—Repuamu resu remediri Deus templu, asui kua aintausapiwaa rendawa yuiri, asui kuaita yuiri umeewaita ixupe arama purangawaa templu upe. 2 Maa kua kupiara templu rukena kiti teremediri nyãse aintauxari ae ainta supe arama kuaita tiwaita judeu ainta kuri aintaupiru kua tetama purangawaa kuarenta duis yasi.

3 Asui haxari kuri kuaita mukuĩ umbeuwaita seresewara aintautitika aintaumundeu irumu aintarese aintarupa saku suiwara, aintautitika mili duzentu sesenta ara. 4 Aete mukuĩ mirá ulivera ainta, asui mukuĩ turi uwapikawaa rendawa upuamu kua mundu ruixawa runde kiti. 5 Asui yepe uputari rame umunya ainta supe puxi anyunte tata usemu aintayuru sui usapi arama kuaita aintaruanyanaita, supiwa kuri aintaumanu kuaita uputariwaita umuaiwa ainta. 6 Asui aintaukuawasawa irumu aintaupuderi aintaumusikindawaa iwaka tiarama amana uwari aintautitika irumu, asui aintaukuawasawa irumu aintaupuderi aintaumuyereu parana tuwi aramawaa, aintaupuderi yuiri aintaumuaiwa kua mundu panye puxuwerawa irumu maantu aintauputari. 7 Asui aintaumbauwaa rire aintaumbeu seresewara usemu kuri tiipiwaa sui kua suu umunya arama kera aintaruaxara, asui umuserana ainta asui uyuká ainta. 8 Asui aintapira kuera aintauxari kuri ainta ukara kiti kua tetama turusuwaa kua aintaumuseruka Suduma yawe Egitu yuiri, kua tetama aintaunupa akiti yuiri yaneruixawa kurusa rese. 9 Asui musapiri ara meiu yuiri kuaita apigawaita aintaumaa aintapira kuera, panye mundu puraita, panye kuaita miraita, kuaita upurungitawaita aintanyenga rupi aintaumaa panye ainta, asui tiaintauxari aintauyutima aintapira kuera iwi kuara kiti. 10 Asui kuaita mundu puraita suuri ainta aintaresewara, asui aintauyumusuuri asui aintaumee prezenti amuita supe arama aintaresewara kuaita mukuĩ utitikawaita aintaumpurarakariwaa ainta kua mundu upewaraita. 11 Asui musapiri ara meiu rire Deus upeyu aintapia kiti kua espiritu upakawaa, asui aintaupuamu aintauiku asui aintausikie aintaumaa turusu kuaita umaawaita ainta. 12 Asui kuaita mukuĩwaita aintausendu yepe nyenga kirimbawa iwaka sui, umbeu ainta supe:

—Peyupiri sepiri, asui aintauyupiri iwaka kiti nuvẽ upe aintaumaawaa upe panye kuaita aintaruanyanaita. 13 Asui kirimbawa uriri iwi aramete uwari dezisa parti aintaretama, asui umanu seti mili miraita uriri irumu kua iwi, asui kuaita amuita aintausikie turusu, asui aintaumee purangawaa Deus supe iwaka kiti. 14 Asui usasawana kua mukuĩsawa aintaupurarawaa, maa kuri kutara uri kua musapirisawa aintaupurarawaa arama.

15 Asui setisa anju upeyu itrumbeta, asui yepeyepe nyenga tiapuwaa iwaka kiti, umbeu:

—Kuiri kua mundu guvernaduru aete yaneruixawa Deus Kristu yuiri, asui yaneruixawa kuri ae yawewarawate. 16 Asui kuaita vinti kuatru serakuenawaita uwapikawaita aintatrunu upe Deus runde kiti, aintauyawika aintauyumimi aintaruwa, asui aintaumee purangawaa Deus supe. 17 Aintaunyee ixupe:

—Yamee inde arama purangawaa inde yaneruixawa Deus, inde kirimbawawaa panye sui, inde reikuwaa kuiri kuxima yuiri, nyãse kirimbawa reiku asui kuiri aintaruixawa inde. 18 Supiwa kuaita miraita aintapiaiwa ainta, asui nepiaiwasawa usikana, asui nerangawa usikana yuiri rembeu arama aintaresewara kuaita umanuwaita, rexari arama yuiri ainta supe turusu purangawaa kuaita neyaraita, ainta supe yuiri kuaita utitikawaita uruyariwaita yuiri, ainta supe panye kuaita aintausikiewaita nerera sui, panye ipuiwaitare ipuwasuwaita yuiri, asui nerangawa usikana remukanyemu arama kuaita umukanyemuwaita kua mundu. 19 Asui aintaupirari Deus templu iwaka kiti, asui hamaa templu upe kua kaxa Deus umbeuwaa, asui truvão wera, asui hasendu nyenga, asui hasendu yuiri tiapu truvão, asui uriri iwi kirimbawa, asui uwari itaita.