Kuaita umusangawaita selu irumu
7
Asui arire hamaa kuatru anju aintaupuamu kuatru mundu arukanga upe, aintaupisika panye kuatru iwitu tiarama aintaupeyu kua mundu kiti, yawaite aintaupeyu parana rese u mirá rese yuiri. 2 Asui hamaa yuiri amu anju uyupiri kurasi usemuwaa sui uriku Deus upakawaa selu, asui kirimbawa usasemu ainta supe kuaita kuatru anjuita umuaiwawaita panye iwi parana yuiri. 3 Umbeu:—Teremuaiware kua iwi parana turusuwaa yuiri mirá yuiri ate yamusangawa selu irumu aintaruwa rese panye kuaita yaneDeus supe aramawaita. 4 Asui hasendu aintaumbeu ixe arama aintasiyasawa kuaita aintaumusangawaita selu irumu, sentu kuarenta kuatru mili aintasiyasawa panye kuaita Israel rairaita suiwara. 5 Aintaumusangawa ainta selu irumu duzi mili aintasuiwara kuaita Judá suiwaraita, asui duzi mili yuiri aintasuiwara kuaita Ruben suiwaraita, asui duzi mili aintasuiwara kuaita Gadi suiwaraita. 6 Asui duzi mili yuiri aintasuiwara kuaita Azer suiwaraita, asui duzi mili aintasuiwara kuaita Naftali suiwaraita, asui duzi mili aintasuiwara kuaita Manase suiwaraita. 7 Asui duzi mili aintasuiwara kuaita Simeão suiwaraita, asui duzi mili aintasuiwara kuaita Levi suiwaraita, asui duzi mili aintasuiwara kuaita Izakar suiwaraita. 8 Asui duzi mili aintasuiwara kuaita Zebulum suiwaraita, asui duzi mili aintasuiwara kuaita Juze suiwaraita, asui aintaumusangawa selu irumu duzi mili aintasuiwara kuaita Benjamĩ suiwaraita.
Siya umukaturuwaita
9 Asui arire hamaa, asui hamaa siyawaa mira tiawa upuderi upapari muiri aintasiyasawa, aintasuiwara panye mira kua mundu upe, panye kuaita upurungitawaita aintayaweyawe, aintaupuamu umaa trunu runde sui kua kurderu yuiri, murutingawaa aintarupa, asui aintauriku aintaipu upe kuruwai ruã rawa. 10 Asui aintaumbeu nyenga tiapuwaa irumu:
—Kua salvasão iyara ae kua yaneDeus uwapikawaa itrunu upe, iyara yuiri kua kurderu. 11 Asui panye kuaita anjuita upuamu trunu ruaki aintaruaki yuiri kuaita serakuenawaita kuaita kuatru upakawaita yuiri, asui aintauyawika trunu runde sui, asui aintaumee purangawaa Deus supe, 12 Aintaumbeu:
—Amem. Iyara panye purangawaa, panye purangasawa, panye ukuawasawa, panye purangasawa purangawaa, panye yawaitesawa, panye umundusawa, panye kirimbawasawa yuiri, iyaraita ainta kua yaneDeus yawewarawate, amem. 13 Asui yepe aintasuiwara kuaita serakuenawaita umbeu:
—Seruixawa, inde rekuawa. Asui umbeu ixe arama:
—Aintausemu isui kua turusuwaa aintaupurara, aintaumuyasuka aintarupa aintauxari murutingawaa ae suwi upe kua kurderu. 15 Ape aintauiku Deus trunu runde sui, asui aintaupuraki ixupe templu upe muiri ara muiri pituna yuiri, asui kua uwapikawaa trunu upe umukaturu kuri ainta suka upe. 16 Timaa kuri sasi ainta supe yumãsi, timaa kuri aintaisi ainta, timaa kuri kurasi umuturi aintarese kirimbawa, timaa yuiri aintaupurara sakuwaa. 17 Nyãse kua kurderu uikuwaa ipiterupi kua trunu usaru kuri ainta, urasu kuri ainta ii rukena upakawaa ipiri, asui Deus kuri uyusi panye aintaresa yukise.