarixisawa ikiasawa irumu yuiri. 5 Asui suwa upe aintaumpinima sera umbeu arama sesewara: "Babilunia turusuwaa, warixiwaa maya ae, mundu puraita puxuwerasawa maya ae." 6 Asui hamaa ukau kua kunya aintaruwi irumu kuaita uruyariwaita, aintaruwi irumu kuaita aintaumbeu testemunyu Jesus rese, asui hasikie hamaa irumu ae. 7 Maa kua anju umbeu ixe arama:

—Marantaa resikie remaa? Hambeu kuri inde arama mayesawataa kua kunya, mayesawataa kua suu yuiri uwapikawaa sese urikuwaa seti iakanga asui dezi iakaita yuiri. 8 Kua suu remaawaa, uikuwaa kuera, tiwa yamaa kuiri, usemuwaa kuri tiipiwaa sui usu arama kuri ukanyemu ae. Asui panye kuaita mundu puraita tiwaita aintauriku aintarera livru upakawaa upe mundu uyupirungawa rame aintausikie aintaumaa kua suu uikuwaa kuera, kua tiwa aintaumaa kuiri, maa uri kuri. 9 Aintaupuderi aintaukuawa ae kuaita ukuawawaita; seti iwitera aintate kuaita seti akanga, asui kua kunya uwapika aintarese. Asui seti tuixawaita aintayuiri. 10 Asui sinku aintasuiwara aintauwari, asui yepe uiku kuiri asui amu uri kuri aintaruixawa arama ae kutarantu. 11 Asui kua suu uikuwaa kuera tiwa yamaa kuiri, aete yuiri yepe aintasuiwara kuaita setiwaita maa uitusa ae, usu ukanyemu arama. 12 Asui kuaita dezi iakaita remaawaa dezi tuixawaita, ainta tire aintauriku aintarendawa tuixawa arama ainta maa kua suu uxari kuri ainta supe umundusara tuixawa yawe irumu kua suu kutarantu yepe ura. 13 Yepenyu aintaumanduarisawa, asui aintauxari suu supe aintaukuawasawa umundusara yuiri. 14 Aintaumunya kuri kera suaxara kua kurderu, asui kua kurderu umuserana kuri ainta, nyãse aete aintaruixawa kuaita aintaruixawaita, aete yuiri aintaruixawa kuaita tuixawaita, asui aintaumuserana kuri yuiri irumu kuaita uparawakawaita uikuwaa santa irumu. 15 Asui unyee ixe arama:

—Kua parana remaawaa uwapikawaa ape kua kunya warixiwaa aete kuaita miraita siyawaita, panye kuaita aintarendawa yaweyawe, panye kuaita upurungitawaa panye nyenga rupi. 16 Asui kua dezi iakaita remaawaa asui kua suu yuiri, puxi kuri aintaumaa kua kunya warixiwaa, asui aintauyuka isui panye imaa yawentu arama kuri ae, asui aintaumbau kuri sukuera asuiwana kuri aintausapi ae tata upe. 17 Nyãse Deus uxari aintaumunya aintapia sui kuaye uputari yawe aintaumunya, yepewasu arama aintaumanduari aintauxari suu supe panye kua umundusara aintauriku ate Deus umbawa umunya kuaye uputariwaa yawe. 18 Asui kua kunya remaawaa aete kua tetama turusuwaa umunduwaa ainta panye kuaita tuixawaita kua mundu kiti.