—Reyupiri sepiri hamukame arama remaa kuaita uriwaa kuri. 2 Asui kutara Espiritu upisika ixe ukuawasawa irumu, asui hamaa yepe trunu uikuwaa iwaka upe, asui yepe uwapika trunu upe. 3 Asui kua uwapikawaa sese hamaa ae kuaye ita yawe serawaa jaspe, kuaye ita yawe serawaa sarduniu, asui itrunu ruaki hamaa yepe waimi mirapara kuaye ita yawe serawaa esmeralda. 4 Asui itrunu ruaki hamaa yuiri vinti kuatru trunu, asui aintauwapika sese vinti kuatru serakuenawaita murutingawaa aintarupa, asui aintaakanga rese kurua uru suiwara. 5 Asui trunu sui usemu truvão werawaa, nyenga yuiri, truvão yuiri, asui trunu ruaki hamaa seti turi aete Deus espirituita ainta setiwaita. 6 Asui trunu runde kiti yepe kuaye parana vidru kristalu yawe. Asui trunu piterupi, uyatimana yuiri ae, apete kuatru upakawaita teresemu aintapira aintaresa irumu. 7 Asui kua primeru upakawaa kuaye leão yawe ae, asui kua amu kuaye vaka membira yawe ae, asui amu uriku suwa kuaye apigawa ruwa yawe, asui kua amu kuaye wirawasu yawe ae uwewe irumu. 8 Asui kuaita kuatru upakawaita aintayaweyawe aintauriku seis aintapepu asui teresemu aintapira aintaresa irumu panye aintapira rese panye aintapira upe yuiri, asui muiri ara pituna yuiri aintaumbeu:

—Tiaintakuere ainta, aintaumbeu: "Purangawaa, purangawaa, purangawaa inde Yaneruixawa Deus, inde kirimbawawaa panye sui, indete kua reikuwaa kuera, indete kua reikuwaa kuiri, indete yuiri kua reikuwaa kuri." 9 Asui kuaita upakawaita aintaumee rame purangawaa ixupe respeitu yuiri, grasa ixupe yuiri kua uwapikawaa itrunu upe kua upakawaa yawewarawate, 10 Asui kuaita vinti kuatru serakuenawaita aintauyawika kuri senunde sui kua uwapikawaa trunu upe, asui aintaumee ixupe purangawaa kua upakawaa yawewarawate, asui aintauxari aintakurua itrunu runde, asui aintaumbeu: 11 —Purangawaa inde yaneruixawa, yaneDeus, yamee inde arama purangawaa, respeitu yuiri, kirimbawasawa yuiri nyãse inde remunyawaa panye maa, asui reputari resewara yawe aintaupaka ainta, remunya ainta panye.